Chapter Title : മന്ദാരക്കനവ് 7 [Aegon Targaryen]

കഴുകി വെള്ളത്തിൽ ഇട്ട ശേഷം വാങ്ങിക്കൊണ്ട് വന്ന കോഴി ഒന്നുകൂടി ചെറിയ കഷ്ണങ്ങൾ ആക്കി അത് വീണ്ടും കഴുകി വൃത്തിയാക്കി.

അവൻ ഓരോന്നോരോന്നായി അവൻ്റെ തയ്യാറെടുപ്പുകൾ തുടർന്നു. കോഴിക്കറിക്ക് ആവശ്യമായ ഉള്ളി, സവാള, ഇഞ്ചി, പച്ചമുളക്, തക്കാളി മുതലായ സാധനങ്ങൾ അവൻ അരിഞ്ഞ് ഒരു പാത്രത്തിലേക്ക് മാറ്റി വച്ചു.

അതിന് ശേഷം അവൻ മറ്റു കറികൾക്കും കൂട്ടാനും വേണ്ടിയുള്ള പണികൾ തുടർന്നു. മോരുകറിയും, ചമ്മന്തിയും, ഒരു മെഴുക്കുവരട്ടിയും അവൻ ആദ്യം തന്നെ ഉണ്ടാക്കി. അതിനിടയിൽ അരി അടുപ്പത്ത് നിന്നും വാങ്ങി വെക്കുകയും ചെയ്തു. അപ്പോഴേക്കും സമയം പതിനൊന്ന് കഴിഞ്ഞിരുന്നു.

അടുത്തതായി ഉടനെ തന്നെ കോഴിക്ക് വേണ്ടിയുള്ള അരപ്പ് തയ്യാറാക്കിയ ആര്യൻ അടുപ്പിലേക്ക് ചട്ടി വച്ച ശേഷം അതിലേക്ക് എണ്ണ ഒഴിക്കാൻ കുപ്പിയുടെ അടപ്പ് തുറന്നതും ആരോ വാതിലിൽ മുട്ടുന്ന ശബ്ദം കേട്ട് നോക്കാൻ ചെന്നു. ആര്യൻ ഹാളിൽ എത്തിയപ്പോഴേക്കും ശാലിനി വാതിൽ തുറന്ന് അകത്തു കയറിയിരുന്നു.

"ആഹാ ഇതെന്താ നേരത്തേ…അമ്മൂട്ടിയും അമ്മയും എന്തിയേ…?"

അകത്തേക്ക് കയറിയ ശാലിനിയെ കണ്ട് ആര്യൻ സംശയത്തോടെ ചോദിച്ചു.

"ഞാൻ ഒന്ന് ചുമ്മാ വന്നതാടാ ചെക്കാ നിനക്ക് എന്തെങ്കിലും സഹായം വേണോ എന്ന് അറിയാൻ…"

"എനിക്കൊരു സഹായവും വേണ്ടേ…" ആര്യൻ അൽപ്പം നീട്ടി പറഞ്ഞു.

"വേണ്ടെങ്കിൽ വേണ്ട…എവിടെ വരെയായി നിൻ്റെ കലാവിരുത്…?"

"വാ കാണിക്കാം…ആ വാതിൽ അടച്ചിട്ട് പോരേ ചേച്ചീ…" ആര്യൻ ശാലിനിയോട് പറഞ്ഞിട്ട് തിരിഞ്ഞ് നടന്നു.

ശാലിനി വാതിൽ അടച്ച ശേഷം അടുക്കളയിലേക്ക് ചെന്നു. പാതകത്തിൽ കഴുകി ഒരു പാത്രത്തിൽ വച്ചിരിക്കുന്ന ഇറച്ചി കഷ്ണങ്ങൾ, ചെറുതായി അരിഞ്ഞ് വച്ചിരിക്കുന്ന പച്ചക്കറികൾ, ആര്യൻ ഉണ്ടാക്കി വച്ചിരിക്കുന്ന മറ്റു കൂട്ടുകറികൾ എല്ലാം ശാലിനിയുടെ ശ്രദ്ധയിൽപ്പെട്ടു.

"ആഹാ തകൃതിയായി നടക്കുന്നുണ്ടല്ലോ കാര്യങ്ങൾ…!" ശാലിനി ഒരു ഉത്സാഹത്തോടെ പറഞ്ഞു.

"പിന്നെ കുട്ടിക്കളി ആണെന്ന് വിചാരിച്ചോ…?" ആര്യൻ ചൂട് ചട്ടിയിലേക്ക് എണ്ണ ഒഴിച്ചുകൊണ്ട് അൽപ്പം ഗൗരവത്തോടെ തിരിച്ച് ചോദിച്ചു.

"ശെടാ…ഒന്ന് പ്രോത്സാഹിപ്പിക്കാനും പറ്റില്ലേ…!?"

"ഓ പ്രോത്സാഹിപ്പിച്ചതാണോ? സോറി…ക്യാരി ഓൺ ക്യാരി ഓൺ…"

ആര്യൻ അരിഞ്ഞ് വച്ചിരുന്ന സവാള എണ്ണയിലേക്ക് ഇട്ട ശേഷം അതിൻ്റെ മുകളിലേക്ക് പച്ചമുളകും, ഇഞ്ചിയും വെളുത്തുള്ളിയും അരച്ചതും,