ദേവേട്ടനെ കണ്ടതും അവന്റെ നിയന്ത്രണം പാടെ പോയി. ഒരു കൊച്ചു കുട്ടിയെപ്പോലെ അവൻ വിതുമ്പിപ്പോയി…
”ദേവേട്ടാ… എന്നോട് ക്ഷമിക്കണം. എല്ലാം എന്റെ തെറ്റാണ്… എല്ലാം ഞാൻ കാരണം ഉണ്ടായതാണ്!” അവൻ ഏങ്ങലടിച്ചു കൊണ്ട് കുറ്റം ഏറ്റുപറയാൻ തുടങ്ങി…
തന്റെ പ്രിയപ്പെട്ട ദേവേട്ടന്റെ മുഖത്തേക്ക് നോക്കാൻ പോലും ആവാതെ അവൻ ആ വിതുമ്പലിൽ മുങ്ങി…
ദേവേട്ടൻ പതിയെ അവന്റെ അരികിലിരുന്നു. അവന്റെ തോളിൽ കൈവെച്ച് ആശ്വസിപ്പിച്ചു…
“അക്കു, നീയിങ്ങനെ തളരരുത്. മനുഷ്യരാണ്, തെറ്റുകൾ പറ്റുന്നത് സ്വാഭാവികമാണ്. എന്ത് വലിയ പ്രശ്നമാണെങ്കിലും നമുക്കത് സംസാരിച്ച് പരിഹരിക്കാം. നീ എന്നോട് കാര്യങ്ങൾ തുറന്നു പറയൂ. എങ്കിലല്ലേ എനിക്ക് നിന്നെ സഹായിക്കാൻ പറ്റൂ?”
ദേവേട്ടന്റെ ആ വാക്കുകൾ നൽകിയ ധൈര്യത്തിൽ അക്കു പതുക്കെ ഒന്ന് ശാന്തനായി. അവൻ കണ്ണുകൾ തുടച്ചു, ദീർഘമായി ഒന്ന് ശ്വസിച്ചു…
ആ രാത്രിയിലെ ഓരോ നിമിഷവും അവന്റെ കണ്ണുകളിൽ ഒരു സിനിമാ ദൃശ്യം പോലെ തെളിഞ്ഞു വന്നു.
ഒടുവിൽ, തന്റെ ഉള്ളിൽ തളംകെട്ടി നിന്ന ആ ഭാരത്തെ പുറന്തള്ളാൻ എന്നോണം, അക്കു ആ രാത്രി നടന്ന കാര്യങ്ങൾ ഓരോന്നായി പറഞ്ഞു തുടങ്ങി…
*************
കൃത്യസമയത്ത് തന്നെ അവർ പാർട്ടി നടക്കുന്ന റിസോർട്ടിലെത്തി. കാർ പാർക്കിംഗ് ലോട്ടിൽ നിന്നിറങ്ങി പാർട്ടി ഹാളിലേക്ക് നടക്കുമ്പോൾ, അവരുടെ വിരലുകൾ പരസ്പരം കോർത്തുപിടിച്ചിരുന്നു.
ആ സ്പർശനത്തിൽ ഒരു പുതിയ ലോകത്തേക്ക് കാലെടുത്തുവെക്കുന്നതിന്റെ ആകാംക്ഷ രണ്ടുപേരിലുമുണ്ടായിരുന്നു…
