Chapter Title : 🏘️ബോസ്റ്റൻ ബംഗ്ലാവ് 5 [Gladiator]

കടുത്ത ശബ്ദത്തിൽ ഡെയ്സി ചോദിച്ചു.

“കം…ലേറ്റ്സ് ഗോ…”പേടിച്ച സ്വരത്തിൽ ഡാനിയേൽ പറഞ്ഞു. ഡാനിയേൽ ആ പുരുഷ ശബ്ദം മനസിലാക്കിയിരുന്നു, അന്ന് രാത്രി കേട്ട അതേ ശബ്ദം.. അതേ ഇത് തന്നെയാണ് ഫെഡറിക്ക്…കത്രീനയുടെ ഭർത്താവ്…ഈ വീട് എന്താ പ്രേതങ്ങളുടെ തറവാടാണോ എന്നവൻ ആലോചിച്ചു.

ഫെഡറിക്ക് അപ്പോഴേക്കും അവരുടെ അടുത്തേക്ക് നടന്നു തുടങ്ങിയിരുന്നു.ഫെഡറിക്ക് അടുക്കുന്നത് കണ്ട ഡാനിയേൽ ഡെയ്സിയുടെ കൈകളിൽ പിടിച്ചു വലിച്ചു “വാ…ഓട്” അവൻ അലറി.ഡെയ്സിയും അവനും ഓടി.

“ഡാനി…എന്താ നടക്കുന്നത്..?” എന്തിനാടാ ഓടുന്നെ…ഇത് നമ്മുടെ വീടാ…” ഓട്ടത്തിനിടയിൽ അവൾ ചോദിച്ചു.

വന്ന വഴിയേ അവർ തിരികെ ഓടി.

“അവിടെ നില്ലെടാ കള്ളന്മാരെ…രണ്ടിനെയും ഞാൻ കൊല്ലും”ഫെഡറിക്കിന്റെ സ്വരം കോപം കൊണ്ട് വിറച്ചു..

ഡാനിയേൽ ഓടുന്നതിനിടയിൽ തോൾ ചരിച്ചു പിറകിലേക്ക് നോക്കി. തങ്ങളുടെ പിന്നാലെ ഓടിയ ഫെഡറിക്ക് ഒരു മൂലയിലായി ഓട്ടം മതിയാക്കി തങ്ങളെ നോക്കി നിൽക്കുന്നത് അവൻ കണ്ടു.ഫെഡറിക്കിന്റെ മനസിലെ ദേഷ്യം ആ മുഖത്ത് പ്രകടമായിരുന്നു..ഫെഡറിക്ക് ഓട്ടം നിർത്തി അവിടെ നിന്നത് കണ്ടപ്പോൾ ഡാനിയുടെ മനസിന്‌ അല്പം ആശ്വാസം തോന്നി. എന്നാൽ ഓട്ടത്തിലെ ശ്രദ്ധ തെറ്റിയ ഡാനിയേൽ ഒരു ഉരുളൻ കല്ലിൽ കാൽ ചവിട്ടി തെന്നി മുട്ടോളം വളർന്നു കിടന്ന പുല്ലിലേക്ക് തെറിച്ചു വീണു. കല്ലിൽ ചവിട്ടിയ നിമിഷം തന്നെ അവന്റെ കാൽപാദത്തിൽ നിന്നും “ക്ട്ക” ശബ്ദം അവൻ കേട്ടു.

നിലത്തു വീണ ഡാനിയെ എങ്ങനെയൊക്കെയോ  അവൾ പിടിചെഴുന്നേൽപ്പിച്ചു. ഞൊണ്ടി ഞൊടി ഡാനിയേൽ ഡെയ്സിയുടെ കൂടെ ബംഗ്ലാവിന് ഉള്ളിൽ കയറി കതക് അടച്ചു.അടച്ച കതകിൽ ചാരി നിന്ന അവർ പരസ്പരം നോക്കി.

“ദാറ്റ്‌ വാസ് ക്രേസി”പരിഭ്രമത്തോടെ അവൾ ചിരിച്ചു.