മൂടൽ മഞ്ഞ് 1 [ലസ്റ്റർ] 173

അവളുടെ പരിഹാസം കേട്ടില്ലെന്ന് നടിച്ചു പ്രകൃതിയുടെ മനോഹാരിതകള്‍ ആസ്വദിച്ചു വാഹിദ് അതിവേഗം വണ്ടിയൊടിച്ചു. ഡ്രൈവിംഗ് ഒരു മനോഹരമായ മായാജാലമാണെന്ന് അവന്റെ ഡ്രൈവിംഗ് കണ്ടപ്പോള്‍ ഒക്കെ അവള്‍ക്ക് തോന്നിയിരുന്നു.  അല്‍പ്പം പോലും യാത്രക്കാരനെ അലോസരപ്പെടുത്താതെ, വണ്ടിയെ പീഡിപ്പിക്കാത, മറ്റു വാഹന യാത്രക്കാരെ പരീക്ഷിക്കാതെ, ട്രാക്ക് മാറ്റിയും ഓവര്‍റ്റേക്ക് ചെയ്തും അവന്‍ ഡ്രൈവ് ചെയ്യുമ്പോള്‍,

വളവില്‍ ഒട്ടും വേഗം കുറക്കാത്തത് പോലെ തോന്നിപ്പിക്കുന്ന രീതിയില്‍ വണ്ടിയെ വളച്ചെടുക്കുമ്പോള്‍,  സുഖകരമായി വണ്ടി ഒന്ന് ചരിച്ച് നിവര്‍ത്തി അവന്‍ തന്റെ ജോലി മനോഹരമായി ആസ്വദിക്കുന്നത് കാണുമ്പോള്‍, അവള്‍ക്ക് സ്വയം ഡ്രൈവ് ചെയ്താലോ എന്ന് തോന്നാറുണ്ട്.

‘തന്നെ ആരാ ഡ്രൈവ് ചെയ്യാന്‍ പഠിപ്പിച്ചത്.’ അവള്‍ മുഖം അവനില്‍ നിന്ന് മറച്ചു പിടിക്കാന്‍ പുറത്തേക്ക് നോക്കികൊണ്ട് ചോദിച്ചു. അവനത് കേട്ടതായി നടിച്ചില്ല. കുറച്ച് മുന്നോട്ട് പോയപ്പോള്‍ രണ്ട് പേര് കൈകാണിക്കുന്നത് കണ്ടു അവന്‍ വണ്ടി അവരുടെ സമീപം കൊണ്ട് ചെന്ന് നിര്‍ത്തി. വിദേശ ദമ്പതികള്‍ എന്ന് തോന്നിപ്പിക്കുന്ന രണ്ട് പേര്. നാടുകാണാന്‍ ഇറങ്ങിയ ടൂറിസ്റ്റുകള്‍ ആയിരിക്കണം. അവള്‍ക്ക് ഉള്ളിലൊരു കൗതുകം ജനിച്ചു. ഈ അഹങ്കാരിയെ പരിഹസിക്കാന്‍, അവന്റെ അഹന്ത ഒന്ന് കുറക്കാന്‍ അവനായിട്ട് തന്നെ ഒരു അവസരം ഉണ്ടാക്കി തന്നു.

അവരുടെ ചോദ്യങ്ങള്‍ക്ക് തപ്പിത്തടഞ്ഞു ലിഴഹശവെ സംസാരിക്കുന്നത് മനസ്സില്‍ കണ്ട ശാരിക അറിയാതെ ഒന്ന് ചിരിച്ചു പോയി. പക്ഷേ നല്ല ഒഴുക്കുള്ള ഇംഗ്ലീഷില്‍ ആ അപരിചിതരോട് സംവദിക്കുന്ന വാഹിദിനെ കണ്ട് അവള്‍ ഞെട്ടി. കാര്യങ്ങള്‍ പറയുക മാത്രമല്ല, അവരെ ഒരുപാട് കാലം അറിയുന്ന ഒരു സുഹൃത്തിനെ പോലെ, അവന്‍ കുശലന്വേഷണം നടത്തുകയും ഞങ്ങടെ നാടിനെ കുറിച്ച് വീമ്പു പറയുകയും, തമാശകള്‍ പറഞ്ഞു ചിരിക്കുകയും ചെയ്യുന്നു. മുമ്പ് ടൂറിസ്റ്റ് ഗെയ്ഡ് ആയിട്ട് ജോലി നോക്കിയിരിക്കും, അവള്‍ ചിന്തിച്ചു.