സുതാര്യമായ തടവറ 5 [ഒറ്റയ്ക്ക് വഴിവെട്ടി വന്നവൻ] 326

നതാഷ ഇറങ്ങിപ്പോയതോടെ ആ വലിയ വീട് പെട്ടെന്ന് മൂകമായതുപോലെ മാത്യുവിന് തോന്നി.

​ഫോൺ വെച്ച ശേഷം അയാൾ വീണ്ടും ആ ഗസ്റ്റ് റൂമിലേക്ക് നടന്നു.

നതാഷ അവിടെ എന്തെങ്കിലും വിട്ടുപോയിട്ടുണ്ടോ?

അവൾ വെപ്രാളപ്പെട്ട് ഇറങ്ങിപ്പോയപ്പോൾ എന്തെങ്കിലും മറന്നിട്ടുണ്ടാകുമോ?

അയാൾ മുറിക്കുള്ളിലെ ഓരോ കോണും ഇഴകീറി പരിശോധിക്കാൻ തീരുമാനിച്ചു.

അയാളുടെ തലയ്ക്കുള്ളിൽ ആകെ ബഹളമായിരുന്നു. പക്ഷെ അയാൾക്ക് പ്രത്യേകിച്ച് മറ്റൊന്നും ആ ഗസ്റ്റ് ബെഡ് റൂമിൽ നിന്നും കണ്ടെത്താൻ ആയില്ല..

വിചാരങ്ങളുടെ വേഗത കുറയ്ക്കാനെന്നവണ്ണം അയാൾ ലിവിംഗ് റൂമിലെ വിശാലമായ സോഫയിലേക്ക് തളർന്നിരുന്നു.

പണ്ട് നതാഷയോടൊപ്പം ചേർന്നിരുന്ന് സിനിമകൾ കണ്ടിരുന്ന അതേ ഇടം.

​മുന്നിലിരുന്ന ടീപ്പോയിയിൽ നിന്നും ടിവിയുടെ റിമോട്ട് അയാൾ കയ്യിലെടുത്തു.

വിരലുകൾ വിറയ്ക്കുന്നുണ്ടായിരുന്നു. ഒന്നും ആലോചിക്കാതെ അയാൾ ‘ഓൺ’ ബട്ടൺ അമർത്തി.

​ലിവിംഗ് റൂമിലെ ആ വലിയ എൽ.ഇ.ഡി സ്ക്രീൻ പ്രകാശിച്ചു.

ആദ്യം തെളിഞ്ഞത് ഒരു ന്യൂസ് ചാനലായിരുന്നു.

ആ ചാനലിന്റെ ലോഗോയും ശബ്ദവും ആ മുറിയുടെ നിശബ്ദതയെ ക്രൂരമായി തകർത്തു.

ഒരു വാർത്താ റിപ്പോർട്ടറുടെ ഗൗരവമേറിയ മുഖം സ്ക്രീനിൽ നിറഞ്ഞു.

ആ കണ്ണുകളിലെ തിളക്കവും ശബ്ദത്തിലെ ഗൗരവവും എന്തോ വലിയൊരു ദുരന്തത്തെ വിളിച്ചുപറയുന്നുണ്ടായിരുന്നു.

​”ബ്രേക്കിംഗ് ന്യൂസ്…ഇപ്പോൾ കിട്ടിയ വാർത്ത” ചുവന്ന അക്ഷരങ്ങൾ സ്ക്രീനിന് താഴെ മിന്നിമറഞ്ഞു.

​”ഭാര്യയുടെ അവിഹിത ബന്ധം കൈയോടെ പിടികൂടിയ ഭർത്താവ്  ഭാര്യയെയും കാമുകനെയും വീട്ടിലേക്ക് വിളിച്ചുവരുത്തി വിഷം നൽകി കൊലപ്പെടുത്തി.