ദേവാൻഷ് 6 [മഹി] 333

വീടിനകത്തെ അഴുക്കും പൊടിയും തൂത്തുകളയുന്ന സമയം പുറത്ത് ആക്റ്റീവ വന്നുനിന്ന മുഴക്കം അൻഷ് കേട്ടു….അവൻ തുറന്നുകിടന്ന വാതിലിലൂടെ ഉമ്മറത്തേക്ക് ഇറങ്ങി….

മനുവും ആൽവിനും വണ്ടിയിൽ നിന്നിറങ്ങി…. തലയിൽ കമിഴ്ത്തി വച്ചിരുന്ന ചായ പാത്രം ആൽവിൻ അൻഷിന് നീട്ടി…
“പോയി ഒരു ചായ ഇട്….”

“ഞാൻ നിന്റെ പെണ്ണുമ്പിള്ള ആണോടാ…”
അൻഷ് ആ പാത്രം വാങ്ങി അവന്റെ തലയിൽ അടിച്ചു…ആൽവിൻ തല കുടഞ്ഞു….

ആൽവിനും മനുവും വന്നതോടെ അൻഷിന് ജോലി എളുപ്പമായി….മുറികളും ചുവരുകളും തൂത്തുവൃത്തിയാക്കി, തറ തുടച്ചു…. കരിയില നിറഞ്ഞുകിടന്ന മുറ്റം അടിച്ചുവാരി, വളർന്നുനിന്ന പോച്ചകളും മറ്റും വെട്ടി വൃത്തിയാക്കി, മൂവരും ചേർന്ന് ഉച്ചയോടെ ഏകദേശം പണികളും ഒതുക്കി

ജംഗ്ഷനിൽ പോയി ഫുഡ്‌ കഴിച്ചതിനുശേഷമാണ് ഇരുവരും തിരിച്ചുപോയത്….
.
.
.

ബെഡ്‌റൂമിലേക്ക് കയറിയ അൻഷ് തന്റെ വലിയ ബാഗ് കട്ടിലിൽ വച്ചു, തുറന്നു…..വൃത്തിയായി പൊതിഞ്ഞു വച്ചിരുന്ന ഒരു ഫ്രെയിം ചെയ്ത ചിത്രം പുറത്തെടുത്തു തുറന്നു..
അച്ഛൻ, അമ്മ, ചേച്ചി,…താൻ…. എല്ലാവരും എന്തൊരു ചിരിയാണ്…
അത് പത്തുവർഷങ്ങൾക്ക് മുമ്പ് ചേച്ചിയുടെ വളകാപ്പിന് തങ്ങളെ മാത്രം നിർത്തി എടുത്ത ചിത്രമായിരുന്നു … അവനത് ശ്രദ്ധയോടെ അടുത്തുള്ള ടേബിളിൽ നിവർത്തി വച്ചു….. ഉള്ളം നീറുന്ന ഓർമ്മകളോടെ അവൻ കിടക്ക വിരിക്കാത്ത കട്ടിലിൽ നിവർന്ന് കിടന്നു, കണ്ണുകൾ അടച്ചു….
.
.
.
.

തോരാതെ മഴ പെയ്ത ഒരു രാത്രി….കൈയിൽ ഒരു കത്തിയുമായി ഒരാൾ… രക്തം പരന്നൊഴുകിയ നിലത്ത് താൻ ഒറ്റക്ക്….