Chapter Title : ഫാം ഹൌസ് 1 [Master]

ഇത്രയും മനോഹരമാണ് ഈ സ്ഥലം എന്ന് സ്വപ്നത്തില്‍പ്പോലും കരുതിയിരുന്നതല്ല ഞാന്‍.” ആര്‍ത്തിയോടെ ആ ഗ്രാമ-നഗര മിശ്രിതഭംഗി ആസ്വദിച്ചുകൊണ്ട്‌ ഞാന്‍ പറഞ്ഞു.

“ഈ സ്ഥലത്തെക്കാളും മനോഹരിയാണ് നീ” ഹരീഷ് കാതില്‍ മന്ത്രിച്ചു. ലജ്ജയോടെ അവനെ നോക്കിയിട്ട് ഞാന്‍ വീടിനു മുന്‍പിലുണ്ടായിരുന്ന കൂജയുടെ രൂപത്തില്‍ പണിതിരുന്ന കിണറിനു സമീപമെത്തി ഉള്ളിലേക്ക് നോക്കി. സ്ഫടികം പോലെ തിളങ്ങുന്ന ശുദ്ധമായ ജലം.

“നോക്ക് ഹരീഷ്, ഇതാണ് റിയല്‍ മിനറല്‍ വാട്ടര്‍. കുപ്പിയില്‍ വിഷം കലര്‍ത്തി നഗരത്തില്‍ ലഭിക്കുന്ന വെള്ളമല്ല ഇത്..” ഞാന്‍ തൊട്ടിയെടുത്ത് കിണറ്റില്‍ നിന്നും വെള്ളംകോരി മുഖം അതിലേക്ക് പൂഴ്ത്തി കുടിച്ചു.

“ഏയ്‌ ഹിമ, തിളപ്പിക്കാതെ കുടിക്കരുത്” ഹരീഷ് എന്നെ വിലക്കി. ഞാന്‍ നനഞ്ഞ മുഖം അവന്റെ നേരെ തിരിച്ച് പുഞ്ചിരിച്ചു.

“ഹരീഷ്, തിളപ്പിച്ച വെള്ളം ഡെഡ് ആണെന്നാണ് പറയുക. ഇതാണ് ഹെല്‍ത്തിനു നല്ലത്. ദ റിയല്‍ ലിവിംഗ് വാടര്‍..”

ഹരീഷ് തോളുകള്‍ കുലുക്കി തലയാട്ടി. ജോലിക്കാര്‍ തിരികെ എത്തി യാത്ര പറഞ്ഞു പോയപ്പോള്‍ ഞങ്ങള്‍ ഉള്ളിലേക്ക് കയറി. നഗരത്തില്‍ ഉള്ളതിനേക്കാള്‍ സൌകര്യങ്ങള്‍ ഓരോ മുറിയിലും ഞാന്‍ കണ്ടു. ആഡംബരം അതിന്റെ പാരമ്യതയില്‍. ജനറല്‍ മാനേജര്‍ തസ്തികയില്‍ ജോലിയുള്ള ഹരീഷിന് പദവിക്ക് അനുസരിച്ചുതന്നെയുള്ള സൌകര്യങ്ങളാണ് കമ്പനി നല്‍കിയിരിക്കുന്നത്.

അന്നത്തേക്കുള്ള ആഹാരം ജോലിക്കാരെ വിട്ടു ഹരീഷ് വാങ്ങിപ്പിച്ചു. അടുത്തദിവസം മുതല്‍ മതി കുക്കിംഗ് എന്നായിരുന്നു ഞങ്ങളുടെ തീരുമാനം. വീട്ടിലേക്ക് ആവശ്യമായ സാധങ്ങള്‍ എല്ലാം തന്നെ, മത്സ്യവും മാംസവും പച്ചക്കറികളും ഒഴികെ അവിടെ ഉണ്ടായിരുന്നു.

“ലിസ്റ്റ് ഞാന്‍ തന്നെ നല്‍കിയതാണ്” എല്ലാം പരിശോധിച്ചിട്ട് ഹരീഷ് പറഞ്ഞു. കെല്‍വിനേറ്ററിന്റെ സ്വര്‍ണ്ണ നിറമുള്ള പുതിയ ഫ്രിഡ്ജ് കാലിയായിരുന്നു.

“നാളെ പച്ചക്കറികളും മീനുമൊക്കെ വാങ്ങാം. ഒഫീഷ്യല്‍ ഡ്യൂട്ടി മറ്റന്നാള്‍ മുതലേ തുടങ്ങുന്നുള്ളൂ. നാളെ ഈ സ്ഥലമൊക്കെ നമുക്കൊന്ന് കറങ്ങാം” ഡിന്നര്‍ കഴിഞ്ഞു കിടക്കയില്‍ എത്തിയപ്പോള്‍ ഹരീഷ് പറഞ്ഞു.

“ഷുവര്‍..”

“നിനക്ക് കാര്‍ വേണോ? കമ്പനിയില്‍ ഒരു സ്പെയര്‍ വണ്ടി കിടപ്പുണ്ട്”

“ഏയ്‌..സ്കൂട്ടര്‍ മതി. കാറിന്റെ ആവശ്യമില്ല” ഞാന്‍ പറഞ്ഞു. ഹരീഷ് അസ്വസ്ഥതയോടെ എന്നെ നോക്കി.

“എന്താ?’

“കാര്‍ ആകുമ്പോള്‍ ഒരു പ്രൈവസി..”

“ഹേയ് ഹരീഷ്, കമോണ്‍. ഇത്രയ്ക്ക് സ്വാര്‍ത്ഥനാകല്ലേ..” അവന്റെ മനസ്സിന്റെ ബാലിശത്വം കണ്ടു ഞാന്‍ പൊട്ടിച്ചിരിച്ചു. ഒരു വലിയ കമ്പനിയുടെ ജനറല്‍ മാനേജരാണ്; പക്ഷെ മനസ് കൊച്ചു കുട്ടികളുടെയും.

അടുത്തദിവസം ഞങ്ങള്‍ ചുറ്റിക്കറങ്ങി. ശരിക്കും ഒരു ഹരിതവനം തന്നെയായിരുന്നു ആ സ്ഥലം. ഞങ്ങളുടെ വില്ലയ്ക്ക് നേരെ എതിരെയുള്ളത് ഒരു ഫാം ആണ്.