❤️അനന്തഭദ്രം 6❤️ [രാജാ] 1701

“”പേടിച്ചിട്ടാ ഞാൻ…. വിധി വീണ്ടും എന്റെ കണ്മുന്നിൽ എത്തിച്ചു തന്ന നിന്നെ നഷ്ട്ടപ്പെടുമോ എന്നു പേടിയുണ്ടായിരുന്നു എനിക്ക്…””

കലങ്ങിയ മഷിയെഴുതിയ കണ്ണുകളിൽ പിന്നെയും അടരാൻ കാത്തു നിന്ന നീർത്തുള്ളികളും, നീണ്ട കരച്ചില് കാരണം മൂക്കിലടിഞ്ഞ നനവും സാരിത്തുമ്പുയർത്തി ഒപ്പിയെടുക്കവേ ചെറിയ ഏങ്ങലടിയോടെ അവൾ പതിയെ മൊഴിഞ്ഞു….

“”അയ്യേ… എന്തുവാ പെണ്ണേ ഇത്…. എന്റെയടുത്ത് ഇത്രയധികം സ്വാതന്ത്ര്യമുള്ള നിനക്ക്, മനസ്സിൽ ഉള്ളത് എന്നോട് തുറന്നു പറയാൻ എന്തിനാ പേടി….എന്റെ പ്രതികരണം എന്താകുമെന്നോർത്ത് നീ ഇത്രയധികം ടെൻഷനടിച്ചിരുന്നുവോ…..?? ””

ഞാൻ അവളെ ആശ്വസിപ്പിക്കുവാൻ എന്നോണം അവളുടെ കയ്യിൽ മുറുകെ പിടിച്ചു….

“”ഇവിടെ,, ഈ ഹൃദയത്തിന്റെ ഒത്ത നടുക്ക് സൂക്ഷിച്ചു വച്ചിട്ടുള്ള ആളെ, അവിടെ നിന്നും പൂർണമായും ഒഴിവാക്കി വിടണം..അപ്പോൾ… അപ്പോൾ മാത്രമല്ലെ നീ എന്റെ സ്വന്തമാകൂ….എന്റെ മാത്രം അനന്തുവാകു…..””

പെട്ടന്ന് എന്റെ നെഞ്ചിലേക്ക് നോക്കി അവിടെ ചൂണ്ടു വിരൽ അമർത്തികൊണ്ട് അവൾ പതിയെ പറഞ്ഞു…. നോവിൽ കുതിർന്ന ചിരിയോടെ എന്നെ തന്നെ നോക്കിയിരിക്കുന്ന സെലിന്റെ നോട്ടം നേരിടാൻ ഭയം തോന്നിയ ഞാൻ അവളെ വിട്ട് എഴുന്നേറ്റു തിരിഞ്ഞു നിന്നു…..അവൾക്കൊരു മറുപടി നൽകാനാകാതെ എന്റെ നാക്ക് വിറ കൊണ്ടു….

ഭദ്രയുടെ ഓർമ്മകളും അവളോടുള്ള പ്രണയവും വരിഞ്ഞു മുറുക്കിയ മനസ്സുമായി ഒന്നും മിണ്ടാതെ നിൽക്കുന്ന എന്നെ അവൾ പുറകിൽ നിന്നും പുണർന്നു…

“പറ്റുമോ അനന്തുവിന്,, ഭദ്രയെ ഉപേക്ഷിച്ച് എന്റെത് മാത്രമായി തീരാൻ…..പറ്റില്ല… അല്ലേ….. “‘

എന്നെ തിരിച്ചു നിർത്തിയപ്പോൾ എന്റെ കണ്ണുകളിലെ പിടച്ചിൽ മനസ്സിലാക്കിയ അവൾ എന്റെ നെഞ്ചിൽ വിരലമർത്തി കൊണ്ട് തുടർന്നു…

“”എനിക്ക് ആദ്യമെ മനസ്സിലായിരുന്നു നിന്റെ സംസാരത്തിൽ നിന്നും, ഉള്ളിൽ നീ സൂക്ഷിക്കുന്ന ഒരു പെണ്ണിനോടുള്ള നിന്റെ പ്രണയം…..മറ്റൊരു പെണ്ണിന് മാത്രം തിരിച്ചറിയാൻ കഴിയുന്ന സത്യം….എന്നാൽ നിന്റെ പ്രണയത്തിന്റെ അവകാശി ഞാൻ അല്ലെന്നും, ആ സ്ഥാനത്തേയ്ക്ക് വരാൻ എനിക്ക് കഴിയില്ലന്നും അന്നേ ഉറപ്പാക്കിയപ്പോൾ എന്റെ ഉള്ളിലെ ഇഷ്ട്ടം ഞാൻ എന്നന്നേക്കുമായി കുഴിച്ചു മൂടി…..ഭദ്രയെപ്പറ്റി നീ എന്നോട് പറയുന്നതിന് മുന്നേ തന്നെ….but I dont wish to loose you….I need you always by my side as a good friend…..ഒരുപാട് ഇഷ്ട്ടപ്പെട്ടിരുന്നു എനിക്ക് നിന്നെ……ഈ സത്യമറിയാകുന്ന മൂന്നാമതൊരാൾ മായ ആണ്….തമ്മിൽ രഹസ്യങ്ങളൊന്നും സൂക്ഷിക്കാത്ത ഞങ്ങൾക്കിടയിൽ ഇതിനും മാറ്റമൊന്നുമില്ലായിരുന്നു…അവൾ പലവട്ടം നിർബന്ധിച്ചതാണ് എന്നെ,, എല്ലാം നിന്നോട് തുറന്നു പറയാൻ… പക്ഷെ ഞാനാണ് മടിച്ചു നിന്നത്… എന്നാൽ എന്റെ ആ തീരുമാനം ശരിയായിരുന്നു എന്ന് എനിക്കിപ്പോൾ തോന്നുന്നു….മായയും ഇന്ന് അത് ശരി വയ്ക്കുന്നു…ഭദ്ര,, അവൾ..അവൾ തന്നെയാണ് നിന്റെ പെണ്ണ്…….നീ സ്നേഹിച്ച പെൺകുട്ടി…നിങ്ങൾ തമ്മിൽ തന്നെയാണ് ചേരേണ്ടിയിരുന്നത്….അവളുമൊത്തുള്ള ഒരു ജീവിതം നീ എത്ര മാത്രം ആഗ്രഹിച്ചിരുന്നുവെന്ന് എനിക്കറിയാം അനന്തു…..നിങ്ങൾ ഒന്നിച്ചതിൽ ഏറ്റവുമധികം സന്തോഷിക്കുന്നത് ഞാനാണ്….””