🏘️ബോസ്റ്റൻ ബംഗ്ലാവ് 20 [Gladiator] 438

“ എന്തുപറ്റി..? വഴിതെറ്റി വന്നതാണോ..?”ഒരു ചെറുപുഞ്ചിരി ജൂലിക്ക് സമ്മാനിച്ചുകൊണ്ട് ആ യുവതി ചോദിച്ചു.

“ അ..അറിയില്ല ഞാൻ…ഞാൻ ബംഗ്ലാവിലേക്കുള്ള വഴി നോക്കി നടക്കുകയാ.. “ജൂലി എരിത്തിലിനു ചുറ്റും കണ്ണോട്ടിച്ചു. ഇപ്പോ ആ യുവതി കറക്കുന്ന പശു കൂടാതെ മറ്റൊരു പശു കൂടെ അതിനുള്ളിൽ നിൽപ്പുണ്ട്,കൂടാതെ രണ്ടു കുതിരയും കുറച്ച് താറാവുകളും.

“ ബോസ്റ്റൺ ബംഗ്ലാവിലേക്കുള്ള വഴിയാണോ..? ദാ..അവിടുന്നുള്ള രണ്ടാമത്തെ വഴിയെ നേരെ പോയാൽ മതി. ബംഗ്ലാവിൽ എത്തും.പക്ഷേ താൻ അങ്ങോട്ട് പോകാത്തതാണ് നല്ലത്.. ആ വീടിന്റെ ഉടമസ്ഥനായ ഫെഡറിക്ക് അയാളുടെ ഭാര്യയെ ചെയ്തത് അറിഞ്ഞാൽ നീ പിന്നെ അങ്ങോട്ട് പോവുകയെ ഇല്ല..” ആ യുവതി വീണ്ടും പാൽ കറക്കാൻ തുടങ്ങി. “ ഭാര്യയുമായുള്ള എന്തോ പ്രശ്നത്തിന്റെ പേരിൽ അയാൾ ആ പെണ്ണിനെ കൊന്നു. ആ ബംഗ്ലാവിൽ ഒരു പഴയ ക്ലോക്ക് ഉണ്ട് ബ്രിട്ടീഷുകാർ പണിത ഒരു കൂറ്റൻ ക്ലോക്ക്. ക്ലോക്കിനുള്ളിലെ സാധനങ്ങളെല്ലാം മാറ്റിയശേഷം ഇയാൾ ഭാര്യയെ വെട്ടി നുറുക്കി ആ ക്ലോക്കിനുള്ളിലാക്കി ഒളിപ്പിച്ചു”.

“ മതി മതി ഇനി എനിക്കൊന്നും കേൾക്കണ്ട” പെട്ടെന്ന് ഒരു കാറ്റടിച്ചതും ജൂലിയുടെ ശരീരം തണുത്ത് വിറക്കാൻ തുടങ്ങി. ഇത് പകലാണോ അതോ വൈകുന്നേരം ആണോ എന്ന് പോലും ജൂലിക്ക് മാമസ്സിലായില്ല. അകിട്ടിൽ നിന്നും താളത്തിൽ താഴെവെച്ച പാത്രത്തിലേക്ക് പശുവിൻപാൽ വീഴുന്നത് അവൾ നോക്കി നിന്നു.

“ പ്രധാനപ്പെട്ട കാര്യം ഇനിയും ഞാൻ പറഞ്ഞിട്ടില്ല. അയാളുടെ ഭാര്യയെ നുറുക്കി ആ ക്ലോക്കിന് ഉള്ളിൽ ഒളിപ്പിച്ചു വെച്ചതിനുശേഷം ഇപ്പോഴും ആ ക്ലോക്ക് ഓരോരോ മണിക്കൂർ കൂടുമ്പോൾ മണിയടിക്കുന്നുണ്ട് എന്നാണ് നാട്ടുകാർ പറയുന്നത്”