പുനർജ്ജന്മം [ജോൺ എബ്രഹാം] 574

​”രാഹുൽ… ആ വൗച്ചറുകൾ ഒന്ന് എടുത്തേ!”
​സൂപ്പർവൈസറുടെ വിളി കേട്ടപ്പോഴാണ് രാഹുൽ ഞെട്ടി ഉണർന്നത്. നെറ്റിയിൽ നേർത്തൊരു വിയർപ്പുതുള്ളി പൊടിഞ്ഞു. അവൻ ചുറ്റും നോക്കി. പഴയ രാഹുലല്ല ഇപ്പോൾ താൻ. 27 വയസ്സായി, കല്യാണം കഴിഞ്ഞ് രണ്ട് വർഷമായി, മീര കൂടെയുണ്ട്. പഴയ ആന്റിമാരും കള്ളുകുടിയുമൊക്കെ കോഴിക്കോട്ടെ ഈ നനഞ്ഞ മണ്ണിൽ കുഴിച്ചുമൂടിയെന്ന് അവൻ സ്വയം വിശ്വസിക്കാൻ ശ്രമിച്ചു.

​പക്ഷേ, എറണാകുളത്തേക്ക് മാറുമ്പോൾ അവിടെ സിജിനുണ്ട്. സിജിൻ വീണ്ടും ആ പഴയ ‘മരംകയറ്റം’ ഓർമ്മിപ്പിച്ചാൽ താൻ എന്തു ചെയ്യും? മീര ഇതൊന്നും അറിയാൻ പാടില്ല. ആലോചിക്കുംതോറും രാഹുലിന്റെ ഉള്ളിൽ ഒരു ചെറിയ ആധി പടർന്നു.

സന്ധ്യാനേരം രാഹുൽ ജോലി കഴിഞ്ഞു വീട്ടിൽ എത്തി കുളിയും കഴിഞ്ഞു… കോഴിക്കോട്ടെ ആ പഴയ വീടിന്റെ ഉമ്മറത്ത് മീര ഇട്ടുകൊടുത്ത ഇഞ്ചി ചായയുടെ മണവും കുടിച്ച് രാഹുൽ ഇരിക്കുകയായിരുന്നു. മനസ്സ് നിറയെ ഓഫീസിലെ പഴയ ഓർമ്മകളുടെ പുകമറയായിരുന്നു എങ്കിലും, മീരയുടെ സാമീപ്യം അവന് ഒരു ആശ്വാസമായിരുന്നു. പെട്ടെന്നാണ് ഫോൺ ശബ്ദിച്ചത്.

​സിജിനാണ്.
​”എടാ രാഹുലേ… സംഗതി സെറ്റായി!” സിജിന്റെ ആവേശം ഫോണിലൂടെ പുറത്തേക്ക് ചാടുന്നുണ്ടായിരുന്നു. “നീ പറഞ്ഞ അതേ അറ്റ്‌മോസ്ഫിയർ. ഒരു അടിപൊളി വീട്. മെയിൻ റോഡിൽ നിന്ന് കുറച്ച് ഉള്ളിലോട്ടാണ്, നിന്റെ ഓഫീസിലേക്ക് കൃത്യം മൂന്ന് കിലോമീറ്റർ. വലിയൊരു പറമ്പും മരങ്ങളുമൊക്കെയുണ്ട്.”

​രാഹുൽ ചായക്കപ്പ് മാറ്റിവെച്ച് ആകാംക്ഷയോടെ ചോദിച്ചു, “എടാ സത്യമാണോ? മീരയ്ക്ക് ഇഷ്ടപ്പെടുമോ?”
​”അതൊക്കെ ഇഷ്ടപ്പെടും. വീടിന്റെ മുകളിലെ നിലയാണ് നമുക്ക് തരുന്നത്. രണ്ട് വലിയ റൂമും ബാക്കി എല്ലാ സൗകര്യങ്ങളുമുണ്ട്. പക്ഷെ…” സിജിൻ ഒന്ന് നിർത്തി. “ഒരു ചെറിയ പ്രശ്നമുണ്ട്. ആ വീടിന്റെ ഓണർ ഒരു റിട്ടയേർഡ് അങ്കിളാണ്. പുള്ളിക്ക് ഒരു നിർബന്ധമേയുള്ളൂ—വീട് വൃത്തിയായി കൊണ്ടുനടക്കണം. ഒരു പൊടി പോലും അവിടെ കണ്ടുകൂടാ. അല്പം ഒന്ന് അങ്ങോട്ടോ ഇങ്ങോട്ടോ മാറിയാൽ പുള്ളി അപ്പോൾ തന്നെ ആളെ പുറത്താക്കും. ആ ഒരു പേടി കാരണം അവിടെ അധികം ആരും നിൽക്കാറില്ല. നീ എന്ത് പറയുന്നു?”
​രാഹുൽ ഇത് കേട്ടതും ഒന്ന് ചിരിച്ചു. അടുക്കളയിൽ പാത്രങ്ങൾ അടുക്കി വെക്കുന്ന തിരക്കിലുള്ള മീരയെ അവൻ ഒന്ന് നോക്കി. അവളുടെ വൃത്തിയുടെ കാര്യത്തിൽ അവന് നൂറ് ശതമാനം ഉറപ്പായിരുന്നു.
​”എടാ സിജിനേ… ആ കാര്യത്തിൽ നീ ഒരു പേടിയും പേടിക്കണ്ട. എന്റെ പൊണ്ടാട്ടിയും ഏതാണ്ട് അതേ കാറ്റഗറി തന്നെയാണ്! ഈ വീട് വൃത്തിയാക്കി വെക്കുന്ന കാര്യത്തിൽ അവൾ പുള്ളിയെക്കാൾ വലിയ കടുപ്പക്കാരിയാണ്. നീ ധൈര്യമായി അങ്ങോട്ട് പ്രൊസീഡ് ചെയ്തോ. ആ അങ്കിളിന് എന്റെ മീരയെ അറിയില്ലല്ലോ!”
​സിജിൻ അപ്പുറത്ത് ഇരുന്ന് ചിരിച്ചു. “എന്നാൽ ശരിടാ, ഞാൻ പുള്ളിയോട് സംസാരിച്ച് അഡ്വാൻസ് കൊടുക്കാം. നീ അടുത്ത മാസം വണ്ടി കയറാൻ റെഡിയായിക്കോ. കൊച്ചി നിന്നെ കാത്തിരിക്കുകയാണ്!”
​ഫോൺ വെച്ച ശേഷം രാഹുൽ മീരയുടെ അരികിലേക്ക് നടന്നു. “മീരേ… സിജിൻ വീട് ഉറപ്പിച്ചു. പക്ഷേ ഒരു കടുപ്പക്കാരൻ അങ്കിളാണ് അവിടുത്തെ ഓണർ. വീട് വൃത്തിയായില്ലെങ്കിൽ നമ്മളെ പുറത്താക്കുമത്രേ!”
​മീര കയ്യിലെ തവി മാറ്റിവെച്ച് അവനെ നോക്കി ഒന്ന് പുഞ്ചിരിച്ചു. “അതൊക്കെ നമുക്ക് നോക്കാം രാഹുലേട്ടാ… വൃത്തിയുടെ കാര്യത്തിൽ എന്നെ തോൽപ്പിക്കാൻ ആ അങ്കിളിന് കഴിയില്ല.”
​അവളുടെ ആ ആത്മവിശ്വാസം കണ്ടപ്പോൾ രാഹുലിന് സന്തോഷം തോന്നി. പക്ഷേ, എറണാകുളത്തെ ആ വീട്ടിലെ അങ്കിളിന്റെ നിബന്ധനകളും, സിജിന്റെ വള്ളികളും ഒക്കെ ചേർന്ന് തങ്ങളുടെ പുതിയ ജീവിതം എങ്ങനെയായിരിക്കുമെന്ന് അവൻ ചെറിയൊരു ആകാംക്ഷയോടെ ആലോചിച്ചു