ആദ്യം അമ്മായിഅമ്മ പിന്നെ അമ്മ 1 [Vaisakh Murali] 176

​ഞങ്ങളുടെ ഫ്ലാറ്റിലേക്ക് കയറിയപ്പോൾ തന്നെ അമ്മ ഓരോ കോണും കൗതുകത്തോടെ നോക്കി.

രാത്രിയായപ്പോൾ ഞങ്ങളുടെ ആ ചെറിയ ഫ്ലാറ്റിൽ ഉറക്കത്തിനുള്ള തയ്യാറെടുപ്പുകൾ തുടങ്ങി. ഒരു വൺ ബി.എച്ച്.കെ ഫ്ലാറ്റായതുകൊണ്ട് സ്ഥലപരിമിതി ഉണ്ടായിരുന്നു.

​”അമ്മേ, അമ്മ എന്റെ കൂടെ റൂമിൽ കിടന്നോ. അർജുൻ ഹാളിലെ സോഫാ ബെഡിൽ കിടന്നോളും,” ചാരു പ്ലാൻ അവതരിപ്പിച്ചു.

​അത് കേട്ടപ്പോൾ അമ്മയുടെ മുഖം ഒന്ന് വാടി. “അതെങ്ങനെയാ ശരിയാവുക? മോൻ കഷ്ടപ്പെട്ട് ജോലിയൊക്കെ കഴിഞ്ഞ് വന്ന് ഇതിൽ കിടക്കാനോ , ഞാൻ അവിടെ കിടന്നോളാം. അർജുൻ റൂമിൽ കിടന്നോട്ടെ,” അമ്മ നിർബന്ധം പിടിച്ചു.

​”അതൊന്നും സാരമില്ല അമ്മേ,” ഞാൻ ഇടപെട്ടു. “ഈ ഫ്ലാറ്റിൽ സൗകര്യം കുറവായതുകൊണ്ടാ പുതിയ ബെഡ് ഒന്നും വാങ്ങാത്തത്. എനിക്ക് ഇവിടെ കിടക്കുന്നത് ശീലമാണ്. അമ്മ സമാധാനമായി അകത്ത് കിടന്നോ.”

​അമ്മ പകുതി മനസ്സോടെ സമ്മതിച്ചു. എന്നിട്ട് ചോദിച്ചു,

“നാളെ നിങ്ങളെ രണ്ടുപേരെയും ജോലിക്ക് പോകാൻ ഞാൻ വിളിക്കണോ?”

​”വേണ്ട അമ്മേ, അമ്മ നല്ലോണം വിശ്രമിച്ചോ. എന്റെ ക്യാബ് ആറുമണിക്ക് വരും, അതുകൊണ്ട് ഞാൻ നേരത്തെ ഇറങ്ങും,” ചാരു പറഞ്ഞു. “അമ്മ എഴുന്നേൽക്കുമ്പോൾ അർജുൻ ഇവിടെ കാണും. അവന് പത്തുമണിക്കേ ഓഫീസിൽ പോകേണ്ടതുള്ളൂ.”

​ചാരു അടുത്ത് വന്ന് എന്നെ കെട്ടിപ്പിടിച്ച് ‘ഗുഡ് നൈറ്റ്’ പറഞ്ഞു. ലൈറ്റുകൾ ഓരോന്നായി അണഞ്ഞു. മറുപുറത്ത്, ബെഡ്റൂമിൽ നിന്ന് ചാരുവിന്റെയും അമ്മയുടെയും പതുക്കെയുള്ള സംസാരം കേൾക്കാമായിരുന്നു. ഗർഭകാലത്തെ അവശതകളെക്കുറിച്ചും നാട്ടിലെ വിശേഷങ്ങളെക്കുറിച്ചും അവർ വാതോരാതെ സംസാരിക്കുന്നുണ്ട്. ഇടയ്ക്കെപ്പോഴോ ഞാൻ ഉറക്കത്തിലേക്ക് വഴുതി വീണു.