രാജേഷ് വസ്ത്രം ധരിക്കുന്നതിനിടയിൽ പെട്ടെന്ന് ഒന്ന് വിറച്ചു. അവന്റെ മുഖത്ത് തലേദിവസത്തെ ലഹരിയുടെ അവശിഷ്ടങ്ങൾ മാഞ്ഞ് പകരം ഒരു കടുത്ത ദേഷ്യം പടർന്നു.
“അവർ എന്തിനാ ഇങ്ങോട്ട് വരുന്നത്? എനിക്ക് ആരെയും കാണണ്ട,” അവൻ പരുക്കനായി പറഞ്ഞു.
താര അവന്റെ കൈകളിൽ പതുക്കെ പിടിച്ചു.
” ….എന്താ വല്ല പ്രശനവുമുണ്ടോ ???? അങ്ങനെ പറയല്ലേടാ, അവർ വരാമെന്ന് പറഞ്ഞ സ്ഥിതിക്ക് വരണ്ട എന്ന് പറയുന്നത് ശരിയല്ലല്ലോ. നീ വേഗം താഴേക്ക് വാ, നമുക്ക് നോക്കാം.”.
താര അടുക്കളയിലേക്ക് നടക്കുമ്പോൾ അവളുടെ ഉള്ളിൽ വല്ലാത്തൊരു ഭയമായിരുന്നു.
സ്മിതയുടെ കള്ളത്തരങ്ങൾ രാജേഷ് അവരുടെ മുന്നിൽ വെച്ച് വിളിച്ചു പറയുമോ?
അതോ സുകുമാരൻ വരുന്നത് രാജേഷിനെതിരെ എന്തെങ്കിലും പരാതിയുമായാണോ?
മകനെ അതിൽ നിന്ന് സംരക്ഷിക്കണമെന്ന ഉറച്ച തീരുമാനം ആ അമ്മയുടെ മനസ്സിൽ തെളിഞ്ഞു നിന്നു.
———————————————————————
മുറ്റത്ത് ഒരു കാർ വന്നു നിൽക്കുന്ന ശബ്ദം കേട്ടപ്പോൾ തന്നെ താരയുടെ ഉള്ളിൽ ഒരു ആധി പടർന്നു. സുകുമാരനും ഭാര്യ ജയയും മകൾ സ്മിതയും വണ്ടിയിൽ നിന്നിറങ്ങി ഉമ്മറത്തേക്ക് നടന്നു വന്നു. സ്മിതയുടെ മുഖത്ത് പതിവില്ലാത്ത ഒരു ഗൗരവവും ഒപ്പം എന്തോ ഒളിച്ചുപിടിച്ചതുപോലെയുള്ള ഒരു ഭാവവുമുണ്ടായിരുന്നു. താര അവരെ സ്വീകരിച്ച് ഹാളിലേക്ക് ഇരുത്തി.
“വരൂ… അകത്തേക്ക് വരൂ,” താര ആകെ പരിഭ്രമിച്ച് ചോദിച്ചു.
“രാജേഷിന്റെ അമ്മയല്ലേ?” സുകുമാരൻ കസേരയിലിരുന്നു കൊണ്ട് ഗൗരവത്തിൽ ചോദിച്ചു.
“അതെ… രാജേഷിന്റെ അമ്മയാണ്,” താര സ്വയം പരിചയപ്പെടുത്തിക്കൊണ്ട് അവരുടെ മുഖങ്ങളിലേക്ക് മാറി മാറി നോക്കി.
