ഒരു പ്രണയ കഥ

Oru Pranaya Kadha | Author : Vijay

നമുക്കെല്ലാവർക്കും കാണും, ജീവിതത്തിൽ ഇഷ്ടമുള്ളവരും ഇഷ്ടമില്ലാത്തവരും. ചിലപ്പോൾ അവർ നമ്മോട് ഒന്നും ചെയ്തിട്ടുണ്ടാവില്ല. പക്ഷെ മനസ്സിൽ അങ്ങനെ കയറി കൂടിയാൽ പിന്നെ അത് മാറ്റാനാവില്ല.. മാറണമെങ്കിൽ അവരുമായി നമ്മൾ അടുത്ത് സംസാരിക്കണം. പുറമെ കാണുമ്പോൾ പരുക്കൻ സ്വാഭാവമായിരിക്കും ചിലർക്ക്.. അടുത്തറിയുമ്പോൾ ആയിരിക്കും അവർ നമ്മളെക്കാൾ എത്രയോ മടങ്ങ് സാധുക്കളായിരുന്നെന്നു അറിയുന്നത്.

പറഞ്ഞ വരുന്നത്, കാലിൽ മണി കൊലുസ്സിട്ട, തല തട്ടമിട്ട് മറച്ച ഒരു സുന്ദരി പെണ്ണ് എന്റെ സങ്കൽപ്പങ്ങളെ, ഭാവനകളെ മാറ്റിമറിച്ച കഥയാണ്. കഥയല്ല.. റിയൽ ലൈഫ്..

മൂന്നാറിലെ ഒരു മഞ്ഞുകാലം...

മലകൾക്കൊപ്പം പാറിപറക്കുന്ന കോടമഞ്ഞിൽ തെളിയുന്ന സുര്യനെ പ്രതീക്ഷിച്ചിരിക്കുകയാണ് ഞാൻ. നല്ല തണുപ്പ്.. ദേഹത്തിട്ടിരിക്കുന്ന ഷട്ടർ മഞ്ഞുമൂലം വിയർത്തിരിക്കുന്നു. രാത്രി വെളിച്ചത്തിനായി തൂക്കിയിട്ട വിളക്ക് കെടുത്തി ആ ഭാഗത്തു ആകെയുള്ളയൊരു പെട്ടിക്കടയിലെ ആൾ എനിക്കായി ആവി പറക്കുന്ന ചൂടുള്ള ചായ കൊണ്ടു തന്നു..

തണുത്തു മരവിച്ച കൈകളിൽ ചൂടുള്ള ചായ ഗ്ലാസ്‌ പിടിച്ചപ്പോൾ ശരീരത്തിലൂടെ മൊത്തം ഒരു സുഖം. അതിൽ രണ്ടും കയ്യും അമർത്തിപിടിച്ചു കൊണ്ടു കുട്ടികളെ പോലെ ചായ ഊറി ഊറി കുടിച്ചു..

വയസ്സനായ ഒരാൾ മലകളിലേക്ക് നോക്കിയിരിപ്പുണ്ട്. അയാൾ ഷട്ടർ ഇട്ടിട്ടില്ല. നടക്കാനായി കയ്യിൽ ഒരു ഊന്നു വടിയുണ്ട്. ഒരു കൈ കൊണ്ടു കത്തിച്ച ബീഡി തന്റെ കറുത്ത ചുണ്ടുകളിൽ അയാൾ വെച്ചു ആഞ്ഞു വലിച്ചു. അകത്തേക്ക് കയറ്റിയ പുക പുറത്തേക്കു വിടുമ്പോൾ അയാൾ കണ്ണുകളടച്ചാസ്വദിച്ചു. എന്നിട്ട് ചുറ്റും ആരെങ്കിലും വരുന്നുണ്ടോന്നു നോക്കി.. ഞാൻ നോക്കുന്നത് കണ്ടു എന്നെയൊന്നു നോക്കി ചിരിച്ചു. പരസ്പരം കൈകൾ ഉയർത്തി കാണിച്ചു..

ഒരു കള്ളിമുണ്ടും ഫുൾ സ്ലീവ് ഷർട്ടുമാണ് അയാളുടെ വേഷം. മുഖത്ത് അൽപ്പം ചുളിവുണ്ട്.. 60 വയസ്സ് കഴിഞ്ഞിട്ടുണ്ട്.. വലിച്ചു തീർത്ത ബീഡി കുറ്റി നിലത്തേക്കിട്ട് ചവിട്ടിയ ശേഷം അയാളെന്നെ നോക്കി. പിന്നെ വടിയും കുത്തിപിടിച്ചു വിറക്കുന്ന കാലുകളോടെ അയാൾ എന്റെ അടുത്തേക്ക് നടന്നെത്തി..

""Good മോർണിംഗ് "" തന്റെ കറുത്ത ചുണ്ടുകൾ തുറന്നു അയാളെന്നോട് ചോദിച്ചു.. നല്ല ബീഡിയുടെ മണം എന്റെ മൂക്കിലെക്കടിച്ചു.. ഞാൻ കാര്യമാക്കിയില്ല..

""ഗുഡ്മോർണിംഗ് "" ചായഗ്ലാസ്സും അതിന്റെ 12 രൂപയും കണക്കാക്കി കൊടുക്കുന്നതിനിടയിൽ ഞാൻ ആ വയസ്സനോട് പറഞ്ഞു.

""ഞാൻ വിവേകനന്ദൻ.. ""

""ഞാൻ ഫാസിൽ ""

""എന്ത് ചെയ്യുന്നു ഇവിടെ.. വല്ല ജോലിക്കും വന്നതാണോ?"" ബീഡിയുടെ പവർ ആവണം. അദ്ദേഹം ഇടയ്ക്കു കൈകൾ പൊത്തി ചുമക്കുന്നുണ്ട്.

""ഞാനിവിടെ ട്രൈനിങ്ങിന് വന്നതാ.. ഇന്ന് തീരും..""

""അപ്പോൾ പോകുന്നതിനു മുൻപ് വീണ്ടും ഇതൊന്നു കാണണമെന്ന് തോന്നി അല്ലെ "" ചിരിച്ചുകൊണ്ട് അദ്ദേഹം ചോദിച്ചു. സത്യത്തിൽ എന്റെ ഉദ്ദേശം മനസിലാക്കിയതിൽ എനിക്കത്ഭുതം തോന്നി.

""അതേ ""

""വയനാടാണോ വീട്?""

""അതേ എങ്ങനെ മനസിലായി "" അത്ഭുതത്തോടെ ഞാൻ ചോദിച്ചു.

""ഹേയ് അത്ഭുത പെടേണ്ട. നിങ്ങളുടെ സംസാരത്തിന്റെ ശൈലി കണ്ടപ്പോൾ തോന്നിയതാ ""

""ഓഹ്.. വീട് ഇവിടെ തന്നെയാണോ?""

""വീടല്ല.. ഈ പുറകിൽ കാണുന്ന ടീ എസ്റ്റേറ്റ് എന്റേതാണ് ""