റോക്കി 6 [സാത്യകി] [Climax] 2536

കൃഷ്ണ നല്ലകുട്ടി ആയി അഭിനയിച്ചു കൊണ്ട് പറഞ്ഞു

‘ഹേയ്.. നീ ഇതിനാണോ എന്നോട് വന്നു സോറി പറയുന്നെ..? ഞാൻ ആണ് നിന്നോട് സോറി പറയേണ്ടത്.. നീ ഒരു തെറ്റും ചെയ്തിട്ടില്ല..’

അവളുടെ അഭിനയം മനസിലാകാതെ അർജുൻ പറഞ്ഞു. അല്ലെങ്കിൽ തന്നെ എല്ലാം കൊണ്ടും സമനില തെറ്റി നിൽക്കുന്ന അർജുൻ ഇത്രയ്ക്ക് ഒന്നും കടന്നു ചിന്തിക്കില്ല..

‘ഞാൻ ഇല്ലായിരുന്നു എങ്കിൽ നിങ്ങൾ സന്തോഷത്തോടെ ഇരുന്നേനെ..’

കൃഷ്ണ പറഞ്ഞു

‘അതൊന്നും നീ ആലോചിക്കാതെ.. അങ്ങനെ ഒന്നും അല്ല. അവളെ പോലൊരു കൊച്ചിനെ ഒന്നും ഞാൻ അർഹിക്കുന്നില്ല.. എങ്ങനെ ആണേലും ആ ബന്ധം പൊളിഞ്ഞേനെ.. അല്ലാതെ നീ അല്ല കാരണം..’

അർജുൻ അവളെ സമാധാനിപ്പിച്ചു. എന്നാലും അതിനിടയിൽ അവൻ ഇഷാനിയെ പൊക്കി അടിച്ചത് കൃഷ്ണയെ വല്ലാതെ ചൊടിപ്പിച്ചു. പക്ഷെ അവൾ അത് മുഖത്ത് കാണിച്ചില്ല.. ഓ.. അവളെ പറ്റി പറയാൻ തുടങ്ങിയാൽ ഇവന് എപ്പോളും ഇതേ പോലെ പൊക്കിയടി കൂടുതൽ ആണ്.. കേക്കുമ്പോ തന്നെ പൊളിഞ്ഞു വരും.. അവൾ ആരാടാ രാജകുമാരിയോ..? കൃഷ്ണ മനസ്സിൽ അർജുനോട് കയർത്തു സംസാരിച്ചു..

‘ഞാൻ എന്തേലും ചെയ്യണോ അത് റെഡി ആക്കാൻ..? അവളോട് സംസാരിക്കുകയോ വല്ലോം…?

കൃഷ്ണ വെറുതെ ഒന്ന് എറിഞ്ഞു നോക്കി. അർജുൻ ഒരിക്കലും അതിന് സമ്മതിക്കില്ല എന്ന് അവൾക്ക് അറിയാമായിരുന്നു.

‘അതിന്റെ ഒന്നും ആവശ്യമില്ല.. അത് ക്ലോസ് ആയ കേസ് ആണ്.. നീ അത് ആലോചിച്ചു വിഷമിക്കണ്ട എന്ന് പറഞ്ഞല്ലോ..’

അർജുൻ അവളെ ആശ്വസിപ്പിക്കാൻ പറഞ്ഞു

എനിക്കെന്ത് വിഷമം.. കൃഷ്ണ മനസിൽ പറഞ്ഞു. നിങ്ങൾ രണ്ടും മിണ്ടാതെ ഇരിക്കുന്നത് ആണെടാ എന്റെ സന്തോഷം.. എന്തായാലും ആ വിഷയം ക്ലോസ് ആയെന്ന് അവന്റെ വായിൽ നിന്ന് കേട്ടപ്പോ കൃഷ്ണയ്ക്ക് ഒരു കുളിർമ തോന്നി..