Chapter Title : പീലി വിടർത്തിയാടുന്ന മയിലുകൾ 6 [സ്പൾബർ] [Climax]

ഗിഫ്റ്റ് തന്നെയാണെന്നവൾക്ക് മനസിലായി. എന്തായാലും സ്വർണത്തിന്റെ ഒരു മോതിരമുണ്ടാകും.അവൾക്ക് ബെന്നിയെ കടിച്ച് തിന്നാൻ തോന്നി.

ബെന്നി ആ ബോക്സ് തുറന്ന് അതിൽ നിന്നും പുറത്തെടുത്ത സാധനം കണ്ട് രണ്ട് പേരും ഞെട്ടിത്തെറിച്ച് പോയി…!
അവർക്കത് വിശ്വസിക്കാനായില്ല… !
ഡയമണ്ടിന്റെ മനോഹരമായൊരു നെക്ലേസ്.. !
നിഖിലക്ക് താൻ കുഴഞ്ഞ് കസേരയിൽ നിന്നും താഴെ വീഴുമെന്ന് തോന്നി. ഷീബയുടെ അവസ്ഥയും അത് തന്നെയായിരുന്നു.

“ ഇച്ചായാ… ഇത്..ഇതൊക്കെയെന്തിനാ ഇച്ചായാ വാങ്ങിയത്… ഇതൊന്നും…”

തൊണ്ടയിലേക്കെത്തിയ തേങ്ങൽ കൊണ്ട് ഷീബക്ക് ബാക്കി പറയാനായില്ല.

“ എടീ… നീ മിണ്ടരുത്… ഇതേ… ഞാനെന്റെ അമ്മൂന് വേണ്ടി മേടിച്ചതാ..അതിന് നിനക്കെന്താ..അവൾക്ക് ഞാൻ വാക്ക് കൊടുത്തിട്ടുണ്ട്. ഒട്ടും പ്രതീക്ഷിക്കാത്ത ഒരു സമ്മാനം തരുമെന്ന്.അല്ലേ അമ്മൂ… “

അവൻ നിഖിലയുടെ മുഖത്തേക്ക് നോക്കി. കണ്ടതും, കേട്ടതും ഇനിയും വിശ്വസിക്കാനാവാതെ തരിച്ചിരിക്കുകയാണവൾ.
ഈശ്വരാ… ഇത് തനിക്കാണോ… തനിക്കൊരു ഡയമണ്ട് നെക്ലേസ് കിട്ടുമെന്ന് ഈ ജൻമത്തിലെന്നല്ല, അടുത്ത പത്ത് ജന്മത്തിലും താൻ ആഗ്രഹിച്ചതല്ല. ഇച്ചായനെ ഒന്ന് കെട്ടിപിടിക്കണമെന്ന് അവൾക്ക് അതിയായ ആഗ്രഹം തോന്നി.

‘“ ഷീബേ..ഇന്നാ… ഇത് നീ അമ്മുവിന്റെ കഴുത്തിലൊന്ന് കെട്ടിക്കൊടുത്തേ..”

ബെന്നി ആ നെക്ലേസ് ഷീബയുടെ കയ്യിലേക്കിട്ടുകൊടുത്തു. ഷീബ അത് വാങ്ങിയൊന്ന് നോക്കി.മനോഹരമായ പണികളാൽ വെട്ടിത്തിളങ്ങുന്ന ആഭരണം.ഇതിന്റെ വില എത്രയായിട്ടുണ്ടാവും.. വേണ്ട… അതറിയണ്ട… അറിഞ്ഞാൽ ചിലപ്പോൾ തനിക്ക് തല കറങ്ങും. അവൾ അത് തിരിച്ചും മറിച്ചും നോക്കി അതിന്റെ ഭംഗിയാസ്വദിച്ചു. പിന്നെ ചെയറിൽ നിന്ന് എഴുന്നേറ്റ്, ഇരിക്കുകയായിരുന്ന അമ്മുവിന്റ പിന്നിൽ വന്ന് നിന്നു.നെക്ലേസ് അമ്മുവിന്റെ കഴുത്തിലേക്ക് വെക്കാനൊരുങ്ങി, പിന്നെ ഒരു വീണ്ടുവിചാരത്തോടെ അമ്മുവിനോട് പറഞ്ഞു.

“ മോളേ… നീയൊന്നെണീറ്റേ…”