?റസാക്കിന്റെ ഇതിഹാസം 2? [ലൂസിഫർ] 1071

പിറ്റേന്ന് രാത്രി വീട്ടിൽ ചെന്നപ്പോൾ കട്ടിലിലതാ തന്റെ ബെഡ്ഡിന് പകരം പെങ്ങളുടെ കനം കുറഞ്ഞ ചെറിയ ബെഡ്ഡ്.!

മടുത്തു ഈ ജീവിതം.!!!

കയ്യിലിരുന്ന ബിയറിന്റെ ഗ്ലാസ് മേശയിലവൻ ആഞ്ഞടിച്ചു.

പൊട്ടാതിരുന്നത് ഭാഗ്യം.! എല്ലാരും തിരിഞ്ഞു നോക്കി. ബിയറുമായി വരുന്ന സപ്‌ളയറുടെ മുഖത്ത് താനിതൊക്കെ എത്ര കണ്ടതാ എന്ന ഭാവം.

മൂന്നാമത്തെ ബിയർ ഒരു ഗ്ലാസ് കുടിച്ചപ്പോഴേക്കും പാത്താൻ മുട്ടി.

പോയി മൂത്രമൊഴിച്ച് വന്ന് ബാക്കിയുള്ളതും കുടിച്ചു തീർത്തു.

ചെറുതായിട്ട് പൂസായി തുടങ്ങിയിരുന്നു.

ബില്ല് കൊണ്ടുവന്ന് വെച്ച സപ്ലയറുടെ മുഖത്തേക്ക് അവനൊന്നു നോക്കി.

നാലാമതും മിച്ചറ് ചോദിച്ചപ്പൊ അനക്ക് തരാൻ പറ്റൂല അല്ലെടാ കള്ളപ്പന്നി.! അഞ്ച് കായി അനക്ക് ഞാൻ ടിപ്പ് തരൂല.

ബില്ലിലുള്ള പൈസ മാത്രം മിച്ചറിന്റെ പാത്രത്തിൽ വെച്ചുകൊടുത്ത്! ടിപ്പ് കൊടുക്കാതെയവൻ പുറത്തേക്കിറങ്ങി.

പടിയിറങ്ങി താഴെയെത്തിയതും വീണ്ടും പാത്താൻ മുട്ടി. വെറുതെ മൂത്രമൊഴിക്കാമെന്നല്ലാതെ ബിയറുകൊണ്ടൊരു കാര്യവുമില്ല.!

ഇനിയിപ്പൊ അതിനായി മോളിലേക്ക് കേറാൻ വയ്യ. റോഡ് സൈഡിൽ ആളില്ലാത്ത സ്ഥലം നോക്കാം.

അപ്പോഴാണ് തിയ്യേറ്ററിന്റെ ഗേറ്റ് മലർക്കെ തുറന്നു കിടക്കുന്നത് കണ്ടത്. ഇപ്പൊ പഴയത് പോലല്ല, ടോയ്ലറ്റൊക്കെ നല്ല വൃത്തിയുള്ളതാണ്. പണ്ട് മുപ്പതു രൂപയായിരുന്നു ടിക്കറ്റെങ്കിൽ ഇപ്പൊ നൂറ് രൂപയാണെന്ന് മാത്രം.!

മൂത്രമൊഴിച്ച് കഴിഞ്ഞതും അവന്റെ കാലുകൾ യാന്ത്രികമായി ടിക്കറ്റ് കൗണ്ടറിനരികിലേക്ക് ചലിച്ചു.

ലീനയിലിപ്പൊ ഒരേസമയം നാല് പടങ്ങളാണ് ഓടുന്നത്. സ്ക്രീൻ ഒന്നിലും രണ്ടിലും രണ്ട് പടങ്ങൾ വീതം.

ഏതോ പുതുമുഖത്തിന്റെ തമിഴ് പടമാണ്. പേര് പോലും ശ്രദ്ധിച്ചില്ല. ടിക്കറ്റെടുത്ത് നേരെ ഉള്ളിലേക്ക് കയറി.

പരസ്യം കഴിഞ്ഞു.

പടം തുടങ്ങാൻ പോകുന്നു.

അവൻ ചുറ്റുമൊന്ന് നോക്കി. തിയ്യേറ്ററിൽ കുറച്ച് ആളുകളേയുള്ളൂ. തല്ലിപ്പൊളി പടമാണെന്നു തോന്നുന്നു.

പേര് എഴുതിക്കാണിച്ചു.

“നാൻ വിട്ട വെള്ളത്തിൽ വിളയാടും കുളന്തൈ”!

ഇംഗ്ലീഷ് വല്ല്യ പിടിയില്ലാത്തതിനാൽ അവൻ അങ്ങനെയാണ് വായിച്ചത്.

മുൻസീറ്റിലിരുന്ന ഒന്നുരണ്ടു പേർ തന്റെ നേരെ നോക്കി ചിരിക്കുന്നത് അവൻ കണ്ടു.