റോക്കി 6 [സാത്യകി] [Climax] 2534

‘അതിന് നീ ഇവിടെ ഒരു കോളേജ് ഡേയ്ക്ക് പോലും വന്നിട്ടില്ലല്ലോ.. നാളെ വന്നാൽ അറിയാം എങ്ങനെ ഉണ്ടെന്ന്.. നീ നാളെ വരും..’

ഫസ്റ്റ് ഇയറിൽ റാഗിംഗ് നടന്നു കഴിഞ്ഞു ഇഷാനി ഇതേ പോലുള്ള പരിപാടികൾ എല്ലാം ഒഴിവാക്കിയിരുന്നു.. ഞാൻ ഇവിടെ വന്നു കഴിഞ്ഞാണ് അവൾ പരിപാടിക്ക് എല്ലാം പങ്കെടുക്കാൻ തുടങ്ങിയത്.. പക്ഷെ കഴിഞ്ഞ വർഷം കോളേജ് ഡേയ്ക്കും അവൾ വന്നില്ല.. ഞാനും ലച്ചുവും ആയി സെറ്റ് ആയ ടൈം ആയത് കൊണ്ട് അന്ന് ഞാൻ അവളെ വിളിക്കാനും നിന്നില്ല

‘വരണോ..? ചുമ്മാ മടുപ്പ് ആയിരിക്കും..’

‘വരണം.. വന്നേ പറ്റൂ…’

ഞാൻ പറഞ്ഞു.

അപ്പോൾ അവൾ മുഖം ചുളിച്ചു വരാം എന്ന അർഥത്തിൽ തല കുനുക്കി.. കണ്ണിലേക്കു വീണ മുടിയിഴകൾ മെല്ലെ മാറ്റാൻ വേണ്ടി അവൾ കൈകൾ ഉയർത്തിയപ്പോൾ ഹൂഡി തെന്നി മാറി അവളുടെ കൈക്കുഴയിൽ മിന്നി കിടന്ന ചെയിൻ ഞാൻ കണ്ടു.. ഞാൻ അവൾക്ക് വാങ്ങി കൊടുത്ത ഗിഫ്റ്റ്….!അതിപ്പോളും അവളുടെ കയ്യിലുണ്ട്….!

എനിക്കത് വിശ്വസിക്കാൻ പ്രയാസം ആയിരുന്നു.. അവൾ ഒന്നും ഓർക്കാതെ എടുത്തു ഇട്ടത് ആകുമോ..? അതിന് എന്തായാലും സാധ്യത ഇല്ല. അത് കാണുമ്പോ തന്നെ അവൾക്ക് എന്റെ ഓർമ ഉണ്ടാകും. ഇനി കൃഷ്ണ ഒക്കെ പറയുന്നത് പോലെ അവൾക്ക് ഇപ്പോളും ആ ഫീൽ എന്നോട് ഉണ്ടോ…?

ഏറെ നേരം എന്റെ മനസിൽ അത് തന്നെ ആയിരുന്നു. ഞാൻ അവൾക്ക് വാങ്ങി കൊടുത്ത ഗിഫ്റ്റിനെ പറ്റി ആലോചിച്ചു ഇരിക്കുമ്പോ ആണ് അവൾ എനിക്ക് തന്ന ഗിഫ്റ്റിന്റെ കാര്യം ഞാൻ ഓർത്തത്. ഞാൻ യാത്ര പോകുന്നതിന്റെ തലേന്ന് അവൾ എനിക്ക് വാങ്ങി തന്ന വാച്ച്… അത് അന്ന് ഉണ്ടായ അടിയിൽ പൊട്ടി പോയി.. അത് നന്നാക്കുന്ന കാര്യം ആണേൽ ഞാൻ വിട്ടും പോയി.. അവളിപ്പോളും എന്റെ സമ്മാനം സൂക്ഷിച്ചു വച്ചിട്ടുണ്ട്.. ഞാൻ ആണേൽ അത് അടിച്ചു പൊളിക്കാൻ ഇട്ട് കൊടുത്തു.. എനിക്ക് അതിയായ വിഷമം ഉണ്ടായി