ജീവന്റെ അമൃതവർഷം 5 [ഏകൻ] 160

“ശരി അങ്ങനെ ആണെങ്കിൽ പോയിക്കോ. പക്ഷെ വേഗം വരണം. നീ വരുന്നത് വരെ എനിക്ക് ഒരു സമാധാനവും കിട്ടില്ല.”

അമ്മ അങ്ങനെ പറഞ്ഞ ഉടനെ ഞാൻ റൂമിലേക്ക് പോയി വേഷം മാറി. അപ്പോഴേക്കും അമ്മ ഉപ്പിട്ട നാരങ്ങ വെള്ളം കൊണ്ട് വന്നു തന്നു.

അതും കുടിച്ചു ഇരിക്കുമ്പോൾ ആര്യ വന്നു. ഞാൻ പറഞ്ഞു കൊടുത്ത പോലെ അവൾ അമ്മയോട് പറഞ്ഞു. അങ്ങനെ ഞാനും അവളും എന്റെ വീട്ടിൽ നിന്നും ഇറങ്ങി.

“എന്ത് കോലമാണെടി ഇത്. നീ ആകെ ക്ഷീണിച്ചു പോയല്ലോ? ഇങ്ങനെയും ഉണ്ടോ? ചേച്ചിയുടെ കല്യാണം കഴിഞ്ഞെന്നു വെച്ചു. ”

“അതൊക്കെ പിന്നെ പറയാം . ആദ്യം ഞാൻ പറഞ്ഞ സാധനം വാങ്ങിയോ അത് പറ.?”

“അതൊക്കെ വാങ്ങി. അത് ആർക്കാണെന്നു നീ പറഞ്ഞില്ലല്ലോ? നിനക്ക് തന്നെ ആണോടി. നീ അന്ന് പറഞ്ഞ സീക്രെട് ആള് പണി പറ്റിച്ചതാണോ?” ചിരിച്ചുകൊണ്ട് ആര്യ ചോദിച്ചു.

“നീ ഒന്ന് വെറുതെ ഇരി ആര്യ. ഞാൻ എല്ലാം പറയാം എന്ന് പറഞ്ഞില്ലേ.. ”

പിന്നെ അവളും ഞാനും ഒന്നും മിണ്ടിയില്ല. ഞങ്ങൾ അവളുടെ വീട്ടിൽ എത്തി. അവളുടെ അച്ഛനെയും അമ്മയേയും കണ്ടു കുറച്ചു സമയം സംസാരിച്ച ശേഷം അവളേയും കൂട്ടി നേരെ അവളുടെ മുറിയിലേക്ക് കയറി.

“എടി സാധനം താ..” ഞാൻ അവളോട് പറഞ്ഞു.

“അപ്പോൾ നിനക്ക് തന്നെ ആയിരുന്നല്ലേ ? എടി ഇത് എങ്ങനെ പറ്റി.? ആരാ ആള്? ” ആര്യ ചോദിച്ചു. ഞാൻ അവളെ കെട്ടിപിടിച്ചു കരഞ്ഞു.

പിന്നെ അവളുടെ കൈയിൽ നിന്നും കിറ്റ് വാങ്ങി വേഗം അവളുടെ മുറിയിലുള്ള ബാത്‌റൂമിൽ കയറി പ്രഗ്നൻസി കിറ്റ് എടുത്തു ടെസ്റ്റ്‌ ചെയ്തു. അതിൽ നോക്കി നിന്നു. എനിക്ക് വീണ്ടും തല കറങ്ങുന്നത് പോലെ തോന്നി. അതേ ഞാൻ ഒരു അമ്മയാകാൻ പോകുന്നു. ജീവേട്ടൻ അച്ഛനും. എനിക്ക് ഒരേ സമയം സന്തോഷവും സങ്കടവും തോന്നി. ഈ വിവരം. ഞാൻ ഒരു അമ്മയാകാൻ പോകുന്നത് പക്ഷെ ആരോടും പറയാൻ പറ്റില്ലല്ലോ.