ജീവന്റെ അമൃതവർഷം 5 [ഏകൻ] 160

“നീ വരുമ്പോൾ ഒരു പ്രഗ്നൻസി കിറ്റ് വാങ്ങി വരുമോ? ആരും അറിയരുത്..?”

“എന്താടി… നീ എന്താ പറഞ്ഞത് പ്രഗ്നൻസി കിറ്റോ? ആർക്കാണ്.? നിന്റെ ചേച്ചിക്കാണോ ? ചേച്ചി നാട്ടിൽ വന്നോ? ”

“നീ ഇങ്ങനെ കൂടുതൽ കാര്യങ്ങൾ ചോദിക്കല്ലേ? ഞാൻ എല്ലാം പറയാം. നീ വേഗം വാ. നീ വന്നിട്ട് അമ്മയോട് നമ്മുടെ കുറച്ചു കൂട്ടുകാർ നിന്റെ വീട്ടിൽ വരുന്നുണ്ടെന്ന് പറയണം. അതുകൊണ്ട് എന്നെ കൂട്ടുവാൻ വന്നതാണെന്ന് പറയണം. അല്ലാതെ അമ്മ എന്നെ പുറത്തേക്ക് വിടില്ല. ”

“നീ എന്തൊക്കെയാ ഈ പറയുന്നത് ? എനിക്ക് ഒന്നും മനസ്സിലാവുന്നില്ല. എന്തിനാണ് ഇങ്ങനെയൊക്കെ?”

“എല്ലാം ഞാൻ പറയാം എന്ന് പറഞ്ഞില്ലേ? പ്ലീസ് ഡി എന്നോട് ഇപ്പോൾ ഒന്നും ചോദിക്കല്ലേ. ”

“ശരി… ശരി.. ഞാൻ ഒന്നും ചോദിക്കുന്നില്ല. ഞാൻ വേഗം വരാം”

അങ്ങനെ ഞാൻ അവൾ വരുന്നതിനു വേണ്ടി കാത്തിരുന്നു. ഞാൻ അമ്മയോട് പോയി പറഞ്ഞു.

” അമ്മേ അമ്മേ.. ഞങ്ങളുടെ കുറച്ചു കൂട്ടുകാർ ആര്യയുടെ വീട്ടിൽ വരുന്നുണ്ട്. അവളുടെ കല്യാണത്തിന് വരാൻ പറ്റാത്തത് കൊണ്ട്. വരുന്നതാ. എനിക്കും പോകണം. ഞാൻ പോയിക്കോട്ടെ? ”

“എന്റെ പൊന്നുമോള് ഇപ്പോൾ എവിടേയും പോകേണ്ട. ഒന്ന് തല കറങ്ങി വീണതാ.. ഇനിയും നീ എവിടെയെങ്കിലും തല കറങ്ങി വീണാലോ”

“ഇല്ല അമ്മേ ഞാൻ ഇനി എവിടേയും വീഴില്ല. അമ്മ കുറച്ചു ഉപ്പ് ഇട്ട് വെള്ളം തന്നാൽ മതി. പ്ലീസ് അമ്മേ.. പ്ലീസ് പ്ലീസ്. ആര്യ കാറെടുത്തു എന്നെ കൂട്ടുവാൻ വരാം എന്ന് പറഞ്ഞിട്ടുണ്ട്. “