റോക്കി 5 [സാത്യകി] 4579

ലക്ഷ്മിയുടെ ഓരോ ഫോട്ടോയും ഇഷാനി വളരെ ശ്രദ്ധയോടെ നോക്കാൻ തുടങ്ങി. ഓരോ ഫോട്ടോയിലും ഓരോ സ്റ്റൈൽ ആണ് ഈ പെണ്ണിന്. ഇട്ടിരിക്കുന്ന ഡ്രെസ്സിനും മേക്കപ്പിനും ഒക്കെ നല്ല കാശ് ആകും. ഇഷാനി അതൊന്നും യൂസ് ചെയ്യാറില്ല എങ്കിലും അതിനെ പറ്റി ഒക്കെ അത്യാവശ്യം അറിവുണ്ട്.. ഫോട്ടോയിൽ ഇവളെ കണ്ടാൽ ഒരു ഭയങ്കരി ആണെന്ന് പറയില്ലല്ലോ.. എന്താ അവളുടെ ചിരി.. ഈ ചിരി കണ്ടാൽ പറയുമോ ഒരാളെ ദ്രോഹിക്കാൻ ഒരു മടിയും ഇല്ലാത്ത ഒരുത്തിയാണ് ഇതെന്ന്.. ഇഷാനി അവളായി സ്വയം താരതമ്യം ചെയ്തു. തനിക്ക് ഒരിക്കലും ഇവളെ പോലെ ഇങ്ങനെ ഇളിക്കാൻ പറ്റില്ല. എന്തൊരു ഫേക്ക് ഇളിയാണ്. താൻ ആണേൽ പിക്കിൽ ചിരിക്കുന്നത് തന്നെ വിരളം. ഇഷാനി ഫോണിൽ ഒരു സെൽഫി എടുത്തു. ലക്ഷ്മി എടുത്ത അതേ പോസിൽ അതേ പോലെ ചിരിക്കാൻ ശ്രമിച്ചു കൊണ്ട്. എന്നിട്ട് രണ്ട് ഫോട്ടോയും അവൾ മാറി മാറി നോക്കി. സ്വന്തം ഫോട്ടോ കണ്ടിട്ട് അവൾക്ക് തന്നെ എന്തോ വൃത്തികേടായി തോന്നി. ഇമ്മാതിരി ഫോട്ടോ ഒന്നും തനിക്ക് പറ്റിയതല്ല. അതൊക്കെ ഇവളെ പോലുള്ള സുന്ദരികോതകൾക്ക് പറ്റും. നിരാശയോടെ തന്റെ ഫോട്ടോ ഡിലീറ്റ് ആക്കി അവൾ ബാക്കി ഫോട്ടോകൾ കാണാൻ തുടങ്ങി.
അധികം വൈകാതെ തന്നെ ലക്ഷ്മിയും അർജുനും ആയിട്ടുള്ള പിക്കുകൾ വരാൻ തുടങ്ങി.. രണ്ട് പേരും ഒരുമിച്ച് മാളിൽ വച്ചു എടുത്തത്, രണ്ട് പേരും തിയേറ്ററിൽ വച്ചു എടുത്തത്, കോളേജിന്റെ ഏതൊക്കെയോ മൂലകളിൽ വച്ചു എടുത്തത്, ജങ്കാറിൽ വച്ചു എടുത്തത്.. അങ്ങനെ രണ്ട് പേരുടെയും ഇഷ്ടം പോലെ പിക്കുകൾ ഇഷാനിക്ക് മുന്നിൽ നിരന്നു.. ഒരു നിമിഷം താൻ ചെയ്യുന്നത് ശരിയാണോ എന്ന് ഇഷാനി ചിന്തിച്ചു. പക്ഷെ എന്തായാലും ബാക്കി കൂടെ നോക്കാൻ ഒരു ഉൾവിചാരം അവൾക്ക് വന്നു. അവൾ വീണ്ടും സ്ക്രോൾ ചെയ്തു പോയി.