Chapter Title : കനി [RT]

അവളുടെ മുലകളുടെ കാൽ ഭാഗവും. അതുപോലെ അയാളും കണ്ടു കാണില്ലേ?

തല പെരുത്തു ഹന്നയ്ക്ക്.

തന്റെ വിധി ഇതാണ്.
പക്ഷെ പൊരുത്തപ്പെടാൻ ആവുന്നില്ല.
ആഗ്രഹിച്ചു മോഹിച്ച് വിവാഹം കഴിക്കുന്ന പുരുഷൻ ശരീരം കാണുന്നത് പോലാണോ മറ്റൊരുവൻ!

എഴുന്നേറ്റ് ഗ്ലാസിൽ വെള്ളം പകർന്നെടുത്ത് ദാഹമകറ്റി.

സമയം എന്തായിക്കാണും?

ജനാലയുടെ ഒരു പാളി തുറന്ന് ആകാശത്തേക്ക് നോക്കി. കിഴക്ക് വെള്ളി കീറുന്നു. നമസ്കാര സമയം കഴിഞ്ഞു കാണും. ഇന്നലത്തെ സുബഹിയാണ് അവസാനമായി നമസ്കരിച്ചത്. ഇത് വരെ മുടക്കിയിട്ടില്ല. എന്നിട്ടും പടച്ചവൻ കൈ വിട്ടു കളഞ്ഞില്ലേ എന്നെ? അവൾക്ക് താൻ ആരാധിക്കുന്ന ദൈവത്തോട് ജീവിതത്തിൽ ആദ്യമായി ദേഷ്യം തോന്നി.

ജനൽ അടച്ച് തിരിച്ചു വന്ന് ചാരി വച്ച വാതിൽ തുറന്നു നോക്കി. ഹാളിലേക്ക് ഇറങ്ങുമ്പോൾ നേരിയ വെളിച്ചം വീണിട്ടുണ്ട്. അതുകൊണ്ട് തന്നെ ലൈറ്റ് ഇട്ടില്ല. ഒറ്റ നോട്ടത്തിൽ പുറത്തേക്കിറങ്ങാൻ ഒരു വാതിലും മറ്റൊരു വാതിലും കണ്ടു പിടിച്ചു. എന്നിട്ടാണ് ദിവാൻ കോട്ടിൽ കിടന്നുറങ്ങുന്ന ആളെ കണ്ടത്.

ഹന്ന അടിമുടി വിറച്ചു പോയി.

“അല്ലോഹ്! ഇയാളിവിടെ ഉണ്ടായിരുന്നോ?”

അയാളെ ഓർക്കുമ്പോൾ തന്നെ ഹന്നയ്ക്ക് കൈയും കാലും വിറയ്ക്കും. അതുപോലെയായിരുന്നു ഇന്നലത്തെ പെർഫോമൻസ്.

കൈലാസ് എന്നാണ് അയാളുടെ പേര്.
ജോലി അങ്ങനെ ഇന്നത് എന്നൊന്നുമില്ല.
ടൈൽസ്, പ്ലമ്പിങ്, മേസ്തിരിപ്പണി, കൃഷിപ്പണി, ഡ്രൈവിംഗ് അങ്ങനെ എന്തും ചെയ്യും.

ഹന്ന അയാളെ ഇതിന് മുന്നേ എപ്പോഴൊക്കെയോ കണ്ടിട്ടുണ്ട്. അവൾ ബസ്റ്റോപ്പിൽ നിൽക്കുമ്പോഴൊക്കെ ഒരു കവറുമായി അയാൾ നടന്നു പോകുന്നത് കാണും. ചിലപ്പോഴൊക്കെ ബുള്ളറ്റിലും.

അവളുടെ കൂട്ടുകാരി രഹന കൈലാസ് ദൂരെ നിന്ന് വരുന്നത് കാണുമ്പോഴേ കൊക്കി തുടങ്ങും.