ജോജോയുടെ ഓജോ [ആനീ] 98

 

​”ഈ കാട്ടിൽ ഇത് എവിടെ പോയെന്നാണ് താരയ്ക്ക് തോന്നുന്നത്?”

 

തന്റെ നോട്ടം പതുക്കെ അവളുടെ മുഖത്തേക്ക് മാറ്റി ചാച്ചാജി ഗൗരവം നടിച്ചു ചോദിച്ചു.

 

​”എനിക്കറിയില്ല ക്യാപ്റ്റൻ… ആ ബലൂണിൽ വെച്ചാണോ അതോ ഇവിടെ എവിടെയെങ്കിലുമാണോ എന്ന് ഒരു നിശ്ചയവുമില്ല. ഇനിയിപ്പോൾ ആർക്കെങ്കിലും കിട്ടിക്കാണുമോ ആവോ?”

 

താരയുടെ ശബ്ദം സങ്കടം കൊണ്ട് ഇടറുന്നുണ്ടായിരുന്നു.

 

​”എല്ലാത്തിനും ഒരു വഴിയുണ്ടാക്കാം കൊച്ച് വിഷമിക്കണ്ട. പോയ സാധനം തിരിച്ചു വരാൻ ചില പ്രത്യേക വഴികളുണ്ട്.”

 

അയാൾ ഒരു കള്ളച്ചിരിയോടെ പറഞ്ഞു.

 

​”മ്മ്…”

 

താര ഒന്ന് മൂളി.

 

​”താരേ… ഇനി ആ അരഞ്ഞാണം കിട്ടാൻ എന്റെ അറിവിൽ ഒറ്റ വഴിയേ ഉള്ളൂ. അത് നമുക്കൊന്ന് നോക്കിയാലോ?”

 

ചാച്ചാജി മുന്നിലേക്ക് അല്പം ആഞ്ഞുനിന്നു.

 

​”എങ്ങനെ?”

 

അവൾ ആകാംക്ഷയോടെ ചോദിച്ചു.

 

​”താരയ്ക്ക് ഈ ‘ഓജോ ബോർഡിൽ’ വിശ്വാസമുണ്ടോ? ആത്മാക്കളെ വിളിച്ച് ചോദിച്ചാൽ പോയ സാധനം എവിടെയുണ്ടെന്ന് അവർ പറഞ്ഞുതരും.”

 

​അതുകേട്ടതും താരയ്ക്ക് ദേഷ്യമാണ് വന്നത്.

 

“ശോ! ഈ പാതിരാത്രിയിൽ ഇമ്മാതിരി മണ്ടത്തരം പറയല്ലേ ക്യാപ്റ്റൻ! എനിക്ക് അങ്ങനെയുള്ള കാര്യങ്ങളിലൊന്നും ഒരു വിശ്വാസവുമില്ല.”

 

​”മണ്ടത്തരമല്ല ടീച്ചറെ,”

 

ജോജോ പെട്ടെന്ന് ഇടപെട്ടു.

 

“ഈ കാട്ടിലൊക്കെ ഇത്തരം സംഗതികൾ ഫലിക്കാറുണ്ട്. ഈ ചാച്ചാജിക്ക് അതൊക്കെ വശമുള്ള കാര്യമാ. ഒന്ന് പരീക്ഷിച്ചു നോക്കുന്നതിൽ എന്താ തെറ്റ്? ചിലപ്പോൾ ആ അരഞ്ഞാണം എവിടെയാണെന്ന് നമുക്ക് മനസ്സിലാക്കാൻ പറ്റിയാലോ?”