Chapter Title : ഓണക്കളി 3 [മിക്കി]

ഒരു ടോർച്ചും

<ആ നിമിഷം അയാൾ ആ പഴയ മുരടൻ സ്വഭാവമുള്ള അജി ആവുകയായിരുന്നു, ഒന്നിനേയും ഭയമില്ലാത്ത, കണ്ടാൽ ഏതൊരു മനുഷ്യനും ഭയക്കുന്ന, എന്തിനേയും നേരിടാൻ ചങ്കുറപ്പുള്ള ആ പഴയ മുരടൻ അജി>

***===

അജിയുടേയും, ഭദ്രന്റേയും, പ്രസാദിന്റേയും, ഒരേഒരു സഹോദരിയായ ലക്ഷ്മിയുടെ ഭർത്താവിന്റെ (വിഷ്ണുവിന്റെ അച്ഛൻ) മരണശേഷം  ലക്ഷ്മിയുടെ ഭർത്താവിന്റെ വീടിനോട് ചേർന്ന് റോഡുസൈഡിലായ് 90 സെന്റ് ഭൂമി അജി വാങ്ങിയിരുന്നു, അതിൽ 47 സെന്റിൽ വലിയൊരു മുറ്റം അടങ്ങുന്ന ഒരു ആഡംബര വീടങ്ങുവച്ചു, വീടിന് പിന്നിലോട്ട് കിടക്കുന്ന ബാക്കി 53 സെന്റിൽ പല തരം കൃഷികളും ‘ചീനി, ചേമ്പ്, കാച്ചിൽ, വഴുതന, വേണ്ട’ അങ്ങനെ പലതും…, കപ്പച്ചീനിയാണ് കൂടുതലും, വിഷ്ണുവിന്റെ വീടിന് പിന്നിലോട്ട് കിടക്കുന്ന 30 സെന്റ് ഭൂമിയിലും ഈ പറഞ്ഞതുപോലെ പലതരം കൃഷികളാണ്, രാത്രിയിൽ കൃഷിയുടെ വിളവ് തിന്നാൻ കാട്ടുപന്നികൾ കൂട്ടത്തോടെ ഇറങ്ങും, അജിയും, ഭദ്രനും, പ്രസാദും ചേർന്ന് ഒരുപാട് കാട്ടുപന്നികളെ കെണി വച്ചും, വെടി വച്ചും പിടിച്ചിട്ടുണ്ട്, കുറച്ച് നാളുകളായി കാട്ടുപന്നിയുടെ ശല്യമൊന്നും ഇല്ലാതെ ഇരുന്നതിനാൽ  കെണിയൊന്നും മുൻകൂട്ടി ഒരുക്കിയിരുന്നില്ല,

കൃഷിസ്ഥലത്തേക്ക് ആവശ്യമായ പണി സാധനങ്ങളും വീട്ടിലെ പഴയ സാധനങ്ങളും സൂക്ഷിക്കാനായി രണ്ട് കൃഷി സ്ഥലത്തും ഓരോ ചരിപ്പ് (തൊഴുത്തുപോലെ) കെട്ടി നിർത്തിയിട്ടുണ്ട്, പന്നി ഇറങ്ങുമെന്ന് ഉറപ്പുള്ള ദിവസങ്ങളിൽ മൂന്നുപേരും ചേർന്ന് പന്നിയെ കുരുക്കാൻ കെണി ഒരുക്കിയ ശേഷം ആ ചരുപ്പിലാണ് വന്ന് വിശ്രമിക്കാറ്..  ഒപ്പം നേരത്തെ കൈയ്യിൽ കരുതിയിരുന്ന നല്ല വാറ്റ് ചാരായവും.. ഒന്നെങ്കിൽ പന്നിയെ കെണി വച്ച് പിടിക്കും, അല്ലെങ്കിൽ ഇരട്ടക്കുഴൽ തോക്കുകൊണ്ട് പയറ്റും..

***===

ഒരു കയ്യിൽ ടോർച്ചും മറുകയ്യിൽ ഇരട്ടക്കുഴൽ തോക്കും കറക്കികൊണ്ട് ഞാൻ റൂമിന്റെ വാതിൽ തുറന്ന് ഹാളിലേക്കിറങ്ങി.. നേരെ ഭദ്രന്റെ മുറിയിലേക്ക് ചെന്നു, അവൻ നല്ല ഉറക്കമാണ്, കൃഷിസ്ഥലത്ത് പന്നി ഇറങ്ങിയതൊന്നും അവൻ അറിഞ്ഞിട്ടില്ല അറിഞ്ഞിരുന്നെങ്കിൽ അവനാകും ആദ്യം തോക്കുമെടുത്ത് ഇറങ്ങുക, അവനെ വിളിച്ചുണർത്താൻ എനിക്ക് മനസ്സ് വന്നില്ല, ഇന്ന് കുറേ ആവശ്യങ്ങൾക്കായ് ഓടി നടന്നതല്ലെ ഉറങ്ങട്ടെ എന്ന് കരുതി, അവന്റെ റൂമിന്റെ വാതിൽ ചാരി പുറത്തേക്കിറങ്ങിയ ഞാൻ നേരെ പ്രസാദിന്റെ മുറിയിലേക്ക് ചെന്നു,