Chapter Title : മരുമകൾ 2 [ഹേമ]

മോളേ അവനേക്കൊണ്ട് ഇതൊക്ക ചെയ്യിക്കണം എനിക്കിത്തിരി ജോലിയുണ്ട്....കഴിക്കാറാവുമ്പോൾ ഞാൻ വരാം...."രാമേട്ടൻ വെളിയിലേക്ക് നടന്നു.ഞാൻ ഫോണെടുത്ത് ഏട്ടനെ വിളിച്ചു.
"ഏട്ടാ....വരുമ്പം ഒരു ബ്ലേഡും ഷേവിംഗ് സെറ്റും വാങ്ങി വരണം..." ഞാൻ പറഞ്ഞു. ഏട്ടൻ സമ്മതിച്ചു.ഞാൻ അടുക്കളയിലേക്ക് നടന്നു.
അമ്മയും അമ്മായിയും തിരക്കിട്ട ജോലിയിലാണ്.
"എന്റെ സഹായം വേണോ....."ഞാൻ ചോദിച്ചു.
"അയ്യോടീ.......സഹായിക്കാൻ പറ്റിയ ആള്...." അമ്മായി എന്നെ കളിയാക്കി.
"മോള് ആ സ്റ്റൂളിൽ ഇരുന്നോ....സഹായം ആവശ്യമുള്ളപ്പോ അമ്മായി പറയാം...."അമ്മായി പറഞ്ഞു.
"നീയാ...അവളെ വഷളാക്കുന്നത് പെണ്ണുങ്ങളായാൽ
അടുക്കളപ്പണിയൊക്കെ പഠിക്കണം...." അമ്മ ദേഷ്യപ്പെട്ടു.
"നമ്മക്ക് വയ്യാതായാ അവളല്ലേ നോക്കേണ്ടത് ഇപ്പോ അവള് കുറച്ച് വിശ്രമിക്കട്ടെടീ നമ്മുടെ മോളല്ലേ അവള്...."അമ്മായി അമ്മയോട് പറഞ്ഞു.
"അല്ലെങ്കിലും ഈ അമ്മക്ക് എന്നോടൊരു സ്നേഹവുമില്ല....."ഞാൻ പരിഭവിച്ചു.
"അയ്യട സ്നേഹിക്കാൻ പറ്റിയ സാധനം....."അമ്മ ചിരിച്ചുകൊണ്ട് എന്നെ നോക്കി.
"മോള് പോയി ടിവി കണ്ടോ....നീയിവിടിരിക്കുന്നത്
നിന്റമ്മക്ക് ഇഷ്ടപ്പെടുന്നില്ല...." അമ്മായി പറഞ്ഞു.
"ഏടീ...മരുമക്കളെ നിലക്ക് നിർത്തണം....."അമ്മ പറഞ്ഞു.
"പോടീ....അവളെന്റെ മരുമോളല്ല മോളാ...."അമ്മായി പറഞ്ഞു.
"അമ്മായി അതൊന്നും കേൾക്കണ്ട ഇന്നലത്തെ കഥേടെ ബാക്കി പറ....."ഞാൻ പറഞ്ഞു.അപ്പോഴേക്കും ലാൻഡ് ഫോൺ ശബ്ദിച്ചു.
അമ്മായി ഫോണെടുത്തു.
"ഹലോ....." അമ്മായി അപ്പുറത്ത് നിന്നും പറയുന്നത് മുഴുവൻ കേട്ടു.
" വൈകിട്ട് മോൻ വന്നിട്ട് ആലോചിച്ച് പറയാം...."അമ്മായി ഫോൺ വച്ചു.
"എന്താ....അമ്മായീ.....ആരാ വിളിച്ചത്..."ഞാൻ പച്ചക്കറിയിൽ നിന്നും ഒരു കാരറ്റെടുത്ത് കടിച്ചുകൊണ്ട് ചോദിച്ചു.
"അതാ..... മേനോൻസാറാ...വിളിച്ചത് നമ്മുടെ പറമ്പിന് പുറകിൽ കിടക്കുന്ന പത്തേക്കർ റബ്ബറില്ലേ അത് വിൽക്കാൻ പോകുവാണെന്ന്.നമ്മുടെ കയ്യിലാണെങ്കിൽ എസ്റ്റേറ്റ് വിറ്റ പണം മുഴുവൻ ബാങ്കിലൊണ്ട് അത് വാങ്ങിയാലോ എന്ന് തോന്നി രാമേട്ടനോട് ചോദിച്ചിട്ട് അഭിപ്രായം പറയാം....." അമ്മായി പറഞ്ഞു.