അത് കേട്ടതും ഞാൻ ശരിക്കും ഒന്ന് പരുങ്ങി. അറിഞ്ഞുകൊണ്ട് തന്നെ എന്റെ വിരലുകൾ ചുണ്ടിലെ ആ ചെറിയ മുറിപ്പാടിലേക്ക് നീണ്ടു.
ഇന്നലെ… അവൾ പെട്ടെന്ന് എന്റെ മേലേക്ക് വീണതും, അവളുടെ ആ മൃദുവായ ചുണ്ടുകൾ എന്റെ ചുണ്ടുകളിൽ അമർന്നതും… ഓർക്കുമ്പോൾ തന്നെ എന്റെ ഉള്ളിലൂടെ ഒരു മിന്നൽ കടന്നുപോയി. ചോര പൊടിയുന്ന ആ ചെറിയ വേദനയിലും എനിക്ക് വല്ലാത്തൊരു ഇക്കിളിയാണ് തോന്നുന്നത്.
കാര്യമായിട്ടൊന്നും ഇല്ലെങ്കിലും അവളുടെ ആ നോട്ടവും സ്പർശനവും എന്നെ വല്ലാതെ മയക്കുന്നുണ്ട്. ഓർമ്മകൾ വന്നതും ഞാൻ അറിയാതെ ഒന്ന് പുഞ്ചിരിച്ചു പോയി.
”ദേ… ദേ… ചെറുക്കൻ നാണിക്കുന്നത് കണ്ടോ!”
കിരൺ ഉറക്കെ ചിരിച്ചുകൊണ്ട് ആ പയ്യനെ നോക്കി പറഞ്ഞു.
“പെണ്ണ് ഇവനെ വല്ലാതെ മയക്കിക്കളഞ്ഞെടാ… എപ്പോഴാടാ അവളെ ഞങ്ങൾക്ക് ഒന്ന് പരിചയപ്പെടുത്തി തരുന്നത്?”
”അത്… അത് പിന്നെ…”
എന്ത് പറയണമെന്നറിയാതെ ഞാൻ കുറച്ചുനേരം നിന്നു വിക്കി. അവൾക്കിതൊക്കെ ഇഷ്ട്ടമാവുമോ എന്നതായിരുന്നു പ്രധാന പ്രശ്നം…. എന്നോടിതുവരെ ദേഷ്യപ്പെട്ടിട്ടില്ലെങ്കിലും അമ്മ പറഞ്ഞു തന്ന അറിവ് വച്ച് അവൾക്ക് ദേഷ്യം കുറച്ച് കൂടുതലാണ്…..
ഞാൻ വേഗം മുഖത്തെ ചിരി മാറ്റി ഗൗരവം നടിക്കാൻ ശ്രമിച്ചു.
”പോടാ അവിടുന്ന്…സമയം വരുമ്പോൾ ഞാൻ പരിചയപ്പെടുത്തി തന്നോളം. ഇപ്പോൾ നീ ഈ വന്ന സ്റ്റോക്ക് മുഴുവൻ അടുക്കി വെക്കാൻ നോക്ക്.”
ഞാൻ വേഗം മറ്റൊരു ബോക്സ് എടുത്ത് വിഷയം മാറ്റാൻ നോക്കി.
