Chapter Title : ഒരിക്കൽക്കൂടി...1 [ഋഷി]

തലയണയോടു ചേർന്ന് കിടപ്പാണ്! എബി തിരിഞ്ഞ് മത്തായീടെ മിനുത്ത രോമങ്ങൾ പൊതിഞ്ഞ വശത്ത് മെല്ലെ തഴുകി.. പാതി മയക്കത്തിൽ അവൻ തിരിഞ്ഞ് എബിയുടെ കയ്യിലൊന്നു നക്കി. എബിയുടെ ഹൃദയം മെല്ലെ ശാന്തമായി.

എബി മൊബൈലെടുത്തു. അഞ്ചരമണി! അവൻ മത്തായിയേം വാരിയെടുത്ത് താഴേക്ക് പോയി. സോഫയിൽ മത്തായിയെ കിടത്തി കഴിഞ്ഞ ദിവസത്തെപ്പോലെ കട്ടനിട്ടു. സിങ്കിൽ മുഖം കഴുകി വെളിയിൽ ചെന്നിരുന്നു. മത്തായി വന്നവന്റെ മടിയിൽ വലിഞ്ഞുകയറി.... അവന്റെ കണ്ണുകൾ പാതിയടഞ്ഞു.

മുഛേ മാർ ഡാലാ ഗയാ ധാ..എന്നെ കൊന്നതാണ്! ഇപ്പോൾ ആ സ്വരം ഇത്തിരി കനത്ത പുരുഷസ്വരമായി. അവനൊന്നു ഞെട്ടി. കണ്ണുകൾ തുറന്നു. തുടയിൽ ചൊറിച്ചിൽ... ഇട്ടിരുന്ന കാക്കി ചീനോസിന്റെ പോക്കറ്റിൽ കൈകടത്തി ചൊറിഞ്ഞപ്പോൾ എന്തോ വിരലുകളിൽ തടഞ്ഞു. മത്തായിയെ ഭദ്രമായി താഴെയിറക്കി അവനെണീറ്റു. ഒരു കടലാസ് പൊതി. തുറന്നു നോക്കിയപ്പോൾ ഒരേലസ്സ്. ശംഖിന്റെ ആകൃതിയിലുള്ള ഇത്തിരി പരന്ന ഒരു കട്ടിയുള്ള പതക്കം! പൊതിഞ്ഞ കടലാസ് നിവർത്തിയപ്പോൾ ഒരു നമ്പർ കുറിച്ചിട്ടിരിക്കുന്നു. മൊബൈലാണെന്നു തോന്നി. പതക്കമവനൊന്നമർത്തി. ഓ... രണ്ടുപാളികളായി തുറക്കുന്നു! പതക്കത്തിൻ്റെയുള്ളിൽ ദേവനാഗരിയിൽ കൊത്തിയ ഒരു പേര്. കുമുദ്! അവനാ നമ്പർ കുമുദിൻ്റെ പേരിൽ സേവു ചെയ്തു. വാട്ട്സാപ്പിൽ കണക്റ്റു ചെയ്തപ്പോൾ ഡീപിയിൽ ഇന്നലെ കണ്ട സുന്ദരിയായ മറാട്ടി സ്ത്രീ! അവളുടെ കണ്ണുകളിലെ തിളക്കം! കഴുത്തിലണിഞ്ഞ കുരിശു മാലയിൽ അവനാ ഏലസ്സു കോർത്തു.

ഇത്തിരി ദൂരത്ത് എന്തോ നീങ്ങുന്നതു കണ്ടു. കഴുത്തറ്റം മാത്രമുള്ള തിളങ്ങുന്ന മുടിയുടെ ചലനം... അവൾ തല വെട്ടിച്ചപ്പോൾ... ടീനാ... അവനിത്തിരി ഉറക്കെ വിളിച്ചു.. പക്ഷേ അവൾ തിരിഞ്ഞു നോക്കാതെ കണ്ണുകളിൽ നിന്നും മറഞ്ഞു.

എബിക്കിത്തിരി വിഷമം തോന്നി. പിന്നെയത് കുടഞ്ഞു കളഞ്ഞ് അകത്തേക്ക് പോയി. ഒരു വള്ളിച്ചെരുപ്പുമെടുത്തിട്ട് മത്തായിയേം കൊണ്ടു നടക്കാൻ പോയി. റോഡിന്റെയരികത്തുള്ള നനവുള്ള പുല്ലിലൂടെ മത്തായി ഓടി നടന്നു. ഇത്തിരി ദൂരത്തു ചെന്ന് നടന്നുവരുന്ന എബിയെ നോക്കും. പിന്നീട് കുതിച്ചു ചാടി അവന്റടുത്തേക്കോടും. ഇടയിലൊന്നു രണ്ടു ചാവാലിപ്പട്ടികൾ മുരണ്ടപ്പോൾ അവനെബിയുടെ പിന്നിലഭയം തേടി. എബി കല്ലുകൾ പെറുക്കിയെടുക്കാൻ കുനിഞ്ഞപ്പോൾ അവന്മാരോടി..

രാവിലത്തെ നേരിയ തണുപ്പിൽ മത്തായീടെ ഒപ്പം നടന്നപ്പോൾ എബിയുടെ ടെൻഷനെല്ലാം അലിഞ്ഞുപോയി...