പണി 9 [ആനീ] 275

​

​ബസ്സിനടുത്തെത്തിയ നിരഞ്ജൻ ഒന്ന് ഞെട്ടി. ആ ബസ്സിന്റെ മുൻഭാഗം പൂർണ്ണമായും തകർന്ന് വികൃതമായി കിടക്കുകയാണ്. വെറുമൊരു തുരുമ്പെടുക്കൽ മാത്രമല്ല അത്, വലിയൊരു അപകടത്തിന്റെ ബാക്കിപത്രമാണെന്ന് കണ്ടാലേ അറിയാം. നിരഞ്ജൻ തന്റെ കൂടെയുണ്ടായിരുന്ന ഡ്യൂട്ടിയിലുള്ള പോലീസുകാരനെ നോക്കി ചോദിച്ചു:

​”ഇതെന്താ ഈ ബസ്സിന്റെ മുൻഭാഗം ഇങ്ങനെ തകർന്നു കിടക്കുന്നത്? ആ ബലാത്സംഗ കേസ് നടന്നപ്പോൾ ഇത് ഇങ്ങനെയായിരുന്നില്ലല്ലോ?”

​ആ പോലീസുകാരൻ ഒരു സിഗരറ്റ് കത്തിച്ച് ബസ്സിനെ നോക്കി ഒന്ന് ദീർഘശ്വാസമടുത്തു. എന്നിട്ട് ആ രഹസ്യം വിവരിക്കാൻ തുടങ്ങി:

​”സാർ, ഈ ബസ്സിന് പിന്നിൽ മറ്റൊരു കഥ കൂടിയുണ്ട്. ആ ക്രൂരത നടന്ന് ഏകദേശം മൂന്ന് മാസം കഴിഞ്ഞപ്പോൾ, അന്ന് ഇത് പാർക്ക് ചെയ്തിരുന്ന സ്റ്റേഷൻ ഗ്രൗണ്ടിൽ നിന്നും ഈ വണ്ടി മോഷണം പോയി. ആരെങ്കിലും ഈ തുരുമ്പ് പെട്ടി മോഷ്ടിക്കുമെന്ന് ഞങ്ങൾ കരുതിയില്ല.”

​നിരഞ്ജൻ നെറ്റി ചുളിച്ചു.

“മോഷണം പോയെന്നോ? എന്നിട്ട്?”

​”അതെ സാർ. വണ്ടി മോഷ്ടിച്ച ആൾ പാതിരാത്രി ഇത് സിറ്റിയിലൂടെ ഓടിച്ചു പോയി. പക്ഷേ നിയന്ത്രണം വിട്ട ബസ് നേരെ ഇടിച്ചു കയറിയത് അവിടുത്തെ ഒരു ബോയ്‌സ് ഹോസ്റ്റലിലേക്കാണ് . വലിയൊരു ശബ്ദത്തോടെ ഹോസ്റ്റലിന്റെ മതിൽ തകർത്ത് അകത്തേക്ക് കയറി ഹോസ്റ്റലിന്റെ മുൻ ഭാഗം തകർത്തു . വിവരം അറിഞ്ഞ് ഞങ്ങൾ അവിടെ എത്തിയപ്പോഴേക്കും ആ കള്ളൻ അവിടുന്ന് രക്ഷപ്പെട്ടിരുന്നു. അവനെ പിടിക്കാൻ പറ്റിയില്ല. ആ ഇടിയിലാണ് ഈ ബസ്സിന്റെ മുൻഭാഗം ഇങ്ങനെ തകർന്നു പോയത്.”