മത വിശ്വാസത്തിന്റെ ഒരു പ്രശ്നം അതാണ് ആൽബി. മതവിശ്വാസികളോട് എനിക്ക് എതിർപ്പൊന്നുമില്ല. മറ്റുള്ളവർ ഇഷ്ടപ്പെടുന്ന കാര്യങ്ങളെ ബഹുമാനിക്കാൻ ഞാൻ ചെറിയ പ്രായത്തിലെ പഠിച്ചിട്ടുണ്ട്. കാടാമ്പുഴയിലും കടമറ്റത്തും ഒരു പോലെ മുട്ടുകൾ മടക്കാൻ എനിക്കറിയാം. ഫാദർ റോബിനും ആസാറാം ബാപ്പുവും ഒരേപോലെ ബലാത്സംഗികൾ ആണെന്ന് വിശ്വസിക്കാനും എനിക്ക് കഴിയും. മതങ്ങൾ വഴിവിളക്കാകുന്നത് പോലെ പ്രകാശം ഊതിക്കെടുത്തുന്നവരാണെന്നും തിരിച്ചറിയുകയെന്നത് എല്ലാവരിലും വേണം എന്നാണ് എന്റെ ഒരു സ്വപ്നം.

ശ്രദ്ധിച്ചിട്ടുണ്ടോ, ലോകത്ത് ഏറ്റവും സത്യസന്ധരായ മനുഷ്യരുള്ള , മനുഷ്യാവകാശങ്ങൾ പരമാവധി സംരക്ഷിക്കപ്പെടുന്ന രാജ്യങ്ങൾ ഏതൊക്കെയാണ് എന്ന്? കുട്ടികളുടെയും സ്ത്രീകളുടെയും നേർക്ക് ഏറ്റവും കുറവ് അതിക്രമങ്ങൾ നടക്കുന്ന രാജ്യങ്ങൾ ഏതൊക്കെയാണ് എന്ന് ശ്രദ്ധിച്ചിട്ടുണ്ടോ? പോലീസ് സ്റ്റേഷനുകളും ജയിലുകളും അടച്ചു പൂട്ടിക്കൊണ്ടിരിക്കുന്ന രാജ്യങ്ങൾ ഏതൊക്കെയാണ് എന്ന് ശ്രദ്ധിച്ചിട്ടുണ്ടോ? സ്കാന്ഡിനേവിയൻ രാജ്യങ്ങളാണവ. ഡെന്മാർക്ക്, സ്വീഡൻ, നോർവേ, ഫിൻലൻഡ്‌ തുടങ്ങിയ രാജ്യങ്ങൾ. ഫിൻലൻഡിനെപ്പറ്റി ഡോക്റ്റർ ശശി തരൂർ ഒരു പ്രസംഗത്തിൽ പറഞ്ഞു.”ഫിൻലാൻഡിൽ വെച്ച് നിങ്ങളുടെ പേഴ്‌സ് നഷ്ട്ടപ്പെട്ടു എന്ന് വിചാരിക്കുക. നിങ്ങൾ ഹോട്ടൽ മുറിയിൽ തിരിച്ചെത്തുന്നതിന് മുമ്പ് പേഴ്‌സ് നിങ്ങളുടെ അവിടെയെത്തിയിരിക്കും,” ഈ രാജ്യങ്ങളുടെ മറ്റൊരു പ്രത്യേകത എന്ന് പറയുന്നത് ഇവിടങ്ങളിലൊക്കെ എൺപത്തിയഞ്ചു ശതമാനത്തിനു മേൽ നാസ്തികരാണ് എന്നതാണ്. മത – ദൈവ വിശ്വാസങ്ങളോട് വൈമുഖ്യമുള്ള ജനങ്ങൾ. എന്നാൽ മതപരേതയുടെ കാര്യത്തിൽ ഏറ്റവും മുമ്പിൽ നിൽക്കുന്ന അമേരിക്കയിലും ഇന്ത്യയിലുമോ? കൊലപാതകങ്ങൾ, ബലാത്സംഗങ്ങൾ മറ്റു കുറ്റകൃത്യങ്ങൾ……ലോകത്ത് ബലാത്സംഗങ്ങളുടെ കാര്യതിൽ ഒന്നും രണ്ടും സ്ഥാനങ്ങളിലാണ് ഈ രാജ്യങ്ങൾ….

ഞാൻ മത വിരോധിയോ ദൈവ നിഷേധിയോ ഒന്നുമല്ല. എങ്കിലും നമ്മുടെ വിശ്വാസവും ജീവിതവും തമ്മിൽ എവിടെയോ ഒരു പൊരുത്തക്കേടില്ലേ?

ഈ പൊരുത്തക്കേടിന്റെ തോത് ഭയാനകമാം വിധത്തിൽ വർധിക്കുന്നു മത ഭക്തി ഹിസ്റ്റീരിയപോലെ ആളിക്കത്തുമ്പോൾ. ഓപ്പസ് ദേയി അത്തരം ഒരു വിഭാഗമാണ് എന്നതാണ് ദൗർഭാഗ്യകരം. എന്തൊക്കെ ആരോപണങ്ങളും കൺവിക്ഷൻസും ആണ് അതിലെ പല അംഗങ്ങളുടെ ജീവിതവുമായി ബന്ധപ്പെട്ട് കിടക്കുന്നത്. ഇത്തരം സംഘങ്ങൾ എല്ലാ വിഭാഗങ്ങളിമുണ്ട്. ഏറ്റവും അപകടകരമായ വസ്തുത നിങ്ങൾ ചെയ്യുന്നതെല്ലാം ന്യായീകരിക്കപ്പെടും നിങ്ങൾ ഓപ്പസ് ദേയി പോലെ ഒരു സംഘടനയിൽ അംഗമാകുമ്പോൾ എന്നതാണ്. നിങ്ങൾ ദൈവത്തിനു വേണ്ടി കള്ളം പറയുന്നു, മോഷ്ടിക്കുന്നു, വെടിവെക്കുന്നു, കഴുത്ത് അറക്കുന്നു. ഇവയ്ക്കൊക്കെ ദൈവം നിങ്ങൾക്ക് സമ്മാനങ്ങൾ തരും എന്ന് വിശ്വസിക്കുകയും ചെയ്യുന്നു….

ഇതിലെ അംഗമായ സൈലസ് അത്തരമൊരാളാണ്. ദൈവത്തിനു നന്ദി പറയുകയാണയാൾ, ദൈവത്തിന് വേണ്ടി കൊലകൾ നടത്തിയതിന്….

ബാക്കി വിഷാദശാംശങ്ങൾ കഥയിലൂടെ നൽകാം.

സ്നേഹപൂർവ്വം,
സ്മിത.