യോഗം [ഏകലവ്യൻ] [Remastered] 298

ഇതിലും ഭേദം വീട്ടിൽ എന്നെ മൈൻഡ് ചെയ്യാത്ത അരുണേട്ടൻ തന്നെയായിരുന്നു.

വീട്ടിൽ ആകെ മിണ്ടുന്നൊരാൾ അമ്മായിയപ്പനാണ്. അദ്ദേഹത്തിന്റെ ഇഷ്ടപ്രകാരമാണ് അരുണേട്ടൻ ഈ കല്യാണത്തിന് സമ്മതിച്ചതെന്ന് പിന്നീടറിഞ്ഞപ്പോ എനിക്കൊരു നടുക്കമായിരുന്നു.

ആ ഇഷ്ടക്കേടാണ് ഈ നാലഞ്ചു മാസത്തോളം ഞാൻ അനുഭവിച്ചത്.

സത്യം പറഞ്ഞാ എനിക്ക് സങ്കടം വന്നു.

അന്നേ അറിഞ്ഞെങ്കിൽ ഈ കല്യാണം ഒഴിവാക്കാമായിരുന്നു. പക്ഷെ വീട്ടിലെ സ്ഥിതിയാണ് വില്ലനായത്. കൂടാതെ കല്യാണ പ്രായമെത്തിയ പെൺമക്കൾ നാട്ടുകാർക്കും വേവലാതി ഉണ്ടാക്കുമല്ലോ, ഏത്..!!

അതെന്റെ അച്ഛനെയും അലട്ടി.

ഇടത്തരം കുടുംബമായിരുന്നു എന്റേത്.

അച്ഛൻ സദാ കൂലിപ്പണിക്കാരൻ, അമ്മ വീട്ടമ്മ, പിന്നെയൊരു അനിയൻ.

എന്റെ സൗന്ദര്യം കണ്ട് കൊട്ടാരത്തീന്ന് ആൾക്കാർ വന്ന് കെട്ടികൊണ്ട് പോകുമെന്നാണ് അച്ഛന്റെ വിശ്വാസം. പാവം..!

അങ്ങനെ അരുണേട്ടന്റെ ആലോചന വന്നപ്പോ ഇരുപത്തിയഞ്ചിൽ എന്നെ പിടിച്ചങ്ങു കെട്ടിച്ചു.

കൊട്ടാരം തന്നെ, പക്ഷെ രാജാവിന് ഇഷ്ടമല്ലാത്ത രാജ്ഞ്ജിയെ പോലെ ഞാനെന്നു മാത്രം.

എന്നെ കണ്ട് പെരുത്ത് ഇഷ്ടമായിട്ടാണ് കല്യാണം നടന്നതെന്ന ഇപ്പോഴും അച്ഛന്റെ ചിന്ത. പാവം..!

മകന് ഇടത്തരം കുടുംബത്തിൽ നിന്ന് പെണ്ണ് മതിയെന്നത് അരുണേട്ടന്റെ അച്ഛന്റെ ആഗ്രഹമായിരുന്നു. അരുണേട്ടൻ അതിന് ബലിയാടായപ്പോൾ ഞാൻ ഇങ്ങനെയും ബലിയാടായി.

പക്ഷെ അമ്മായിഅപ്പന് എന്നെ നല്ല ഇഷ്ടമായിരുന്നു. ഇപ്പോഴും അതെ.

പക്ഷെ മകന് വേണ്ടി അദ്ദേഹം എന്നെ തിരഞ്ഞെടുത്ത്, എനിക്ക് തന്നെ പണി വാങ്ങി തന്നത് പോലെയായി.