പൈനാപ്പിൾ ലൈം ജ്യൂസ്‌ 1 [ഒറ്റയ്ക്ക് വഴിവെട്ടി വന്നവൻ] 175

 

അടുക്കളയിൽ നിന്നും നനഞ്ഞ ഷർട്ടും ഒട്ടിപ്പിടിച്ച ശരീരവുമായി ഞാൻ പതുക്കെ പുറത്തേക്ക് ഇറങ്ങി.

 

ഹാളിൽ എത്തിയതും എല്ലാവരുടെയും ശ്രദ്ധ എന്നിലേക്കായി.

 

ആ ചുവരുകൾക്കിടയിൽ നനഞ്ഞു കുതിർന്നു നിൽക്കുന്ന എന്നെ കണ്ടാൽ ശരിക്കും ഒരു ‘പുഴയിൽ വീണ പഴുത്ത ചക്ക ‘ തന്നെ!

 

 

അളിയന്റെ ഭാര്യ അതായത് ​എന്റെ ചേച്ചി ഗ്ലാസിലെ ജ്യൂസ് പകുതി കുടിച്ചു തീർക്കുന്നതിനിടയിലാണ് എന്നെ കണ്ടത്.

 

കണ്ട പാടെ ചേച്ചി വായിലിരുന്ന ജ്യൂസ് ‘ഫൗണ്ടൻ’ പോലെ പുറത്തേക്ക് തെറിച്ചു.

 

​”ഇതെന്താടാ… നീ വീടിന്റെ ഉള്ളിൽ നീന്താൻ പഠിക്കുവാണോ?”

 

ചേച്ചി ചിരിച്ചു കൊണ്ട് ചോദിച്ചു.

 

​ചുറ്റും നിന്ന ബന്ധുക്കളും നാട്ടുകാരും ചിരി തുടങ്ങി.

 

എന്റെ കഷ്ടകാലത്തിന് ആ സമയത്താണ് അനു അവിടേക്ക് പുറത്തുനിന്നു ഒരു പ്ലേറ്റ് മിക്സ്ചറുമായി വന്നത്. എന്നെ കണ്ടതും അവൾ അത്ഭുതം നടിച്ചു കൊണ്ട് കൈകൾ കവിളിൽ വെച്ചു.

 

 

​”അയ്യോ.. ഇതെന്താ പൈപ്പിന് വെള്ളം കുടിക്കാൻ പോയതാണോ?”

 

 

​അവളുടെ ആ നിഷ്കളങ്കമായ ചോദ്യം കേട്ടതോടെ ഹാളിൽ ചിരിപ്പൂരം തന്നെ നടന്നു.

 

ചിലർ കൈകൊട്ടി ചിരിക്കുന്നു, ചിലർ എന്നെ നോക്കി സഹതപിക്കുന്നു.

 

​ഞാൻ ദേഷ്യം കടിച്ചുപിടിച്ചു കൊണ്ട് അനുവിനെ ഒന്ന് നോക്കി.

 

അവളുടെ ആ ഉരുണ്ട കണ്ണുകളിൽ ഒരു വിജയചിരി തിളങ്ങുന്നുണ്ട്. അവൾ മെല്ലെ എന്റെ അടുത്തേക്ക് വന്നിട്ട് എല്ലാവരും കേൾക്കെ പറഞ്ഞു:

 

 

​”സാരമില്ല കേട്ടോ.. മൂപ്പർക്ക് നമ്മുടെ വീടിന്റെ ഡിസൈൻ അത്രക്ക് ഇഷ്ടപ്പെട്ടു. സിലിംഗിലെ ആ പൂക്കൾക്ക് വെള്ളമൊഴിക്കാൻ പോയതാവും പാവം!ഹഹഹ”