രതിശലഭങ്ങൾ ലൈഫ് ഈസ് ബ്യൂട്ടിഫുൾ 2

Rathishalabhangal Life is Beautiful 2 | Author : Sagar Kottapuram

Previous Part

പിറ്റേന്ന് ഞാൻ സ്വല്പം വൈകിയാണ് ഉണർന്നത് . മഞ്ജുസ് വന്നതിന്റെ ഗുണം ആണോ എന്തോ അന്ന് പിള്ളേരുടെ കരച്ചില് കേട്ട് എണീക്കണ്ടി വന്നില്ല . മഞ്ജുസിന്റെ അഭാവത്തിൽ അഞ്ജുവോ , അമ്മയോ ആണ് എന്റെ കൂടെ റൂമിൽ കിടക്കാറ് . രാവിലെ അവരെ കുളിപ്പിക്കുന്നതും അപ്പിയിടാൻ ഇരുത്തുന്നതും ഒക്കെ എന്റെ അമ്മയുടെ ജോലി ആയിരുന്നു . പക്ഷെ ആദി മാത്രം വാശിപിടിച്ചു കരയും . ചെറുക്കന് ഇടക്ക് അമ്മയുടെ ഓര്മ വന്നാൽ പിന്നെ കരച്ചില് ആണ് . റോസിമോള് വേറെ ടൈപ്പ് ആണ് . അവൾക്ക് അങ്ങനെ വാശി ഒന്നുമില്ല . മഞ്ജുസിനെ കണ്ടില്ലെങ്കിലും അവൾക്ക് പ്രെശ്നം ഒന്നുമില്ല . പാല് കുടിക്കാൻ തോന്നിയാൽ മാത്രം മഞ്ജുസിനെ തേടിപ്പോകുന്ന ടൈപ്പ് . ആരുടെ കൂടെ വേണേലും പുള്ളിക്കാരി പെട്ടെന്ന് ജോയിന്റ് ആകും . പക്ഷെ എന്നെ കണ്ടാൽ പിന്നെ പെണ്ണ് വേറെ ആരുടെ അടുത്തും പോകില്ല ! ആരേലും എന്റെ കയ്യിന്നു ബലം പിടിച്ചു അവളെ എടുക്കാൻ നോക്കിയാൽ അപ്പൊ കരയുവേം ചെയ്യും !

ഞാൻ എണീക്കുമ്പോൾ റൂമിൽ മഞ്ജുവോ പിള്ളേരോ ഇല്ല . അതുകൊണ്ട് തന്നെ പല്ലുതേപ്പും കലാപരിപാടികളുമൊക്കെ തീർത്തു ഞാൻ നേരെ താഴേക്കിറങ്ങി . ഹാളിലെ നിലത്തു റോസ് മോള് കളിപ്പാട്ടങ്ങളൊക്ക എടുത്തു തറയിൽ അടിച്ചു പൊട്ടിക്കുന്ന പോലെ കളിക്കുന്നുണ്ട് ! ആദി കുട്ടൻ അഞ്ജുവിന്റെ മടിയിൽ ആണ് . മഞ്ജുസും അമ്മയും അടുക്കളയിലാകാൻ ആണ് സാധ്യത . ആ പരിസരത്തെങ്ങും അവരെ കാണുന്നില്ല .

ഷർട്ടിന്റെ കൈചുരുട്ടി സ്റ്റെയർ കേസ് ഇറങ്ങി വരുന്ന എന്നെ നിലത്തിരുന്ന റോസ് മോള് കണ്ടതോടെ അവളുടെ മുഖത്ത് നുണക്കുഴി വിരിഞ്ഞുള്ള ചിരി തെളിഞ്ഞു .കറുത്ത കുഞ്ഞു ഫ്രോക് ആണ് റോസിമോളുടെ വേഷം . ആദികുട്ടൻ ആണേൽ ട്രൗസര് മാത്രേ ഇട്ടിട്ടുള്ളൂ !

“അ..ച്ചാ..ച..”
പെണ്ണ് എന്നെ നോക്കി കൈകൊട്ടികൊണ്ട് മുട്ടിലിഴയാൻ തുടങ്ങി .

“ദേ പോണൂ സാധനം ”
റോസ് മോളുടെ ആക്രാന്തം കണ്ടു അഞ്ജു തലക്കു കൈകൊടുത്തു .

“ച്ചാ ..ചാ ..”
പെണ്ണ് ചിണുങ്ങിക്കൊണ്ട് തന്നെ എന്റെ നേരെ മുട്ടുകുത്തി. ഞാൻ അപ്പോഴേക്കും വേഗം ഓടിച്ചെന്നു അവളെ വാരിയെടുത്തു കവിളിൽ ഉമ്മവെച്ചു .

“ചാച്ചാ അല്ല പൂച്ച …എവിടേക്കാടി പെണ്ണെ നീ കിടന്നു പായുന്നെ ..”
ഞാൻ റോസ് മോളെ നോക്കി കണ്ണുരുട്ടി . പക്ഷെ പെണ്ണിന് ഞാൻ എന്ത് പറഞ്ഞാലും തമാശ ആണ് . അതുകൊണ്ട് തന്നെ അതിനും കുലുങ്ങിയുള്ള ചിരി ആണ് മറുപടി .