ദേവനന്ദ 9 [വില്ലി] 2246

തമാശ എന്നവണ്ണം ദേവുവിനുള്ള ഉപദേശങ്ങൾ കൊടുക്കുന്നതിനിടയിലാണ് ഞാൻ ബാത്‌റൂമിൽ നിന്നിറങ്ങി വരുന്നത്.  അതവരാരും കണ്ടുമില്ല.

” ആ പേടി എനിക്കില്ലാട്ടോ  അമ്മെ…  ഇത്ര നാളായിട്ടും നന്ദുവേട്ടന് ഒരു പെണ്ണിനോട് മിണ്ടണ പോലും ഞാൻ കണ്ടിട്ടില്ല..  പിന്നെ നമ്മുടെ സ്നേഹം കുറഞ്ഞാൽ അല്ലെ നന്ദുവേട്ടൻ വേറൊരാളുടെ സ്നേഹം തേടി പോകൂ..  എനിക്കെന്റെ നന്ദുവേട്ടനെ വിശ്വാസാ…… ”

ജാനമ്മക്ക് മറുപടി കൊടുത്തു ദേവു നേരെ തിരിഞ്ഞത് എന്റെ നേർക്കാണ്.  എന്നെ കണ്ടവൾ ആദ്യം ഒന്നു പതറിയെങ്കിലും അത് പുറത്തു കാട്ടാതിരിക്കാൻ അവൾ പരമാവധി ശ്രമിച്ചു.

” കണ്ടോ മോനെ..  എന്റെ മോൾടെ സ്നേഹം….. ”

എന്നെ കണ്ട് പുറത്തേക്കിറങ്ങി പോകുന്നതിനിടയിൽ ജാനമ്മ പറഞ്ഞു.  മറുപടിയായി ഞാനവരെ നോക്കി ഒന്നു പുഞ്ചിരിച്ചു…

” ഞാൻ ചായ എടുക്കാം…. ”

ജാനമ്മ അഭിമാനത്തോടെ പറഞ്ഞുഅടുക്കളയിലേക്കു നടന്നു.

നാണിച്ചു തല താഴ്ത്തി നിന്ന ദേവുവിനെ ഞാനെന്റെ നെഞ്ചിലേക്ക് വലിച്ചടുപ്പിച്ചു്….

” ആണോടീ….ദേവൂട്ടി .  നിനക്കെന്നെ അത്രയ്ക്ക് ഇഷ്ടം ആണോ??  ”

” അതിപ്പോ എന്താ നിങ്ങൾക് ഇത്ര സംശയം?  ”

ഒരു കൊഞ്ചലോടെ അവൾ ചേർന്ന് നിന്നു ചോദിച്ചു

” നിനക്കെന്നെ അത്രക്ക് വിശ്വാസം ആണോ?  ”

” ആണെകിൽ…?  ”

” എന്നിട്ടാണോ…  കോളേജിൽ ഉണ്ടായിരുന്ന ആ അഞ്ജുവിനോട് മിണ്ടരുതെന്നു നീ പറഞ്ഞത് ….  ”

” അത് പിന്നെ എനിക്ക് ഇഷ്ടം അല്ല ആ പെണ്ണിനെ.  ഒരു വക കെട്ടി കേറിയുള്ള വാർത്താനോം ഒലിപ്പീരും….അത് കൊണ്ടല്ലേ….  ”

” അപ്പോ…  ബാക്കി ഉള്ളതൊടീ…?  അഞ്ചു മാത്രമേ ഒള്ളു…  ആ മീനു…  ചിന്നു…  സാന്ദ്ര.  ഒക്കെ പോട്ടേ സ്റ്റെല്ല മിസ്സിനോട് പോലും മിണ്ടരുതെന്നു പറഞ്ഞില്ലെടീ പട്ടി നീയ്..  എന്നിട്ട് എന്നെ വിശ്വാസം ആണ് പോലും ?  ”

എന്റെ നെഞ്ചിൽ കൈവിരലുകൾ കൊണ്ടു കോറികൊണ്ടവളെന്നെ നോക്കി ചിരിച്ചു.

” അത് പിന്നെ അവരൊന്നും ശെരി അല്ല..  അതോണ്ടാ…  നന്ദുവേട്ടൻ വേറെ ആരോട് മിണ്ടിയാലും എനിക്ക് പ്രശ്നം ഇല്ല.  അവരോടു മിണ്ടുന്നത് എനിക്കിഷ്ടം അല്ല.  ”