🏘️ബോസ്റ്റൻ ബംഗ്ലാവ് 5 [Gladiator] 1544

“ഒരാള് നമ്മളെ തല്ലാൻ ഓടിച്ചു.. ഗാർഡനിൽ”ഡെയ്സി പറഞ്ഞു. അവളുടെ ചിരി മെല്ലെ മാഞ്ഞു സീരിയസ് ആയി.

ജൂലി മകന്റെ കാലിലെ മുറിവിൽ മെല്ലെ തൊട്ടു.

“എനിക്ക് കുഴപ്പമില്ല അമ്മേ.” ഡാനിയേൽ അമ്മയുടെ മൃദുലമായ തവിട്ട് കണ്ണുകളിലേക്ക് നോക്കി പറഞ്ഞു.അവൻ്റെ നനുത്ത മുടി അവൻ്റെ നെറ്റിയിലും കണ്ണിലും വീണു. 

“വാ.. ഞാൻ മുറിവ് വൃത്തിയാക്കി തരാം” ജൂലി ഡാനിയോട് പറഞ്ഞു.

“ജോർജ്.. അയാളു അവിടെ ഉണ്ടോ എന്ന് നോക്കിയേ…”ദേഷ്യ സ്വരത്തിൽ ജോർജിനോട് ജൂലി പറഞ്ഞു.

“മ്മ്..” എന്ന് മൂളിക്കൊണ്ട് അവിടിരുന്ന വടിയുമെടുത്തു ജോർജ് കതക് തുറന്ന് പുറത്തേക് നടന്നു.

“ഡെയ്സി.. നീയാ പൂവ് കളഞ്ഞിട്ട് പോയി കൈ വാഷ് ചെയ്തേ…”കാലിൽ മുറിവ് പറ്റിയ ഡാനിയെ തോളിൽക്കൂടി കൈ ഇട്ട് ബാത്‌റൂമിലേക് കൊണ്ട് പോയ ജൂലി പറഞ്ഞു.

അപ്പോഴേക്കും പുറത്തു പോയ ജോർജ് അകത്തേക്കു കയറി വന്നു “അവിടെയൊന്നും ആരും ഇല്ല.. നിങ്ങൾ ആളെ കണ്ടെന്നു ഉറപ്പാണോ..? അതോ തോന്നലോ..?” ജോർജ് ചോദിച്ചു.

“ഇല്ല അച്ഛ…ഉറപ്പാ.. ഞങ്ങൾ കണ്ടു. ചിലപ്പോൾ അച്ഛൻ വരുന്നത് കണ്ട് പേടിച്ചു ഓടിക്കാണും “ഡെയ്സി പറഞ്ഞു.

“മ്മ്മ്..”ജോർജ് മൂളി..

“നിങ്ങളിത് എങ്ങോട്ടാ….?” ഡാനിയേയും കൊണ്ട് ബാത്‌റൂമിലേക് നടന്ന ജൂലിയോട് അവൻ ചോദിച്ചു.

“ഇവന്റെ മുറിവൊന്ന് കഴുകാൻ”ബാത്‌റൂമിൽ കയറി ജൂലി കതകടച്ചു.

“ഓക്കേ” ജോർജ് പറഞ്ഞു.

“അല്ല.. നീയിത് എങ്ങോട്ട് പോകുവാ…?” കിച്ചണിലേക്ക് നടന്ന് പോയ ഡെയ്സിയോട് ജോർജ് ചോദിച്ചു.

“ഈ റോസ വെള്ളത്തിൽ ഇട്ട് വെക്കാനാ.. പിന്നെ കയ്യും കഴുകണം”ഡെയ്സി പറഞ്ഞു.