വെറുമൊരു രാത്രി കൊണ്ട് ഒരു പ്രശസ്തയായ കുടുംബിനിയായ ഡോക്ടറിൽ നിന്നും ഒന്നുമില്ലാത്തവളായി താൻ മാറിയിരിക്കുന്നു.
കുളിച്ചിറങ്ങിയ അവൾ അതിവേഗം സാരി വാരിയുടുത്തു.
ആ വീട്ടിൽ നിന്നും മറ്റൊന്നും എടുക്കാൻ അവൾ ആഗ്രഹിച്ചില്ല.
തന്റെ കരിയറിലെ ഏറ്റവും പ്രധാനപ്പെട്ട രേഖകൾ മാത്രം സ്റ്റഡി റൂമിൽ നിന്നും അവൾ എടുത്തു.
മുകളിലെ മാസ്റ്റർ ബെഡ്റൂമിൽ നിന്നും മാത്യുവിന്റെയും ലില്ലിയുടെയും ചിരിയും ആവേശവും അപ്പോഴും താഴേക്ക് കേൾക്കാമായിരുന്നു.
അങ്ങോട്ടേക്ക് ഒന്ന് നോക്കാൻ പോലും മടിച്ചുകൊണ്ട്, മാത്യു വാങ്ങിനൽകിയ വിലകൂടിയ ആഭരണങ്ങളും വസ്ത്രങ്ങളും അവിടെത്തന്നെ ഉപേക്ഷിച്ചു നതാഷ പടികളിറങ്ങി.
പുറത്തിറങ്ങിയ നതാഷ തന്റെ വീടിനെ അവസാനമായി ഒന്നുകൂടി നോക്കി.
സുതാര്യമായ ഒരു തടവറ ആയിരുന്ന ആഡംബരം തുളുമ്പുന്ന ആ കോൺക്രീറ്റും വലിയ ഗ്ലാസും ചേർന്ന ആ വീട് തന്നെ നോക്കി പുച്ഛിച്ചു ചിരിക്കുന്നതുപോലെ അവൾക്ക് തോന്നി.
താൻ ഇപ്പഴും ഇഎംഐ അടച്ചുകൊണ്ടിരിക്കുന്ന തന്റെ കാർ മാത്രം അവൾ ഒപ്പം കൂട്ടി.
വിറയ്ക്കുന്ന കൈകളോടെ, കണ്ണുനീർ മറച്ച കാഴ്ചയുമായി അവൾ വണ്ടി സ്റ്റാർട്ട് ചെയ്തു.
നഗരത്തിന്റെ വിജനമായ വീഥികളിലൂടെ അവൾ വണ്ടി ഓടിക്കുമ്പോൾ അവളുടെ മുന്നിൽ ആകെ ഒരു ലക്ഷ്യമേ ഉണ്ടായിരുന്നുള്ളൂ. സാമിന്റെ വീട്.അവൾക്ക് ചേക്കേറാൻ വേറെ ഇടം ഉണ്ടായിരുന്നില്ല എന്നുവേണം പറയാൻ..
രാത്രിയുടെ ഇരുട്ട് പതുക്കെ വെളിച്ചത്തിന് വഴിമാറുന്ന സമയം.
