ഒരു ഇലക്ഷന്‍ ഡ്യൂട്ടി അപാരത 3 [Vijay Das] 1570

അപ്പോഴേക്കും BLO വന്നു. അതാത് ബൂത്തില്‍ നിന്ന് പഞ്ചായത്ത് വഴി തെരെഞ്ഞെടുക്കുന്ന സ്ഥലവും വോട്ടര്‍മാരെയുമൊക്കെ പരിചയമുള്ള ആളാണ്‍ Booth Level Officer – BLO. വോട്ടര്‍മാര്‍ക്ക് സ്ലിപ് കൊടുക്കുക, പോളിങ്ങിനിടയില്‍ വോട്ടര്‍മാരെപ്പറ്റി സംശയം വന്നാല്‍ തീര്‍ക്കുക മുതലായവയെല്ലാം പ്രദേശത്തുകാരായ BLOമാരാണ്. അവര്‍ പോളിങ് ടീമിന്‍റെ ഭാഗമൊന്നുമല്ല, അതുകൊണ്ട് ഇവിടെ താമസിക്കേമില്ല. പോളിങ് നടക്കുമ്പോള്‍ മറ്റൊരു റൂമില്‍ അവര്‍ ഉണ്ടാവും സ്ലിപ് കൊടുക്കാനും മറ്റും. തലേന്ന് തന്നെ നോക്കി വയ്ക്കേണ്ട ചില പ്രശ്നവോട്ടുകളുമുണ്ട്.

വന്ന BLO ഒരു സ്ത്രീയാണ്. ഒരു പത്തമ്പത് വയസ്സ് പ്രായം വരും. പേര് രമണി. ജാഡ എന്നു പറയാമോ എന്നറിയില്ലെങ്കിലും ചെറിയ ഒരു കുറുമ്പിന്‍റെ ഭാവം മുഖത്തുണ്ട്. വന്ന പാടെ ഗൌരവത്തില്‍ വോട്ടര്‍ പട്ടികയിലെ പല കാര്യങ്ങളും പറഞ്ഞ് അതിന്‍ ഉണ്ടാക്കേണ്ട പട്ടികകളും ഫോമുകളും ഒക്കെ ചോദിക്കാന്‍ തുടങ്ങി. അങ്ങനെ വിട്ടാല്‍ പറ്റില്ലല്ലോ. ഞാന്‍ പറഞ്ഞു. “ഹ സമയമുണ്ടല്ലോ ചേച്ചി, അല്ല എന്താ പേര്‍ പറഞ്ഞത്…?
“രമണി സുകുമാരന്‍”

“ങാ മരണിച്ചേച്ചി…”
എന്നു പറഞ്ഞതോടുകൂടി അവിടെയുണ്ടായിരുന്ന ലക്ഷ്മിയും മൃദുലയും ഹോം ഗാര്‍ഡും വരെ പൊട്ടിച്ചിരി തുടങ്ങി, ചേച്ചി അങ്ങ് ഇല്യാണ്ടായി എന്ന് പറഞ്ഞാ മതിയല്ലോ. അതുവരെ ഉണ്ടാക്കിവെച്ച ഗൌരവമൊക്കെ പോയില്ലേ? ഞാന്‍ വേഗം പറഞ്ഞു “അയ്യോ ദേഷ്യപ്പെടണ്ട കേട്ടോ രമണിച്ചേച്ചി, ഞാന്‍ ഭരണിച്ചേച്ചി എന്നല്ല മരണിച്ചേച്ചി എന്നാ പറഞ്ഞത്, അക്ഷരം മാറിപ്പോയതാണേ…” അതോടെ പൊട്ടിച്ചിരി കൂടി പൊട്ടിപ്പൊട്ടിച്ചിരിയായി, രമണിച്ചേച്ചി പാവം മുഖമൊക്കെ ചുവന്നു. പ്രിസൈഡിങ് ഓഫീസറല്ലെ, ഒന്നും പറയാനും പറ്റില്ലല്ലോ.
“സാര്‍ ആ ഫോം തന്നാല്‍ എനിക്ക് പണി തുടങ്ങാമായിരുന്നു.”
“അയ്യോ പെണങ്ങിപ്പോവല്ലേ, അല്ലെങ്കിലും ഇത്ര മെലിഞ്ഞ് കൊലുന്നനെ സുന്ദരിയായിരിക്കുന്ന ചേച്ചിയെ ഭരണിച്ചേച്ചി എന്നൊക്കെ വിളിക്കാന്‍ ആര്‍ക്കെങ്കിലും മനസ്സുവരുവോ എന്‍റെ ചേച്ചി. ദേ ചായ ഇപ്പൊ വരും. നമുക്ക് ചായയൊക്കെ കുടിച്ച് വര്‍ത്തമാനമൊക്കെ പറഞ്ഞ് ഫോമൊക്കെ ഫില്‍ ചെയ്യാം.”
ലക്ഷ്മിയും മൃദുലയും ചിരി അമര്‍ത്തിക്കൊണ്ട് മിണ്ടാതെ അവരുടെ ജോലി നോക്കാന്‍ തുടങ്ങി. ഞാന്‍ ചേച്ചിയുടെ അടുത്തേക്ക് ചാഞ്ഞ് പതിഞ്ഞ ശബ്ദത്തില്‍ പറഞ്ഞു “അല്ല ഇനി ചേച്ചീന്നു വിളിക്കുന്നതുകൊണ്ടാണ് ദേഷ്യമെങ്കില്‍ നമുക്കത് മാറ്റാം കേട്ടോ. വല്ല കുട്ടീന്നോ മോളൂന്നൊക്കെ വിളിക്കാന്‍ എനിക്കൊരു വിരോധോമില്ലേ…” ഞാന്‍ ചളി അടിച്ചുകൊണ്ടേ ഇരുന്നു.
ആള്‍ കടലാസൊക്കെ എടുത്ത് പോകാന്‍ തുടങ്ങിയപ്പൊ ഞാന്‍ ഫോമൊക്കെ എടുത്ത് ആളെ അപ്പുറത്തെ BLOക്കുള്ള മുറി കാണിച്ചുകൊടുത്ത് സെറ്റാക്കി വിട്ടു. എന്നിട്ടും ആളങ്ങ് വിട്ടു തരുന്നില്ല.