Chapter Title : വാടകക്കെടുത്ത ഹൃദയം [അവസാന ഭാഗം] [JO]

നിന്നും ഇടത്തേക്ക് മാറി പിൻവാതിലിന് സമീപത്തായാണ് ആ കുഞ്ഞു സ്റ്റോർറൂം. പിൻവാതിൽ കഴിഞ്ഞാൽ ആ റൂം. ഒരു കുഞ്ഞു ഗെയ്റ്റാണ് ആ മുറിയെ പിൻവശത്തെ മുറ്റവുമായി വേർതിരിക്കുന്നത്. നെഞ്ചോളം ഉയരത്തിൽ ഭിത്തിയും അതിന് മുകളിൽ കമ്പിവലകൊണ്ടുമാണ് ആ റൂമിനെ മറച്ചിരിക്കുന്നത്. പാത്രങ്ങൾ കഴുകുന്ന സിങ്കും വാഷിങ് മെഷീനും സൂക്ഷിച്ചിരിക്കുന്നത് ആ മുറിയിലാണ്. ഒരു ചാർത്തെന്നു വേണം വിളിക്കാൻ.

ലക്ഷ്മിക്കുട്ടീ........ ഇരുളിൽ നിന്നൊരു വിളി. ഇടിവെട്ടേറ്റപോലെ അവളൊന്നു ഞെട്ടി. ഉറക്കത്തിൽനിന്നെണീറ്റപോലെ അവൾ പരിഭ്രാന്തിയോടെ മുറ്റത്തെ ഇരുളിലേക്ക് നോക്കി. മുറ്റത്തെ ലൈറ്റിടാൻ തോന്നിക്കാത്ത നിമിഷത്തെ അന്നാദ്യമായി അവൾ പ്രാകി. അല്ലെങ്കിലും അന്നത്തെ ദിവസത്തിന് ശേഷം വീട്ടിൽ ആകെ ഒന്നോ രണ്ടോ ബൾബ് മാത്രമാണ് തെളിഞ്ഞതെന്നുവേണം പറയാൻ. അവളുടെ മനസ്സിനെ ഓർപ്പിക്കുന്നപോലെ ആകെ അന്ധകാരം നിറഞ്ഞതായിരുന്നു ആ വീട്ടിലെ രാത്രികൾ. എന്തായാലും പിന്നെ അനക്കമൊന്നും കേട്ടില്ല. ഒരുനിമിഷം അവളാ ഇരുളിലേക്ക് തുറിച്ചുനോക്കിനിന്നു. ഒരുവേള തന്റെ മനസ്സിന്റെ തോന്നാലാവുമെന്നു കരുതി സമാധാനിച്ചുകൊണ്ട് അറിയാതെ നിറഞ്ഞ കണ്ണ് പുറംകൈകൊണ്ടു തുടച്ച്, അവൾ വീണ്ടും കയ്യിലെ സ്ക്രബറിൽ സോപ്പ്‌ പതപിച്ച് അടുത്ത പാത്രത്തിലേക്ക് കയ്യിട്ടു. അവളറിയാതെ ഉള്ളിലൊരു ചോദ്യം ഉയർന്നു.

ഒന്ന് വന്നൂടെ??? എന്റെ ഉള്ളു തകരുന്നത് അറിയുന്നില്ലേ???

ലക്ഷ്മിക്കുട്ടീ.... വീണ്ടുമാ വിളി.

കേൾക്കാൻ..., കാണാൻ..., താൻ കാത്തിരുന്ന ദിനം...!!!. ഇത്തവണ അത് തോന്നലല്ലെന്നവൾക്ക് ഉറപ്പായിരുന്നു. പാതിചാരിക്കിടന്ന ആ കുഞ്ഞുഗെയിറ്റു വലിച്ചുതുറന്നവൾ മുറ്റത്തെ ഇരുളിലേക്കോടി. ഇരുളിലേക്കിറങ്ങിയതും രണ്ടുകരങ്ങളിലേക്കവളമർന്നു. പൊട്ടിക്കരഞ്ഞുകൊണ്ടാണവളാ സന്തോഷം പ്രകടിപ്പിച്ചത്. മുഖം വ്യക്തമല്ലെങ്കിലും അവൾക്കുറപ്പായിരുന്നു അത് താൻ കാത്തിരുന്ന ആൾ തന്നെയാണെന്ന്. തന്നെ ചേർത്തുപിടിച്ചിരുന്ന ആ കൈകളിൽ അമർന്ന്, ആ നെഞ്ചിലെ ചൂടിൽ ആ വയറിലൂടെ ചുറ്റിപ്പിടിച്ചുനിന്നവൾ കണ്ണീർവാർത്തു. എന്തിനെന്നറിയാതെ...!!!.

ലക്ഷ്മീ.... അവളുടെ തലമുടിയിൽ മെല്ലെ തലോടിക്കൊണ്ട് അവൻ വിളിച്ചു.

ഉം.... ഒരു കാമുകിയുടെ ഭാവത്തിലവൾ വിളികേട്ടു.

വിളിക്കുന്നത് ആരാന്നോർത്താടീ നീയോടിവന്നത്??? വേറാരേലും ആരുന്നെങ്കിലൊ???

അവൾക്കുത്തരമില്ലായിരുന്നു. പക്ഷേ ഒന്നവൾക്ക് ഉറപ്പായിരുന്നു. ആ ശബ്ദത്തിൽ..., ആ സ്നേഹത്തോടെ മറ്റാരും തന്നെയങ്ങനെ വിളിക്കില്ലെന്ന്. അവൾ കൂടുതൽ അവനിലേക്ക് ഒട്ടിച്ചേർന്നുനിന്നു.

നീയെന്നെ അകത്തേക്ക് വിളിക്കുന്നില്ലേ??? അവന്റെ ചോദ്യമാണവളെ ഉണർത്തിയത്. അവളുടെ മറുപടിക്ക് കാതോർക്കാതെ അവളെയും കൈകളിൽ കോരിയെടുത്തവൻ അകത്തേക്ക് നടന്നു.