രണ്ടാം വരവ് [നവവധു 2] ഭാഗം 4 [JO] [ക്ലൈമാക്സിലേക്ക്] 418

എന്റെ ചോദ്യത്തിന് അച്ചുവിന്റെ പുച്ഛംനിറഞ്ഞ മറുപടിയാണ് വന്നത്. ചേച്ചിയോട് ഞാൻ പറഞ്ഞതിന് ഇവളെന്തിനാ കിടന്നു ചാടുന്നതാവോ???!!!. എന്തായാലും ചേച്ചിയതിന് മറുപടിയൊന്നും കൊടുത്തില്ല. എനിക്ക് സാമ്പാർ ഒഴിക്കുമ്പോ അവളെയൊന്നു നോക്കി കണ്ണുരുട്ടി അത്രമാത്രം. പ്രശ്നം എന്തായാലും ഗുരുതരമാണെന്ന് എനിക്ക് മനസ്സിലായി. ഇനി ഈ കലിപ്പ് കൂടി രാത്രി എന്റെ നെഞ്ചത്തു തീർക്കുമല്ലോ ഈശ്വരാ…

അപ്പോഴാണ് ഞാനത് ശ്രദ്ധിച്ചത്. അച്ചുവിന്റെ പാത്രത്തിൽ ചിക്കൻ ഫ്രൈയ്യൊക്കെ ഇരിക്കുന്നുണ്ട്. എനിക്കാണെങ്കി സാമ്പാറും പപ്പടവും തോരനും മാത്രം. ഞാൻ നോക്കിയപ്പൊ ടേബിളിൽ അതൊട്ടു വെച്ചിട്ടില്ല താനും. ചേച്ചി മറന്നുപോയതാണെന്നു എനിക്ക് മനസ്സിലായി.

ആ പറയാൻ മറന്നു. ഈയുള്ളവനുമായുള്ള സമ്പർക്കം മൂലം ഇവിടെയും ഇപ്പൊ ചെറിയതോതിൽ മാംസമൊക്കെ കഴിക്കാൻ തുടങ്ങീട്ടുണ്ട്. അച്ചുവാണ് കൂടുതൽ കഴിക്കുക. അവള് കോളേജിൽ വെച്ച് ചെറിയ തോതിൽ മീറ്റ് റോളൊക്കെ കഴിച്ചിരുന്നു എന്നത് വൈകിയാണ് എനിക്ക് മനസ്സിലായത്. അതുകൊണ്ടുതന്നെ പുള്ളിക്കാരി അത്യാവശ്യം കഴിക്കും. ചേച്ചിയും ഇടക്കെങ്ങാനും ഒന്നോ രണ്ടോ കഷ്ണം ആർക്കോ വേണ്ടിയെന്നവണ്ണം കഴിക്കും. ആണ്ടിലോ സംക്രാന്തിക്കോ വല്ലപ്പോഴും. അതേയുള്ളു. സീതാമ്മയോ ഗോപേട്ടനോ കഴിക്കില്ല. പക്ഷേ എനിക്കുവേണ്ടി മേടിക്കും… ഉണ്ടാക്കിത്തരും. മരുമോനോടുള്ള സ്നേഹം. എന്റെ അമ്മയുടെ ശിക്ഷണത്തിൽ പഠിച്ചതാണ്. ആ ശിക്ഷണം പരീക്ഷിക്കുന്നതിനിടെ ഉപ്പുനോക്കിയാണ് എന്റെ പെണ്ണ് ഇതൊക്കെ തൊട്ടുനോക്കിയതെന്നത് വേറെ കാര്യം.

ഇതെന്നാടി എനിക്ക് നോയമ്പാണോ?? എനിക്കെന്നാ ചിക്കൻ വെക്കാത്തെ…???

ചോദിച്ചു തീർന്നില്ല. ഒരു വിങ്ങിപ്പോട്ടലാണ് പിന്നെക്കേട്ടത്. സംഭവം മനസ്സിലാകുംമുമ്പേ ചേച്ചിയുടെ കണ്ണിൽ നിന്നും കുടുകുടാ കണ്ണീരൊഴുകി. സംഗതിയെന്നതാണെന്നറിയാതെ ഞെട്ടി ചാടിയെണീറ്റ എന്റെ നെഞ്ചിലേക്ക്‌ ചാരി അയ്യോ പൊത്തോന്നുംപറഞ്ഞൊരൊറ്റ കരച്ചിലും.

ചേച്ചിയേ… എടീ… എടീ എന്നാ പറ്റിയെ???

ഞാൻ… ഞാൻ നാളെ ഒണ്ടാക്കിതരാം ജോക്കുട്ടാ… ഇന്ന്… ഇന്നിതും കൂട്ടി കഴിക്ക്…. ഞാൻ… ഞാ… നീ വരാൻ വൈകിയൊണ്ടാ… ഞാൻ … ഞാ..

ചേച്ചി എന്തൊക്കെയോ പറഞ്ഞു വിങ്ങിപ്പൊട്ടി. എനിക്കൊന്നും മനസ്സിലായില്ല. എന്താണ് സംഭവമെന്നറിയാൻ അച്ചുവിനെ നോക്കിയപ്പോ ഭൂട്ടാൻ ബമ്പറടിച്ച സന്തോഷത്തോടെ ഞങ്ങളെ നോക്കി ആക്കിച്ചിരിക്കുന്നു. ഞാൻ നോക്കുന്നത് കണ്ടതും ഒരു ചിക്കൻ പീസെടുത്തവൾ ആസ്വദിച്ചു കടിച്ചു. ഞാനൊന്നും മിണ്ടാത്തത് കണ്ട് ഒന്ന് മുഖമുയർത്തി നോക്കിയ ചേച്ചി കണ്ടത് ആ കാഴ്ചയാണ്.

തിന്നടീ… തിന്ന്… നീ നിന്റെ അവതാനത്തീറ്റ തിന്ന്…

എന്റെ നെഞ്ചിൽ ചാരിക്കിടന്നുതന്നെ ചേച്ചി പൊട്ടിത്തെറിച്ചു. ആയിക്കോട്ടെ എന്ന മട്ടിലൊരു ആഗ്യതോടെ അച്ചു അത് പുച്ഛിച്ചു തള്ളിക്കൊണ്ട് അടുത്ത പീസെടുത്തു കടിച്ചു.

ഞാൻ നാളെ ഉണ്ടാക്കിത്തരാം ജോക്കുട്ടാ… മൊത്തംകൂടി അവളവള്ടെ അവതാനത്തീറ്റ തിന്നട്ടെ… കൊലത്തീറ്റ തിന്ന് ചാവട്ടെ ശവം…