Chapter Title : ഒരിക്കൽക്കൂടി…2 [ഋഷി]

നീട്ടിയ ടെക്കീല ഷോട്ടുകൾ എബി രണ്ടെണ്ണം വിഴുങ്ങി. ഒപ്പം ഫ്രെഡ്ഡി ചടുലതയോടെ ഗ്യാസ് സ്റ്റൗവിൽ പാൻ വെച്ച് ഇത്തിരിയെണ്ണയൊഴിച്ച് പൊരിച്ചെടുത്ത നെയ്മീൻ കഷണങ്ങൾ... ആഹ്... അവനൊന്നു റിലാക്സ് ചെയ്തു.

എങ്ങിനെയുണ്ട് ബ്രോ! തടിയൻ എതിരേ ഇരുന്ന് ഒരു ബിയർ പൊട്ടിച്ചുകൊണ്ടു ചോദിച്ചു.

മനോഹരം. എബി പറഞ്ഞു. ഈ ബോട്ടുകൾ? അവൻ വിരലു ചൂണ്ടി.

പാർട്ട്ണറുടെയാണ്. ബിസിനസ്സിന് ദുബായിൽ പോയിരിക്കുന്നു... നമുക്കൊരു ബോട്ട് ട്രിപ്പായാലോ?

ഞാൻ റെഡി. എബിയെണീറ്റു.

ശാന്തമായ കടൽപ്പരപ്പിൽ ബോട്ടു മെല്ലെ നീങ്ങി... എബിയും ഫ്രെഡ്ഢിയും ഈരണ്ടു ടെക്കീല കൂടി അകത്താക്കി... എബി ചാഞ്ഞിരുന്നു... വെളുത്ത മേഘങ്ങൾക്കു പിന്നിൽ മറഞ്ഞ സൂര്യൻ.. ഇപ്പോൾ ചൂടില്ല. തണുത്ത കടൽക്കാറ്റവനെ പൊതിഞ്ഞു... കണ്ണുകളടഞ്ഞു പോവുകയാണ്...

ആരാണ് നീ? മൂർച്ചയുള്ള പരുത്ത സ്വരം. എബി കണ്ണുകൾ തുറന്നു.

ഫ്രെഡ്ഡി! തൊട്ടുമുന്നിൽ നിൽക്കുന്നു. അവൻ്റെ കണ്ണുകൾ ഇപ്പോൾ ചിരിക്കുന്നില്ല.

എബി എണീക്കാൻ ശ്രമിച്ചു. കഴിഞ്ഞില്ല.. കൈകളുയർത്താൻ പണിപ്പെട്ടു... ഇത്തിരി ഉയർത്തി.... ആകപ്പാടെ ഒരു മന്ദത... അവൻ ചുറ്റിലും നോക്കി... നടുക്കടലിലാണ്... തീരം കാണാനില്ല.

ഫ്രെഡ്ഡീ! അവൻ വിളിച്ചു. ഞാനെബിയാണ്!

എബി! ഫ്രെഡ്ഡിയുടെ ശബ്ദത്തിൽ പുച്ഛം കലർന്നു. അവൻ്റെ പുറം കൈ എബിയുടെ മുഖത്തു പതിച്ചു.. അയ്യോ! ശരിക്കും നൊന്തു...

ഫ്രെഡ്ഡി കുനിഞ്ഞ് എബിയുടെ കഴുത്തിലെ ജപമാല ഉയർത്തി. അതിൽ കൊരുത്ത ഏലസ്സിൽ നോക്കി.

ആ തന്തയില്ലാത്തവൻ്റെ ഏലസ്സ് നിൻ്റെ കയ്യിലെങ്ങിനെ വന്നു?

അതമ്മച്ചി... എബി പറഞ്ഞുതുടങ്ങി.. ഫ്രെഡ്ഡി വീണ്ടും കൈ ഉയർത്തി...

ഇവിടെ നിന്നും കിട്ടിയതാണ്! അവൻ പെട്ടെന്നു സത്യം പറഞ്ഞു...

ആരു തന്നു?

കുമുദ്! എബിയുടെ നാവിൽ നിന്നും ആ പേരു വീണപ്പോൾ തടിയനൊന്നു ഞെട്ടി.

നീയെങ്ങനെ അന്നാ ഷെഡ്ഡിൽ നിന്നും രക്ഷപ്പെട്ടു?

ഇത്തവണ എബിയാണ് ഞെട്ടിയത്! അപ്പോൾ നീയാണ് നൊറീൻ്റെ സഹായി.. അവൻ വിറയ്ക്കുന്ന സ്വരത്തിൽ പറഞ്ഞു..

സഹായിയോ! തടിയനുറക്കെച്ചിരിച്ചു... വീ വേർ ലവേർസ് ആസ്സ്ഹോൾ! അവൻ്റെ മുഖമിരുണ്ടു... അവളെൻ്റെയെല്ലാമായിരുന്നു! എബി പിന്നെയും ഞെട്ടി.

ഞാനാണ് നിന്നെ ഇടിച്ചു താഴെയിട്ട് ഷെഡ്ഡിൽ കെട്ടിയിട്ടത്. വേറൊരാവശ്യമുണ്ടായിരുന്നു...അതാണ് പോയത്. അല്ലെങ്കിൽ നിൻ്റെ കഥ അന്നേ തീർന്നേനേ!

തടിയൻ്റെ കൈകൾ എബിയെ കുത്തിനുപിടിച്ചു പൊക്കി.