അവൾ വാതിൽക്കൽ വന്ന് തല പുറത്തേക്കിട്ട് എന്നെ നോക്കി നിന്നു ഞാൻ അവളെ തിരിഞ്ഞുനോക്കി നടന്നു. കൊറിഡോറിന്റെ അറ്റത്ത് എത്തിയപ്പോൾ ഞാൻ ഉറക്കെ വിളിച്ചു പറഞ്ഞു.
I LOVE YOU…
അവൾ ഒരു നിമിഷം പോലും താമസിക്കാതെ തിരിച്ച് അതിലും ഉച്ചത്തിൽ പറഞ്ഞു.
I LOVE YOU MORE…
ഞാൻ ഓഫീസിൽ പോകുന്ന വഴി, തന്നതാനെ ചിരിച്ചുകൊണ്ട് നടന്നു, എനിക്ക് സന്തോഷം കൊണ്ട് തുള്ളിച്ചാടാൻ തോന്നി.
ഓഫീസിൽ എത്തിക്കഴിഞ്ഞിട്ടും ജോലിയിൽ ശ്രദ്ധിക്കാൻ ഞാൻ നന്നെ പാടുപെട്ടു, എങ്ങനെയെങ്കിലും വൈകുന്നേരം ആയി കിട്ടിയാൽ മതി എന്നൊരു ചിന്ത.
പണ്ട് സ്കൂൾ കഴിഞ്ഞ് വീട്ടിലെത്തി കാർട്ടൂൺ കാണാൻ വെമ്പി നിൽക്കുന്ന അതേ അവസ്ഥ.
വീക്കേൻഡിൽ ഓവർടൈം ചെയ്യാം എന്ന് വിചാരിച്ചിരുന്നതാ, അത് വേണ്ട എന്ന് വെച്ചു. ഭാഗ്യത്തിന് ഞാൻ നേരത്തെ എന്റെ പേര് അതിന് എഴുതിയിട്ടില്ല.
ഇടയ്ക്ക് അവളെ വിളിച്ചു നോക്കണം എന്നുണ്ടായിരുന്നു പിന്നെ വിചാരിച്ചു അവൾ ഇത്രയും യാത്ര ചെയ്ത് ക്ഷീണിച്ചു വന്നതല്ലേ റസ്റ്റ് എടുക്കട്ടെ എന്ന്.
ഞാൻ ജോലി കഴിഞ്ഞ് വേഗം ഇറങ്ങി നടന്നു. പോകുന്ന വഴി ഒരു ഫ്ലവർ ഷോപ്പിൽ കേറി മൂന്ന് നാല് കളറിൽ ഉള്ള റോസാപ്പൂക്കൾ എടുത്ത് അതിന്റെ നടുവിൽ വലിയൊരു ചുവന്ന റോസാപ്പൂവും വെച്ച് വാങ്ങി, ഫ്ലവർ ഷോപ്പിലെ പെൺകുട്ടി അത് വളരെ മനോഹരമായി പൊതിഞ്ഞ് തന്നു.
ഞാൻ അതുമായി വേഗം വീട്ടിലേക്ക് നടന്നു. എനിക്ക് ഇത് കുറച്ച് ക്രിഞ്ജ് ആയി തോന്നി, ഞാനിതൊക്കെ സിനിമയിൽ മാത്രമേ കണ്ടിട്ടുള്ളൂ, അവൾക്ക് ഇഷ്ടമാകുമോ എന്നും അറിയില്ല. എങ്കിലും അവളുടെ പ്രതികരണം എന്തായിരിക്കും എന്ന് മനസ്സിൽ ആലോചിച്ച് ചിരിച്ചുകൊണ്ട് നടന്നു.
