ഭദ്രദീപം [KKWriter 2024] [EXTENDED EDITION] 545

“ഞാൻ പൊയ്ക്കോട്ടേ…..?” ഭദ്ര വീണ്ടും ചോദിച്ചു.

വിശ്വനാഥൻ ഒരു നിമിഷം തന്റെ മനസിന്റെ താളം തെറ്റുന്നത് അറിഞ്ഞു. അയാൾ വീണ്ടും ഒരു ഗ്ലാസ് കട്ടക്ക് ഒഴിച്ചുകൊണ്ട് ഭദ്രയുടെ മുഖത്തേക്ക് നോക്കുമ്പോൾ ഭദ്ര പതിയെ എണീറ്റുകൊണ്ട് ബാൽക്കണിയുടെ വാതിൽ അടച്ചിട്ടു സോഫയുടെ അരികിലായി ഇരുന്നു.

“വിശ്വനാഥാ… നീ എന്റെ അമ്മയെയും അച്ഛനെയും ഇല്ലാതാക്കിയത് ഞങ്ങൾ ഒരിക്കലും അറിയില്ല എന്നാണോ കരുതിയത്?” ഉറച്ച ശബ്ദത്തിൽ ഭദ്ര ചോദിച്ചു.

ഒരു നിമിഷം ഭദ്രയുടെ കണ്ണിലെ തീ പാറുന്നത് കണ്ട വിശ്വനാഥൻ പതറികൊണ്ട് സോഫയുടെ അറ്റത്തേക്ക് യാന്ത്രികമായി നീങ്ങി.

“എന്നെയും ദീപേട്ടനെയും അനാഥമാക്കിയത് കൊണ്ട് നിനക്കെന്താണ് നേടാൻ കഴിഞ്ഞത്? മനസിനെ പിടിച്ചുകെട്ടാൻ നീ പഠിക്കാത്തതിന്റെ ഫലം. അത് നീ ഏതൊക്കെ അമ്പലത്തിൽ ഏതൊക്കെ മൂർത്തിയുടെ മുന്നിൽ ചെന്നാലും ശാന്തി ഒരിക്കലും കിട്ടില്ല. നിന്റെ ജീവിതം നീ ഇപ്പോൾ കുടിച്ച മദ്യത്തോടെ അങ്ങ് തീരും.”

ഭദ്ര അവളുടെ കർചീഫ് കൊണ്ട് കുപ്പി പിടിച്ചുകൊണ്ട് ആ കുപ്പിയിലെ ബാക്കിയുള്ള മദ്യം അടുത്തുള്ള പൂച്ചട്ടിയിലേക്ക് ഒഴിച്ചു.

“നിനക്കെന്തെങ്കിലും പറയാനുണ്ടോ?” ഭദ്ര കയ്യിലെ ഗോൾഡ് വാച്ച് നോക്കികൊണ്ട് പറഞ്ഞു. “ഇനി രണ്ടു മിനുട്ട് കൂടെയുണ്ട്. നിനക്ക് വേണമെങ്കിൽ ഒന്ന് കരയാം. അതും കൂടിയാവുമ്പോൾ നീ മുകളിലേക്ക് ചെല്ലുമ്പോൾ ഞങ്ങളുടെ അമ്മയെയും, അച്ഛനെയും കാണാൻ നിനക്ക് അത്ര ബുദ്ധിമുട്ട് കാണില്ല.”

വിശ്വൻ മലർന്നടിച്ചുകൊണ്ട് ഭദ്രയുടെ കാലിലേക്ക് വീണതും ഒരു വിറയൽ.