റോക്കി 5 [സാത്യകി] 4578

‘അവന് എന്നോട് ഇപ്പോളും പിണക്കം ആണോ..? അവനെന്താ അകത്തോട്ടു വരാത്തത് എന്നെ കാണാൻ..?

ഇഷാനി സങ്കടത്തോടെ ശ്രുതിയോട് ചോദിച്ചു

‘ അവൻ അവന്റെ ഷൂ ഊരാൻ ഉള്ള പരിശ്രമത്തിൽ ആണ്. കുറെ നേരമായി. അതാ അകത്തോട്ടു വരാത്തത് അല്ലാതെ നിന്നോട് പിണക്കം ആയിട്ടല്ല..’

അർജുൻ പുറത്തേക്ക് നോക്കി കൊണ്ട് പറഞ്ഞു ആഷിക്ക് ഷൂ ഊരാൻ തത്രപ്പാട് പെടുന്നത് കണ്ടു അർജുൻ അവനോട് ഷൂ ഇട്ടോണ്ട് കേറിക്കോളാൻ പറഞ്ഞു

‘പിണക്കം മുഴുവൻ ആയിട്ട് മാറിയിട്ടില്ല അല്ലേടി..’

അകത്തു ചെന്നു ആഷിക്ക് ഇഷാനിയുടെ അടുത്ത് ഇരുന്ന് കൊണ്ട് ശ്രുതിയോടായി പറഞ്ഞു

‘ മിണ്ടിയേക്കെടാ.. ആകെ അവൾ മിണ്ടുന്നതു നമ്മൾ അഞ്ചാറു പേരോടല്ലേ..?

ശ്രുതി അവനോട് പറഞ്ഞു

‘ഹാ മിണ്ടാം.. പക്ഷെ ഇവൾ ടൂറിനു വരാത്തതിൽ എനിക്ക് ഇപ്പോളും ദേഷ്യം ഉണ്ട്. ഇവളുടെ വിചാരം ഇവളെ പറ്റി നമ്മൾക്ക് ഒന്നും ഒരു വറിയും ഇല്ലെന്നാ..’

ആഷിക്ക് കുറച്ചു പിണക്കത്തിന്റെയും കുറച്ചു ഇണക്കത്തിന്റെയും സ്വരത്തിൽ പറഞ്ഞു

‘സോറി ഡാ… ഒന്ന് ക്ഷമിക്ക്..’

ഇഷാനി തന്റെ മടിയാത്ത അനങ്ങുന്ന കൈ കൊണ്ട് അവന്റെ കവിളിൽ തൊട്ട് കൊണ്ട് പറഞ്ഞു.. അവർക്കിടയിൽ ഉള്ള ഇഷ്യൂ ആ നിമിഷങ്ങളിൽ ഇല്ലാതെ ആയി. ആഷിക്ക് കയ്യിൽ എന്തോ കവർ കരുതിയിരുന്നു.. ഇഷാനി അത് കയ്യിൽ എടുത്തു മടിയിൽ വച്ചു തുറന്നു നോക്കിയപ്പോ കേക്ക് ആണ്..

‘ഹായ് എനിക്ക് ദേ കേക്ക് ആയി വന്നിരിക്കുന്നു..’

അവൾ അർജുനോടായി പറഞ്ഞു

‘നിനക്കോ..? ഇത് ഞാൻ വീട്ടിലേക്ക് വാങ്ങിച്ച കേക്ക് ആണ്..’