Chapter Title : സംവിധാന സഹായി 4 [ഉർവശി മനോജ്]

എങ്ങനെ ഞാനിവിടെ എത്തിക്കും. നിർമ്മലഗിരി എസ്റ്റേറ്റിൽ നിന്നും എന്റെ താമസ സ്ഥലമായ 'ബാലൻ പിള്ള ടീസ്റ്റാൾ ' ലേക്കുള്ള നട വഴിയിൽ അത്രയും എന്റെ മനസ്സിൽ ഉണ്ടായിരുന്ന ചോദ്യമിതായിരുന്നു.

"ബാലേട്ടാ ചോറിൽ വെള്ളം ഒഴിക്കേണ്ട കഴിക്കാൻ ഒരാൾ ഉണ്ട് കേട്ടോ .. "

ചായക്കടയുടെ വാതിൽക്കൽ നിൽക്കുകയായിരുന്ന ബാലേട്ടനോട് തമാശ പറഞ്ഞു കൊണ്ട് ഞാൻ അവിടേക്ക് ചെന്നു.

"കത്തിക്കൊണ്ടിരുന്ന കനലിൽ തന്നെ വെള്ളമൊഴിച്ചു കെടുത്തിയ അവസ്ഥയിലാണ് മോനേ , പിന്നെയാ ചോറ് "

അതും പറഞ്ഞ് ഒന്നും മിണ്ടാതെ തല താഴ്ത്തി ബാലേട്ടൻ പുറത്തേക്ക് പോയി. കാര്യം മനസ്സിലാകാതെ ഒരു നിമിഷം ഞാൻ അവിടെ നിന്നു.

"മോൻ ഇത് എവിടെയായിരുന്നു ബാഗും സാധനങ്ങളും ഇവിടെ കൊണ്ടു വെച്ച് ആഹാരവും കഴിച്ചു പോയ പോക്കാണ് ഇന്നലെ രാത്രിയിൽ ആണെങ്കിൽ വന്നതുമില്ല എന്തു പറ്റി " തിരിഞ്ഞു നോക്കിയപ്പോൾ ചോദ്യം രാധേച്ചിയുടെ വകയാണ്.

"ഈ ബാലേട്ടന് എന്താ പറ്റിയത് ഒന്നും മനസ്സിലാകാതെ എന്തൊക്കെയോ പറഞ്ഞിട്ട് പുറത്തേക്ക് പോയി കനലിൽ ആരാണ് ഇപ്പോൾ വെള്ളം കോരി ഒഴിച്ചത് ?"

"മോൻ ആദ്യം നന്നായി ഒന്നു കുളിച്ചിട്ടു വാ .. നല്ല ക്ഷീണം ഉണ്ടല്ലോ മുഖത്ത് "

"ഇന്നലെ രാത്രി ഒരു പോള കണ്ണടയ്ക്കാൻ പറ്റിയില്ല രാധേച്ചി നല്ല ഓട്ടമായിരുന്നു ഇപ്പോഴാണ് ഒന്ന് ഫ്രീ ആയത് "

രാധേച്ചിക്ക്‌ മറുപടി നൽകി കുളിച്ച് റെഡിയായി ആഹാരം കഴിക്കുവാനായി ഞാനിരുന്നു.

"ബാലേട്ടൻ ആകപ്പാടെ വിഷമത്തിലാണ് മോനേ പശുവിനെ വളർത്തുന്നതിനു വേണ്ടി ഭൂപണയ ബാങ്കിൽ നിന്നും ലോൺ എടുത്തിരുന്നു നാലാം മാസം പശു ചത്തു പോയി ഇപ്പോൾ കുടിശ്ശിക അടക്കം ലോൺ തിരികെ അടക്കേണ്ട അവസ്ഥയാണ് "

എനിക്ക് ചോറു വിളമ്പി തന്നു കൊണ്ട് രാധേച്ചി വിഷമത്തോടെ പറഞ്ഞു.

"എത്രയോ ചേച്ചി ലോൺ അടയ്ക്കാൻ ഉള്ളത് ?"

"ഇരുപത്തി അയ്യായിരം രൂപ ആണ് മോനെ എന്താ ചെയ്യേണ്ടത് എന്ന് ഒരു പിടിയും ഇല്ല "

"ഹേ .. അത്രയേ ഉള്ളൂ അതിനു ആണോ ഇങ്ങനെ വിഷമിക്കുന്നത് .. സാരമില്ലന്നെ... "

"മോന് അത് പറയാം രണ്ടു ദിവസത്തിനുള്ളിൽ ഞങ്ങൾ എങ്ങനെ പണം ഉണ്ടാക്കാൻ ആണ് ? "

ആഹാരം വിളമ്പി തന്ന രാധേച്ചിയുടെ കണ്ണു നിറയുന്നതു കണ്ടപ്പോൾ മനസ്സിൽ എവിടെയോ ഒരു നൊമ്പരം. എവിടെ വച്ചോ എങ്ങനെയോ എനിക്ക് അറ്റു പോയ കുടുംബ ബന്ധങ്ങൾ , ആദ്യം രാധേച്ചിയെ കണ്ടപ്പോൾ