പ്രഹേളിക [Ne-Na] 2288

നവീനും അതിനെ കുറിച്ച് ബോധവാനായിരുന്നു.

താഴ്ന്ന സ്വരത്തിൽ അവൻ പറഞ്ഞു.

“നമ്മൾ ഇത് വളരെമുമ്പു തന്നെ വീട്ടിൽ പറയേണ്ടതായിരുന്നു.”

കാവ്യയുടെ കൈ ഗിയറിലിരുന്ന നവീന്റെ കൈത്തണ്ടയിൽ മുറുകി.

ഇടറിയ സ്വരത്തിൽ അവൾ പറഞ്ഞു.

“എനിക്കും ആകാശേട്ടനും വേണ്ടിയിട്ടാണ് നീ ഇത് ഇത്രയും നാൾ വീട്ടിൽ പറയാതിരുന്നതെന്ന് എനിക്കറിയാം. ഒരു വൺ ഇയർ കൂടി എനിക്ക് വേണ്ടി നീ ക്ഷമിക്ക്. അപ്പോഴേക്കും ആകാശേട്ടൻ ഒരു വിധം സെറ്റിൽ ആകും.”

ഒരു നിമിഷം നിർത്തിയ ശേഷം അവൾ പറഞ്ഞു.

“ഗായത്രിയെ കെട്ടിച്ച് വിട്ടതിന്റെ കടങ്ങളൊക്കെ ആകാശേട്ടൻ ഇപ്പോൾ തീർത്തേ ഉള്ളു. ഇപ്പോൾ ചെയ്തു കൊണ്ടിരുന്ന പ്രൊജക്റ്റ് രണ്ടു ദിവസം മുൻപാണ് തീർന്നത്. അതിൽ നല്ലൊരു തുക കിട്ടിയിട്ടുണ്ട്. ഇനിയൊരു മൂന്നു മാസത്തേക്ക് പുള്ളിക്കാരൻ പുതിയ പ്രൊജക്റ്റ് ഒന്നും എടുക്കുന്നില്ലെന്നാണ് പറഞ്ഞത്. കഴിഞ്ഞ രണ്ടു വർഷമായി ഫുൾ ടൈം വർക്കിൽ തന്നെ ആയിരുന്നല്ലോ. നീ ഈ ഒരു വര്ഷം കൂടി എനിക്ക് വേണ്ടി വീട്ടിൽ എന്തെങ്കിലും പറഞ്ഞു പിടിച്ച് നിൽക്ക്. അപ്പോഴേക്കും ആകാശേട്ടൻ നല്ലൊരു ബാങ്ക് ബാലൻസ് ഉണ്ടാക്കിയിരിക്കും. വീട്ടുകാർ സമ്മതിക്കാതെ ഞാൻ ഇറങ്ങി ചെന്നാലും പുള്ളിക്ക് പിടിച്ച് നിൽക്കാനുള്ള അവസ്ഥയിലാകാനുള്ള സമയം നമ്മൾ കൊടുക്കണമല്ലോ.”

നവീന്റെ അടുത്ത കൂട്ടുകാരനാണ് ആകാശ്. കോളേജിൽ പഠിക്കുന്ന ടൈമിൽ ആണ്  ആകാശിന്റെ അച്ഛനും അമ്മയും ഒരു ആക്‌സിഡന്റിൽ മരിക്കുന്നത്. പിന്നെ അവനു ആകെ ഉണ്ടായിരുന്നത് അനിയത്തി ഗായത്രി മാത്രമാണ്. പഠിത്തത്തിൽ മുന്നിൽ തന്നെ ആയിരുന്ന ആകാശ് കഠിനമായ പരിശ്രമത്തിലൂടെ തന്നെയാണ് തന്റെ കരിയർ ഉയർത്തിക്കൊണ്ടു വന്നത്. ഇതിനിടയിൽ എപ്പോഴോ അറിയാതെ തന്നെ കാവ്യയും ആകാശും തമ്മിൽ ഇഷ്ട്ടത്തിലായി. ആകാശിനെ അടുത്തറിയാവുന്നതിനാലും അവന്റെ കഴിവിൽ വിശ്വാസം ഉണ്ടായിരുന്നതിനാലും നവീൻ ആ ബന്ധത്തിന് എതിര് നിന്നില്ല. ഒന്നര വർഷം  മുൻപായിരുന്നു ഗായത്രിയുടെ വിവാഹം. ആരുടേയും സഹായം കൂടാതെ നല്ല രീതിയിൽ തന്നെയാണ് അവൻ ഗായത്രിയെ വിവാഹം ചെയ്തയച്ചത്.

കാരയ്ക്കാമുക്ക് കാർ പാസ് ചെയ്തപ്പോഴേക്കും അത്രയും നേരം ഗൗരവത്തിൽ ആയിരുന്ന കാവ്യയുടെ മുഖം ചെറുതായി തെളിഞ്ഞത്. നവീൻ  അത് ശ്രദ്ധിക്കുക്കുകയും ചെയ്തു. അവന്റെ മുഖത്തു ചെറുതായി ചിരി പടർന്നു.

അടുത്ത ജംഗ്ഷനിൽ ആണ് ആകാശ് കാവ്യയെ പിക്ക് ചെയ്യാനായി നിൽക്കാമെന്ന് പറഞ്ഞിരിക്കുന്നത്.

കഴിഞ്ഞ രണ്ടു വർഷമായി ആകാശ് ജോലിയുടെ പിന്നിൽ തന്നെയായിരുന്നു. മൂന്നു നാല് മാസം കൂടുമ്പോൾ ഉണ്ടാകുന്ന ഒരു കൂടിക്കാഴ്ചയും വല്ലപ്പോഴും കൂടിയുള്ള ഫോൺ വിളിയും മാത്രമായിരുന്നു ആകാശും കാവ്യയും തമ്മിൽ ഉണ്ടായിരുന്ന കോണ്ടാക്ട്. രണ്ടു ദിവസം മുൻപായിരുന്നു ആകാശ് ചെയ്തുകൊണ്ടിരുന്ന പ്രേജക്ട് തീർന്നത്. ഇനി ഒരു മൂന്നു മാസത്തേക്ക് അവൻ ഫുൾ ഫ്രീ ആണ്. അങ്ങനിരിക്കുമ്പോഴാണ് കാവ്യയുടെ കൂട്ടുകാരിയുടെ കല്യാണം വരുന്നതും ആകാശ് അവളെ കൊണ്ടുപോകാമെന്ന് പറയുന്നതും. അവരുടെ ആ യാത്രക്ക് വീട്ടുകാർക്ക് മുന്നിലുള്ള  മറ ആയിരുന്നു നവീൻ. മൂന്നു മാസങ്ങൾക്ക് ശേഷമാണ് ആകാശും കാവ്യയും തമ്മിൽ വീണ്ടും കണ്ടുമുട്ടുന്നത്. അതിന്റെ സന്തോഷമാണ് അവളുടെ മുഖത്തു തെളിഞ്ഞതും.