Chapter Title : ഒരു ബ്ലാക് മെയിലിങ് അപാരത [Dr. Wanderlust]

എന്റെ കാൽക്കൽ ഇരുന്നു കൈകൂപ്പി.. "രക്ഷിക്കണം കുഞ്ഞേ..ഞങ്ങളെ കൊല്ലാൻ വിട്ട് കൊടുക്കല്ലേ."

എന്റെ കാലിൽ പിടിച്ചു കരയുന്ന ജോസിനെ ആലീസ് അവജ്ഞയോടെ നോക്കി, അത് കണ്ടു ഞാനൊന്ന് ചിരിച്ചു.

"ജോസേ... എഴുന്നേൽക്കു വാ നമുക്കൊന്ന് മാറി നിന്ന് സംസാരിക്കാം..ആലീസേ ഒരു മിനിറ്റ് " ഞാൻ എഴുന്നേറ്റു കിച്ചണിലേക്ക് നടന്നു. ജോസ് പിന്നാലെ നായയെ പോലെ വന്നു.

ഞാൻ ഫ്രിഡ്ജ് തുറന്നൊരു ബകാർഡി ബ്ലാക്ക് റം ബോട്ടിലെടുത്തു..

"ജോസേ രണ്ടു ഗ്ലാസ് എടുക്ക്..."

അയാൾ കിച്ചൻ റാക്കിൽ നിന്ന് രണ്ടു ഗ്ലാസ് എടുത്ത് കൊണ്ടു വന്നു.

"ഹാ കഴുകിട്ട് കൊണ്ടുവാടോ ".. ഞാൻ ചീറി.

അയാൾ അനുസരണയുള്ള ഒരു വേലക്കാരനെ പ്പോലെ ഗ്ലാസ് കഴുകി വൃത്തിയാക്കി കൊണ്ട് വന്നു.

ഞാൻ രണ്ടു ഗ്ലാസിലും ഓരോ അറുപതൊഴിച്ചു..

"ഇന്നാ അടി.. " ഞാൻ അയാളുടെ നേരെ ഗ്ലാസ് നീക്കി..

"വെള്ളം..." അയാൾ തല ചൊറിഞ്ഞു. ഞാൻ ഒന്ന് തുറിച്ചു നോക്കി. അയാൾ ഒറ്റയടിക്കത് വിഴുങ്ങി. പിന്നെ അതിന്റെ കൈപ്പിൽ ഒന്ന് കണ്ണിറുക്കി തുറന്നു.. ഞാൻ അയാളുടെ ഗ്ലാസ് ഒന്ന് കൂടി നിറച്ചു.. അടിക്കാൻ ആംഗ്യം കാണിച്ചു അതും അയാൾ പച്ചക്ക് വിഴുങ്ങി...

ഞാൻ എന്റെ ഗ്ലാസ്സിലെ മദ്യം പതിയെ സിപ് ചെയ്തു.

"അപ്പോൾ ജോസേ എന്താ ഇതിനൊരു പരിഹാരം?" ഞാൻ ചോദിച്ചു.

"കുഞ്ഞു പറയുന്ന പോലെ ചെയ്യാം. " അയാൾ വിനയനിതനായി.

"എങ്കിൽ ഈ സ്വർണവും, പണവും മുഴുവൻ ഇവിടെ വച്ചിട്ട് ജോലി കളഞ്ഞു പോകാൻ പറ്റുമോ?" ഞാൻ അയാളെ നോക്കി.

"അത്.. കുഞ്ഞേ ഈ ജോലി പോയാൽ.. ഇത്രയും ശമ്പളത്തിൽ ഞങ്ങൾക്കിനി ഒരു ജോലി കിട്ടില്ല.. ആ ബാഗിൽ ഉള്ളത് മുഴുവൻ മോനെടുത്തോ.. ഞാൻ ഇനി ഒരു കുഴപ്പവും ഉണ്ടാക്കില്ല.." അയാൾ പറഞ്ഞു.

"ഹാ അതെങ്ങനെ ശരിയാവും ജോസേ... തന്നെ ഇനി എങ്ങനെ അവിടെ ഇരുത്തും.. അത് ശരിയാവില്ല." ഞാൻ നിഷേധത്തോടെ പറഞ്ഞു.

"അല്ല കുഞ്ഞേ പരുമല പിതാവാണെ ജോസിനി ഒരു കള്ളത്തരവും കാണിക്കില്ല.. പ്ലീസ് ഞങ്ങളെ വഴിയാധാരമാക്കല്ലേ. കടമൊക്കെ വീട്ടി ഒന്ന് ജീവിച്ചു തുടങ്ങുന്നയതേയുള്ളു." അയാൾ ദീനതയോടെ പറഞ്ഞു..