സാം കുട്ടിയുടെ ലോകം [തുളസി] 425

ജർമ്മനിയിലെ ജോലി വേണ്ടന്ന് വെയ്ക്കുന്ന കാര്യം ലിസി സമ്മതിക്കില്ലന്ന് അറിയാവുന്നത് കൊണ്ട് മകളുടെ കൂടെ ജർമനിക്ക് പോകാൻ താല്പര്യമുള്ള ഒരു ചെറുക്കനെ തേടിയിയപ്പോഴാണ് സാം കുട്ടി കണ്ണിൽ പെട്ടത്…

സാമ്പത്തികമായി താഴ്ന്ന നിലയിലാണെങ്കിലും വിശ്വാസപര മായും കുടുംബപരമായും നല്ലപേരുള്ള കുടുംബമായിരുന്നു സാംകുട്ടിയുടെ…

സാമ്പത്തിക പിന്നോക്കാവസ്ഥ ഒഴിച്ചാൽ എന്തു കൊണ്ടും ലിസിക്ക് ചേരുന്ന ചെറുക്കാനാണ് സാം കുട്ടി എന്ന് ലിസിയുടെ അപ്പച്ചനും അമ്മച്ചിയും കരുതി…

സാംകുട്ടി വീട്ടിലെ നാലുമക്കളിൽ ഇളയവൻ.. മൂത്തത് മൂന്നും പെണ്ണുങ്ങൾ..

മൂന്ന് ചേച്ചി മാരെ കെട്ടിച്ചു വിട്ടപ്പോഴേക്കും സാം കുട്ടിയുടെ അപ്പൻ ദരിദ്രനായി..

പഴയ ഒരു വീടും അര ഏക്കർ സ്ഥലവുമാണ് ഇനി ആകെയുള്ളത്…

ബികോം ഡിഗ്രി പൂർത്തിയാക്കിയെങ്കിലും ഫ്രഫഷണൽ കോർസ് ഒന്നും പഠിക്കാത്തത് കൊണ്ട് കാര്യമായ ജോലിയൊന്നും സാം കുട്ടിക്ക് തരപ്പെട്ടില്ല..

ടൗണിലെ ഒരു ഹാർഡ് വേർ ഷോപ്പിൽ ചെറിയ ശമ്പളത്തിനു കണക്കെഴുതാൻ പോകുന്നുണ്ട്…

നല്ല ജോലിയോ അല്ലങ്കിൽ സ്വത്തോ ഇല്ലാത്തതു കൊണ്ടാണ് മുപ്പതു വയസായിട്ടും സാം കുട്ടിക്ക് കല്യാണ ആലോചനകൾ ഒന്നും വരാത്തത്..

ലിസ്സിയുടെ അമ്മച്ചി സാം കുട്ടിയുടെ അമ്മയോട് ഇക്കാര്യം പറഞ്ഞപ്പോൾ മുതൽ ഇത്‌ നടക്കുവാൻ വേണ്ടി സർവ്വ പുണ്യാളൻമാർക്കും നേർച്ച നേർന്നു കൊണ്ടിരിക്കുകയാണ് സാം കുട്ടിയുടെ വീട്ടുകാർ…

അവർക്ക്‌ ചിന്തിക്കാൻ കൂടി കഴിയാത്ത ബന്ധമാണ് ഇത്‌…
അതും വിദേശത്തു ജോലിചെയ്യുന്ന പെണ്ണ്.. കല്യാണം കഴിഞ്ഞാൽ സാം കുട്ടിക്കും ജർമനിയിലേക്ക് പോകാം..
അതോടെ കുടുംബം രക്ഷപെടും
ഇതൊക്കെയായിരുന്നു സാം കുട്ടിയുടെ വീട്ടുകാരുടെ ചിന്ത…