മന്ദാരക്കനവ് 10 [Aegon Targaryen] 3347

 

“ഇന്നാ ഇതിലുണ്ട് നീ എടുത്തോ…” ലിയ അവൻ്റെ നേരെ ബാഗ് നീട്ടിക്കൊണ് പറഞ്ഞു.

 

ആര്യൻ അവളുടെ കൈയിൽ നിന്നും ബാഗ് വാങ്ങിയ ശേഷം അതിൽ നിന്നും ഫോൺ എടുത്തു.

 

“ശമ്പളം കിട്ടിയ വിവരം പറയാനാണോടാ…?” ലിയ തന്നെ വീണ്ടും ചോദിച്ചു.

 

“അതും പിന്നെ ഞാൻ ഇന്ന് ചെല്ലുന്ന കാര്യം കൂടി പറയണം…” ആര്യൻ പുഞ്ചിരിച്ചു.

 

“ഉം…ശരി നീ പോയി വിളിച്ചോ ഞാൻ ഇപ്പൊ ഫ്രീ ആകും…” എന്ന് പറഞ്ഞിട്ട് ലിയ അവളുടെ ജോലി തുടർന്നു. ആര്യൻ അകത്തേക്കും പോയി.

 

അവൻ അമ്മയെ വിളിച്ചിട്ട് ആദ്യം തന്നെ ശമ്പളം കിട്ടിയ വാർത്ത അറിയിച്ചു. ശേഷം ഇന്ന് വരുമെന്ന കാര്യവും അവൻ അമ്മയോട് പറഞ്ഞു. പിന്നീട് അമ്മയുടെ സുഖവിവരങ്ങൾ എല്ലാം പതിവ് പോലെ അന്വേഷിച്ച ശേഷം അവൻ ഫോൺ കട്ടാക്കിയിട്ട് അത് തിരികെ കൊണ്ടുപോയി ലിയയുടെ ബാഗിൽ വച്ചു. അപ്പോഴേക്കും ലിയയുടെ പണികൾ എല്ലാം കഴിഞ്ഞിരുന്നു. അവൻ അവളുടെ അരികിൽ തന്നെ ഇരുന്നു.

 

“അമ്മ എന്ത് പറഞ്ഞെടാ…?” അവൾ അറിയാനുള്ള ആകാംക്ഷ കാട്ടി.

 

“വരുന്ന കാര്യം പറഞ്ഞപ്പോൾ ഒരുപാട് സന്തോഷമായി…നാളെ അവധി ആയതുകൊണ്ട് വരുമെന്ന് പ്രതീക്ഷിച്ച് ഇരിക്കുവായിരുന്നത്രെ…” ആര്യൻ പറഞ്ഞു.

 

“ആഹാ…ശമ്പളം കിട്ടിയ കാര്യം പറഞ്ഞോ…?” അവൾ വീണ്ടും ചോദിച്ചു.

 

“ഉം പറഞ്ഞു…ഒന്നും വാങ്ങിക്കാൻ നിന്ന് പൈസ ചിലവാക്കേണ്ടാ എന്ന് പ്രത്യേകം പറഞ്ഞു…” ആര്യൻ ചിരിച്ചു.

 

“ഹഹ…പാവം…ആട്ടേ അപ്പൊ നീ ഒന്നും വാങ്ങുന്നില്ലേ…?” ലിയയുടെ അടുത്ത ചോദ്യം.

 

“സ്ഥിരമായിട്ടുള്ള ജോലിയിൽ കിട്ടിയ ആദ്യത്തെ ശമ്പളം അല്ലേ ചേച്ചീ…എന്തെങ്കിലും വാങ്ങണം…” അവൻ പറഞ്ഞു.

 

“അതേ…ഒരു സാരി എടുത്ത് കൊടുക്ക്…” ലിയ അവളുടെ അഭിപ്രായം അറിയിച്ചു.

 

“ഒരു സെറ്റും മുണ്ടും എടുത്ത് കൊടുക്കാമെന്നാണ് ഞാനും വിചാരിക്കുന്നത്…” ആര്യനും അവളുടെ അഭിപ്രായത്തോട് യോജിക്കുന്ന രീതിയിൽ പറഞ്ഞു.

 

“ഉം അത് മതി എങ്കിൽ…” അവൾ അതിന് പിന്തുണ അറിയിച്ചു.

 

“ചേച്ചിക്ക് എന്താ വേണ്ടത്…?” ആര്യൻ ചോദിച്ചു.