Chapter Title : പാത്തൂന്റെ പുന്നാര കാക്കു 3 [അഫ്സൽ അലി]

ബസ് നിർത്തിയെങ്കിലും അവൾ അതിലൊന്നും കയറാതെ നിയാസിന്റെ ബസ്സിനായി കാത്തിരുന്നു...

ശരീരത്തോട് ചേർന്ന് നിക്കുന്ന പർദ്ദയിൽ അവളുടെ ഉടലളവുകൾ എടുത്തു കാണിച്ചിരുന്നു... വഴിയേ പോകുന്നവർ തന്നെ നോക്കി ചോര കുടിക്കുന്നത് കാണുമ്പോൾ 'പോടാ തെണ്ടികളെ, ഇങ്ങോട്ട് നോക്കിയിട്ട് കാര്യമില്ല... ഇതിന്റെ ഉടമസ്ഥൻ ഇപ്പോ വരും' എന്നവൾ മനസ്സിൽ പലവുരു പറഞ്ഞു കഴിഞ്ഞിരുന്നു.

ദൂരെ നിന്നും നിയാസിന്റെ ബസ്സിന്റെ ഹോൺ മുഴക്കം അവളുടെ കാതുകളിൽ പതിച്ചു. അവളുടെ ഹൃദയമിടിപ്പ് ക്രമാതീതമായി വർധിച്ചു കൊണ്ടിരുന്നു... ബസ്സ് സ്റ്റോപ്പിലേക്ക് നിർത്തിയതും നിയാസ് ആളുകൾക്ക് അകത്തേക്ക് കേറാൻ വേണ്ടി ഡോർ തുറന്നു പുറത്തേക്ക് ഇറങ്ങി.

പച്ച കളർ പർദ്ദയിൽ തിളങ്ങി നിക്കുന്ന റസിയയെ കണ്ടതും അവന്റെ കണ്ണുകൾ വിടർന്നു. അവൾക്ക് അവനെയും ഇഷ്ടമാണെന്നവൾ പറയാതെ പറഞ്ഞിരിക്കുന്നു.

മിടുക്കുന്ന ഹൃദയത്തോടെ റസിയ ബസ്സിലേക്ക് കേറി. ഫ്രന്റിൽ കാലിയായിരിക്കുന്ന സീറ്റിലേക്ക് ഇരിക്കുമ്പോഴും അവളുടെ കണ്ണുകൾ നിയാസിന്റെ മേലെ ആയിരുന്നു. അവനോട് മിണ്ടണം എന്നുണ്ടെങ്കിലും ആളുകൾ നിറഞ്ഞിരിക്കുന്ന ബസ്സിൽ വച്ച് മിണ്ടാൻ അവൾക്ക് പേടി തോന്നി...

ബസ്സ് നീങ്ങി തുടങ്ങിയതും ടിക്കറ്റ് മുറിക്കാനായി വന്ന നിയാസിന്റെ മുഖത്തേക്ക് നോക്കാൻ അവൾ പാട് പെട്ടു. നിയാസിന്റെ മുഖത്ത് നോക്കാതെ സ്ഥലം പറഞ്ഞവൾ ടിക്കറ്റ് മേടിച്ചു.

ബസ്സിലിരിക്കുന്ന സമയം അത്രയും അവൾ വല്ലാത്ത പരവേഷം അനുഭവിച്ചിരുന്നു. അവളുടെ കണ്ണുകൾ അവന്റെ പിറകെ ഓടുന്ന പോലെ തോന്നി അവൾക്ക്. ബസ്സിനുള്ളിലൂടെ ടിക്കറ്റ് മുറിക്കാൻ പാഞ്ഞു നടക്കുന്ന നിയാസിനെ ഒരു നിമിഷം വിടാതെ അവളുടെ കണ്ണുകൾ പിന്തുടർന്നു.

അവളുടെ സ്റ്റോപ്പിൽ ഇറങ്ങുമ്പോൾ നിറപുഞ്ചിരിയോടെ അവനോട് അവൾ ഹൃദയം കൊണ്ട് യാത്ര പറഞ്ഞു. പ്രണയം സുഖമുള്ളൊരു വികാരമായി അവളുടെയുള്ളിൽ അലയടിച്ചുകൊണ്ടിരുന്നു...

സ്കൂളിൽ എത്തി തന്റെ സീറ്റിലേക്ക് ഇരുന്ന റസിയ ആദ്യം ചെയ്തത് മൊബൈൽ എടുത്തു നിയാസിന് മെസ്സേജ് അയക്കുകയാണ്.

"ഐ ലവ് യൂ ടൂ... ❤️"

അവളുടെ മുഖത്ത് സന്തോഷവും ആനന്ദവും മിന്നിമറഞ്ഞു...