Chapter Title : ശംഭുവിന്റെ ഒളിയമ്പുകൾ 37 [Alby]

***** റപ്പായി മാപ്പിള കൈ കാണിക്കുന്നത് കണ്ട് ശംഭു കാർ ഒതുക്കിനിർത്തി. പതിവ് അമ്പലദർശനം കഴിഞ്ഞുള്ള വരവ് തന്നെ.വീണയുടെ നേർച്ചയായി ശയനപ്രദക്ഷിണം കഴിഞ്ഞതു മുതൽ ആൾക്ക് വിശ്വാസമൊക്കെ വന്നുതുടങ്ങിയിട്ടുണ്ട്.വീണ ഗർഭിണി ആയതിൽ പിന്നെ അവൾക്കൊപ്പം മുടങ്ങാതെ ക്ഷേത്രദർശനവുമുണ്ട്. വീണയുടെ വക നേർച്ചയാണ് അത് പോലും. വണ്ടി നിന്നതും റപ്പായി ഡ്രൈവിങ് സൈഡിലേക്ക് വന്നു. "എന്താ റപ്പായിച്ചേട്ടാ പതിവില്ലാതെ ഇവിടെയൊരു നിൽപ്പ്?"മാപ്പിള അടുത്തേക്ക് വന്നതും ഡോർ ഗ്ലാസ്സ് താഴ്ത്തി ശംഭു ചോദിച്ചു. സാധാരണ ഒന്നുകിൽ ശംഭു റപ്പായിയുടെ വീട്ടിലെത്തും, അല്ലെങ്കിൽ സുനന്ദ ജോലി ചെയ്യുന്ന ഹോട്ടലിൽ എത്തിയശേഷം റപ്പായി ശംഭുവിനെ അങ്ങോട്ടേക്ക് വിളിക്കും. അതാണ് പതിവ്.ഇ രണ്ടിടങ്ങളിലാണ് അവരുടെ കമ്പനി കൂടൽ.മോള് മേരി കൊച്ചിയിൽ തന്നെയായതുകൊണ്ടും മാധവന്റെ സ്ഥാപനങ്ങളുടെ കണക്ക് മുഴുവൻ നോക്കുന്നതിനാൽ പിടിപ്പത് ജോലിയുള്ളതുകൊണ്ടും തനിക്ക് കിട്ടുന്ന സ്വാതന്ത്ര്യം റപ്പായി ശരിക്കും അനുഭവിക്കുന്നുണ്ട്. വീണ വന്നു കയറിയതിൽ പിന്നെ ശംഭുവിന് കിട്ടാത്തതും ഇങ്ങനെ പറന്നുനടക്കാനുള്ള അവസരമാണ്. "നിന്നെയൊന്ന് കാണാൻ തന്നെയാ." "എന്ത്‌ പറ്റി മാപ്പിളെ?"ഇടക്കിങ്ങനെ വഴിയിലും കാണാറുണ്ട്.പക്ഷെ ഇന്ന് ആ നിൽപ്പും സംസാരവും കണ്ടിട്ട് കാര്യം അല്പം ഗൗരവമുള്ളതാണെന്ന് ശംഭുവിന് തോന്നി. "ചേട്ടൻ കയറ്"പിന്നിലേക്ക് കയ്യെത്തിച്ച് ഡോർ ലോക്ക് മാറ്റിയ ശേഷം ശംഭു പറഞ്ഞു.അകത്തേക്ക് കയറിയ അയാളെ നോക്കി വീണ ഒന്ന് ചിരിച്ചു,റപ്പായി തിരിച്ചും. വീണക്കും റപ്പായിയെ നന്നായിട്ട് അറിയാം.നാട്ടുകാർ കുടിയൻ,തെല്ലും വെളിവില്ലാത്തവൻ എന്നൊക്കെ വിളിക്കുമ്പോഴും അയാളുടെ വാക്ക് കേൾക്കുകയും അതിലെ പൊരുളും പറയുന്ന കാര്യങ്ങളുടെ ഗൗരവം ഉൾക്കൊള്ളുകയും ചെയ്യുന്നത് മാധവനും കുടുംബവുമാണ്.ആ ഒരു ബന്ധം അറിയുന്നതുകൊണ്ട് നാട്ടിൽ റപ്പായിക്കതിന്റെ പത്രാസുമുണ്ട്.

അയാൾ കയറിയതും ശംഭു വണ്ടി മുന്നോട്ടെടുത്തു."എന്താടോ മാപ്പിളെ മുഖത്തൊരു ഗൗരവം.കാര്യം പറയ്." ഡ്രൈവിങ്ങിനിടയിൽ ശംഭു ചോദിച്ചു. "തത്കാലം നീ എന്റെ വീട്ടിലേക്ക് വിട്. ഒന്ന് സ്വസ്ഥമായിട്ട് സംസാരിക്കേണ്ട വിഷയമാണ്." ഒരു മൂളലോടെ ശംഭു ഡ്രൈവിങ് തുടർന്നു.ഇതിനിടയിൽ റപ്പായിയെ ഒരു മകളെപ്പോലെ ഉപദേശിക്കുന്ന തിരക്കിലായിരുന്നു വീണ,അതും കുടി നിർത്തുന്നതിനെക്കുറിച്ച്.ഓരോ നാട്ടുകാര്യങ്ങളും പറഞ്ഞ് അവർ റപ്പായിച്ചേട്ടന്റെ വീടിന് മുന്നിൽ ചെന്ന് നിന്നു. "ഇവിടെ ഈ തോട്ടിറമ്പിൽ അടിച്ചു കോൺ തെറ്റി എന്റെ ചെക്കൻ കിടന്നുറങ്ങിയിട്ടുണ്ടല്ലെ."ഇറങ്ങുന്ന സമയം ഒഴുക്കുള്ള തോട്