യക്ഷി [Arrow] 2052

നീന്തൽ അറിയാത്ത ഞാൻ വെള്ളത്തിൽ മുങ്ങി പൊങ്ങി കൈ കാലിട്ട് അടിച്ചു. ചേച്ചി എന്റെ പേര് വിളിച്ചു അലറി കരയുന്നത് ഞാൻ അവ്യക്തമായി കേട്ടു. കുളം വീടിന്റെ അടുത്ത് നിന്ന് അകലെ ആയത് കൊണ്ട് ആരും കേട്ടു കാണില്ല ചേച്ചി, പണിക്കാരെ വിളിക്കാൻ ഓടി. എന്റെ കൈ കാലുകൾ തളർന്നു, ഞാൻ വെള്ളത്തിലേക്കു താഴ്ന്നു പോയി. മരണത്തെ കണ്മുന്നിൽ കണ്ടു, ആ നിമിഷം ആണ് വെള്ളത്തിന്റെ അടിത്തട്ടിൽ നിന്ന് ഒരു കൈ എന്നെ ചുറ്റി പിടിച്ചത്, ഒരു സ്ത്രീരൂപം മുഖം ഒന്നും വ്യക്തമായില്ല, അവൾ എന്നെ ചുറ്റിപിടിച്ചു മുകളിലേക്ക് നീന്തി. ബോധം മറയുന്നതിന്റെ ഇടയിലും ആ ശരീരത്തിന്റെ ചൂടും മൃദുലതയും ഞാൻ അറിഞ്ഞു.

പിന്നെ കണ്ണ് തുറക്കുമ്പോൾ വെള്ളത്തിനോട് ചേർന്ന പടവിൽ കിടക്കുകയായിരുന്നു ഞാൻ. തലയും വലതു കയ്യും വെള്ളത്തിന്റെ പുറത്ത് ഇട്ടുകൊണ്ട് അവൾ എന്റെ അരികിൽ ഉണ്ട്, ആ കൈ എന്റെ മുഖത്തിന് നേരെ പിടിച്ചു, പാവകളിക്കാർ നൂൽ കൊണ്ട് പാവയെ നിയന്ത്രിക്കുന്ന പോലെ അവൾ എന്റെ വയറ്റിലെ വെള്ളം വായിൽ കൂടെ പുറത്തേക്ക് വലിച്ച് എടുത്തു. പിന്നെ ആ വെളുത്ത കണ്ണുകൾ കൊണ്ട് എന്നെ ഒന്ന് നോക്കി, എന്റെ നെറ്റിൽ ഒരു ചുംബനം നൽകിയിട്ട് അവൾ വെള്ളത്തിൽ അലിഞ്ഞു ചേർന്നു. ഞാൻ വീണ്ടും മയക്കത്തിൽ ആണ്ടു.

ബോധം തെളിഞ്ഞപ്പോ കരഞ്ഞു കലങ്ങിയ കണ്ണുമായി കട്ടിലിൽ എന്റെ അരികിൽ കിടക്കുന്ന അച്ചു ചേച്ചിയെ ആണ് കണ്ടത്, ഞാൻ എഴുന്നേറ്റ് ഇരുന്നു. നെറ്റിൽ എന്തോ പറ്റിപിടിച്ചിരിക്കുന്നു, തൊട്ടു നോക്കിയപ്പോ നെറ്റിയിൽ നനച്ച് ഇട്ടിരുന്ന തുണി ആണ്. എന്റെ അനക്കം കേട്ട് ആവണം ചേച്ചി ഉണർന്നു, ഞാൻ എഴുന്നേറ്റു എന്ന് കണ്ടപ്പോ ചേച്ചി കരഞ്ഞു കൊണ്ട് എന്നെ കെട്ടിപിടിച്ചു എന്റെ മുഖത്തും കവിളിലും ഒക്കെ ഒരുപാട് ഉമ്മ തന്നു. ചേച്ചിയുടെ കരച്ചിലും പിഴിച്ചിലും കേട്ട് അമ്മയും മറ്റുള്ളവരും വന്നു. ഒറ്റക്ക് കുളത്തിൽ പോയതിന് ചേച്ചിക്കും എനിക്ക് ഒരുപാട് വഴക്ക് കിട്ടി. ഞാൻ ഒരു പകൽ മുഴുവൻ പനിച്ചു കിടന്നു അത്രേ. അത്ര നേരം മുഴുവൻ ചേച്ചി എന്റെ അരികിൽ നിന്ന് മാറാതെ കൂട്ട് ഇരുന്നു. പാവം ഭക്ഷണം പോലും കഴിച്ചിട്ടില്ല. ഞങ്ങൾ രണ്ടു പേരും കഞ്ഞി കുടിച്ചു. എന്തായാലും അന്നത്തെ ആ ദിവസം അങ്ങനെ അങ്ങ് കഴിഞ്ഞു പോയി.

എങ്കിലും മനസ്സിൽ നിന്ന് മായാതെ ഉണ്ടായിരുന്നത് എന്നെ രക്ഷിച്ച ആ വെള്ളകണ്ണുകാരിയുടെ മുഖം ആയിരുന്നു. കണ്ടത് ഒക്കെ സത്യമോ അതോ മിഥ്യയോ സത്യം ആണെകിൽ ആരാണ് അവൾ, അവൾ ആകുമോ മുത്തശ്ശി പറയാറുള്ള ആ ജലയക്ഷി, ആണെങ്കിൽ എല്ലാരേം കൊല്ലുന്ന അവൾ എന്നെ രക്ഷിച്ചത് എന്തിനാവും, അവളെ മുൻപ് എപ്പോഴോ കണ്ടത് പോലെ എനിക്ക് തോന്നിയത് എന്താവും അങ്ങനെ ഉത്തരമില്ലാത്ത ഒരുപാട് ചോദ്യങ്ങൾ എന്നിൽ ഉദിച്ചു.

ഞാൻ കണ്ട പെണ്ണിനെ പറ്റി മുത്തശ്ശിയോട് പറഞ്ഞു പിന്നെ എന്നെ കാത്ത് ഇരുന്നത് പൂജകളുടേം ഹോമങ്ങളുടേം നീണ്ട ഒരു നിര ആയിരുന്നു. ഒരുപാട് വഴിപാട്കൾ മുത്തശ്ശി നടത്തി. പക്ഷെ അതിന് ഒന്നും എന്നെ അവളെ പറ്റിയുള്ള ചിന്തകളിൽ നിന്ന് മാറ്റി നിർത്താൻ ഉള്ള കെൽപ്പ് ഇല്ലാരുന്നു. എന്റെ ഓർമ്മകളിൽ അവൾ നിറഞ്ഞു നിന്നു. വീണ്ടും അവളെ കാണാൻ കൊതിച്ചു.