Chapter Title : കല്യാണം....പാലുകാച്ചൽ....[പളുങ്കൂസൻ]

അയാളുടെ മക്കളിൽ ഏക പെൺതരി ആതിര നാളെ സുമംഗലി ആവുകയാണ്.ഇതിന് ആർഭാടമില്ലെങ്കിൽ പിന്നെ എന്തിനാണ് ആർഭാടം വേണ്ടത് ?.പുറത്തു നാട്ടുകാർ വന്നും പോയും കൊണ്ടിരുന്നു . രാമചന്ദ്രനും ഭാര്യ സുധയും അവരെ സ്വീകരിച്ചിരുത്തിക്കൊണ്ടു നിന്നു .

പുറത്തു നാട്ടുകാരുടെ ബഹളം നടക്കുമ്പോൾ അകത്തു വീട്ടുകാരുടെ ഉത്രാടപ്പാച്ചിൽ തകൃതിയായി നടന്നു.രാമചന്ദ്രന്റെ പെങ്ങൾ രമ ചടങ്ങുകൾക്ക് വേണ്ട സാധനങ്ങൾ ഒരുക്കുകയാണ് .അയാളുടെ ഇരട്ടകളായ മൂത്ത മക്കൾ അഭിലാഷും അഭിജിത്തും ആണ് നാളേക്ക് വേണ്ട കാര്യങ്ങൾ മൊത്തം കോഡിനേറ്റ് ചെയ്യുന്നത്. അവരുടെ ഇരട്ടകളും അതുപോലെ പരട്ടകളും ആയ ഭാര്യമാർ - വിദ്യ,ദിവ്യ എന്നിവർ മണവാട്ടിയുടെ ഒരുക്കത്തിനും ഡ്രസിങ്ങിനും നേതൃത്വം നൽകുന്നു .

എല്ലാത്തിനും ഇടയിലൂടെ ക്യാമറയും തൂക്കി എല്ലാരുടേം ഫോട്ടോ എടുത്ത് നടക്കുകയാണ് കുടുംബത്തിലെ ഏറ്റവും ഇളയ കണ്ണി - രാമചന്ദ്രന്റെ പെങ്ങൾ രമയുടെ മകൻ -അപ്പു. അതുൽ എന്നോ മറ്റോ ആണ് യഥാർത്ഥ പേര് .ഒരു girlfriend പോലുമില്ലാത്ത തൻറെ മനോവിഷമം തരുണീമണികളുടെ ഫോട്ടോ എടുത്ത് നികത്താൻ ശ്രമിക്കുകയാണവൻ .വിജയമാമാന്റെ മകൾ അശ്വതി മുന്നിൽ നിൽക്കുന്നുണ്ട് .അവളുടെ ഏതോ കൂട്ടുകാരികളുമായി എന്തോ വലിയ വർത്തമാനത്തിലാണ്. പെട്ടന്ന് ആരോ ഒരു തമാശ പറയുന്നു , അവൾ പൊട്ടിച്ചിരിക്കുന്നു .
അവൻ കാമറ കണ്ണോടു ചേർത്ത്, ഫോക്കസ് ചെയ്തു.ഒരു നിമിഷത്തെ കാത്തിരിപ്പ്,

"ക്ലിക്ക് ".

'perfect '...അവൻറെ ചുണ്ട് മന്ത്രിച്ചു .

"അപ്പൂ...ഇവിടെ വാ ..."
ദൂരെ നിന്നൊരു ശബ്ദം .അവൻ അറിയാതെ മനസ്സിൽ പ്രാകി."തേങ്ങാക്കൊല! ഈ സമയത്ത് ആരെ കെട്ടിക്കാനാ ?" അവൻ ചുറ്റും നോക്കി.അതിരച്ചേച്ചിയുടെ റൂമിൽനിന്നാണ് ശബ്ദം . "അപ്പൂ..."